അമരാവതി : ആന്ധ്രാപ്രദേശ് മുഖ്യമന്ത്രി വൈ എസ് ജഗന് മോഹന്‍ റെഡ്ഡിയുടെ (YS Jagan Mohan Reddy) ഹെലികോപ്‌റ്റര്‍ യാത്ര വിവാദത്തില്‍. 20 കിലോ മീറ്ററില്‍ താഴെ ദൂരമുള്ള സ്ഥലങ്ങളിലേക്ക് എത്താന്‍ പോലും മുഖ്യമന്ത്രി ഹെലികോപ്‌റ്റര്‍ ഉപയോഗിക്കുന്നുവെന്നാണ് ആരോപണം. ആകാശമാര്‍ഗം മുഖ്യമന്ത്രി സഞ്ചരിക്കുമ്പോഴും റോഡുകളില്‍ പൊലീസ് നിയന്ത്രണം ഏര്‍പ്പെടുത്തുന്നത് ജനങ്ങളെ ബുദ്ധിമുട്ടിലാക്കുന്നുവെന്നും പരാതി ഉയരുന്നുണ്ട്.
അടുത്തിടെ അമരാവതിയില്‍ നിര്‍ധനരായ കുടുംബങ്ങള്‍ക്കുള്ള വീടുകളുടെ വിതരണ ചടങ്ങില്‍ പങ്കെടുക്കാന്‍ ജഗന് മോഹന്‍ റെഡ്ഡി ഹെലികോപ്‌റ്ററിലായിരുന്നു എത്തിയത്. സംസ്ഥാനം കടുത്ത സാമ്പത്തിക പ്രതിസന്ധിയിലൂടെ കടന്നുപോകുന്ന സാഹചര്യത്തില്‍ തന്‍റെ ഔദ്യോഗിക വസതിയില്‍ നിന്ന് 15 കിലോ മീറ്റര്‍ ദൂരം മാത്രമുള്ള സ്ഥലത്തേക്ക് എത്താന്‍ ആകാശമാര്‍ഗമായിരുന്നു അദ്ദേഹം തെരഞ്ഞെടുത്തത്. ഇത് അന്ന് വലിയ വിമര്‍ശനത്തിന് വഴിവച്ചിരുന്നു.
നിയന്ത്രണങ്ങള്‍ ഇങ്ങനെ : മുഖ്യമന്ത്രി വൈ എസ് ജഗന് മോഹന്‍ റെഡ്ഡി എത്തുന്ന സ്ഥലങ്ങളില്‍ കടുത്ത നിയന്ത്രണങ്ങളാണ് പൊലീസ് പലപ്പോഴും ഏര്‍പ്പെടുത്തുന്നത്. മുഖ്യമന്ത്രിയുടെ പരിപാടി നടക്കുന്നതിന് മൂന്ന് ദിവസം മുന്‍പ് തന്നെ പൊലീസ് ആ സ്ഥലത്തിന്‍റെ നിയന്ത്രണം ഏറ്റെടുക്കും. തുടര്‍ന്ന്, സാധാരണക്കാരെ ഉള്‍പ്പടെ താമസ സ്ഥലത്തുനിന്നും മറ്റിടങ്ങളിലേക്ക് മാറ്റും.
രണ്ട് ദിവസം ആ മേഖലയില്‍ ഗതാഗത നിയന്ത്രണവും പൊലീസ് ഏര്‍പ്പെടുത്താറുണ്ട്. ഹെലികോപ്‌റ്റര്‍ മാര്‍ഗം മുഖ്യമന്ത്രി സഞ്ചരിച്ചാലും റോഡില്‍ പൊലീസ് നിയന്ത്രണം ഉണ്ടാകാറുണ്ടെന്നും ആക്ഷേപമുണ്ട്. മുഖ്യമന്ത്രി പങ്കെടുക്കുന്ന പൊതുപരിപാടികളില്‍ പാര്‍ട്ടി പ്രവര്‍ത്തകരെയും മറ്റ് ആളുകളെയും എത്തിക്കുന്നതിനായി പലപ്പോഴും ആര്‍ടിസിയിലേയും സ്വകാര്യ സ്ഥാപനങ്ങളിലേയും ബസുകളാണ് ഉപയോഗിക്കുന്നത്.
ഇതുമൂലം ദൂരയാത്രകള്‍ക്ക് തങ്ങള്‍ ബുദ്ധിമുട്ട് അനുഭവിക്കുന്നുവെന്നും ജനങ്ങള്‍ പറയുന്നു. ഇത് കൂടാതെ, അതീവ സുരക്ഷ സംവിധാനങ്ങള്‍ മൂലം സാധാരണക്കാര്‍ക്ക് പലപ്പോഴും മുഖ്യമന്ത്രിയെ കണ്ട് തങ്ങളുടെ പരാതി അറിയിക്കാന്‍ സാധിക്കുന്നില്ലെന്നും ആരോപണമുണ്ട്.
More Read : 'മുഖ്യമന്ത്രിമാരില്‍ സമ്പന്നന്‍' ജഗന് മോഹന്‍ റെഡ്ഡി; ആസ്‌തി കുറവ് മമതയ്‌ക്ക്, 29-ാമനായി പിണറായി
മുഖ്യമന്ത്രിമാരില്‍ സമ്പന്നന്‍ : നിലവില്‍ രാജ്യത്തെ മുഖ്യമന്ത്രിമാരുടെ പട്ടികയില്‍ ഏറ്റവും സമ്പന്നന്‍ വൈ എസ് ജഗന് മോഹന്‍ റെഡ്ഡിയാണ്. അസോസിയേഷൻ ഫോർ ഡെമോക്രാറ്റിക് റിഫോംസ് (ADR) ഇക്കഴിഞ്ഞ ഏപ്രിലില്‍ പുറത്തുവിട്ട പട്ടികയിലാണ് ഇക്കാര്യം വ്യക്തമാക്കുന്നത്. ജഗന് 510 കോടിയുടെ ആസ്‌തിയുണ്ടെന്നാണ് റിപ്പോര്‍ട്ടില്‍ പറയുന്നത്.
