ഹാവേരി (കർണാടക): കർണാടകയിലെ റാണെബെന്നൂരിൽ ഗുജറാത്ത്, കേരള കാറുകൾ കൂട്ടിയിടിച്ച് നാല് പേർ മരിച്ചു. പൂന-ബാംഗ്ലൂർ ദേശീയപാത-4ൽ ഉണ്ടായ അപകടത്തിൽ ഗുജറാത്തിൽ നിന്നുള്ള മൂന്ന് പേരും കേരളത്തിൽ നിന്നുള്ള ഒരാളുമാണ് മരിച്ചത്. മൂന്ന് പേർക്ക് പരിക്കേറ്റു.
ഗുജറാത്തിൽ നിന്നുള്ള ദിനേശ് ബായ് (38), ലതീഷ് ബായ് (37), സുരേഷ് ബായ് (39), കേരളത്തിൽ നിന്നുള്ള സഹിൽ (37) എന്നിവരാണ് മരിച്ചത്. കേരള സ്വദേശി ദനേഷ്, ഗുജറാത്തിൽ നിന്നുള്ള ജൈനബി, അശ്വിൻ എന്നിവർക്കാണ് പരിക്കേറ്റത്. പരിക്കേറ്റവരെ റാണെബെന്നൂർ താലൂക്ക് ആശുപത്രിയിൽ പ്രവേശിപ്പിച്ചു.
ദേവനാഗരെയിൽ നിന്നും ഹുബ്ബള്ളിയിലേക്ക് പോവുകയായിരുന്ന ഗുജറാത്തിൽ നിന്നുള്ള കാർ ടയർ പൊട്ടി നിയന്ത്രണം തെറ്റി ഡിവൈഡറിൽ ഇടിച്ചു. ശേഷം മറുവശത്തേക്ക് തെറിച്ചുപോയ കാർ അതേ സമയം തന്നെ ഹുബ്ബള്ളിയിൽ നിന്നും ദേവനാഗരെയിലേക്ക് പോവുകയായിരുന്ന മലയാളികൾ സഞ്ചരിച്ച കാറിൽ ഇടിക്കുകയായിരുന്നു. എസ്‌പി ഹനുമന്തരായയും ട്രാഫിക് പൊലീസും സംഭവസ്ഥലം സന്ദർശിച്ചു.
