ഹൈദരാബാദ്: പഞ്ചാബി ഗായകനും കോണ്‍ഗ്രസ് നേതാവുമായിരുന്ന സിദ്ദു മൂസേവാലയുടെ കൊലപാതകത്തില്‍ എന്‍ഐഎയുടെ ലിസ്റ്റില്‍ പെട്ട ഗുണ്ട നേതാവ്. ബന്ധുവിന്‍റെ കൊലപാതകത്തില്‍ പകരം ചോദിച്ചുകൊണ്ട് മാഫിയ ലോകത്തേക്ക് കടന്നുവന്ന ഗോള്‍ഡി ബ്രാറിനെ രാജ്യം അത്ര പെട്ടെന്നൊന്നും മറക്കാനിടയില്ല. മകന്‍ ഗുണ്ടാത്തലവനാണെന്ന നാണക്കേടില്‍ പൊലീസ് കുപ്പായം അഴിച്ച് വയ്‌ക്കാന്‍ നിര്‍ബന്ധിതനായ ഷംഷേർ സിങ്ങിനെയും ഓര്‍മയുണ്ടാകും. കാനഡ ഗവണ്‍മെന്‍റും പിടികിട്ട പുള്ളിയായി പ്രഖ്യാപിച്ച, ഇന്‍റര്‍പോള്‍ റെഡ് നോട്ടിസ് (പ്രതിയെ പിടികൂടാന്‍ ലോകമെമ്പാടുമുള്ള നിയമപാലകരോട് ആവശ്യപ്പെടുന്ന രേഖ) പുറപ്പെടുവിച്ച ഗോള്‍ഡി ബ്രാര്‍ എന്ന മാഫിയ ഡോണിന്‍റെ ജീവിതം...
സിദ്ദു മൂസേവാലയുടെ കൊലപാതകത്തില്‍ ലോറന്‍സ് ബിഷ്‌ണോയ്‌ക്കൊപ്പം ഉയര്‍ന്നു കേട്ട മറ്റൊരു പേരായിരുന്നു ഗോള്‍ഡി ബ്രാറിന്‍റേത്. ദേശീയ അന്വേഷണ ഏജന്‍സി പുറത്തിറക്കിയ രാജ്യത്തെ 28 ഗുണ്ടാത്തലവന്‍മാരുടെ പട്ടികയിലും ഗോള്‍ഡി ബ്രാര്‍ ഉള്‍പ്പെട്ടിട്ടുണ്ട്. കാനഡയും യുഎസുമാണ് ഇന്ത്യയിലെ മാഫിയ ഡോണുകളുടെ ഇഷ്‌ട കേന്ദ്രമെന്ന മാധ്യമ റിപ്പോര്‍ട്ടുകള്‍ ശരിവയ്‌ക്കുന്ന തരത്തില്‍ ഗോള്‍ഡി ബ്രാര്‍ കാനഡയിലേക്ക് കടന്നിരുന്നു. കാനഡ സര്‍ക്കാരും ഗോള്‍ഡി ബ്രാറിനെ പിടികിട്ടാപുള്ളിയായി പ്രഖ്യാപിച്ചതോടെ ഗോള്‍ഡി അമേരിക്കയിലേക്ക് കടന്നതായാണ് ഇന്‍റലിജന്‍സ് റിപ്പോര്‍ട്ടുകള്‍ നല്‍കുന്ന സൂചന. ഇന്‍റര്‍പോള്‍ അടക്കം റെഡ് നോട്ടിസ് പുറപ്പെടുവിച്ച സജീന്ദര്‍ സിങ് എന്ന ഗോള്‍ഡി ബ്രാറിന്‍റെ ജീവിതം സിനിമ കഥയെ പോലും വെല്ലുന്നതാണ്.
സഹോദരന്‍റെ ചോരക്ക് പകരം ചോദിച്ച് മാഫിയ ലോകത്തേക്ക്: ലോറന്‍സ് ബിഷ്‌ണോയിയുമായി ഏറെ അടുപ്പം പുലര്‍ത്തിയിരുന്ന തന്‍റെ ബന്ധു (അകന്ന സഹോദരന്‍) ഗുര്‍ലാല്‍ ബ്രാറിന്‍റെ കൊലപാതകത്തോടെയാണ് കുറ്റകൃത്യങ്ങളുടെ ലോകത്തേക്കുള്ള ഗോള്‍ഡി ബ്രാറിന്‍റെ കടന്നുവരവ്. പഞ്ചാബ് സര്‍വകലാശാലയില്‍ സ്റ്റുഡന്‍റ് ഓർഗനൈസേഷൻ ഓഫ് പഞ്ചാബ് യൂണിവേഴ്‌സിറ്റി (SOPU) എന്ന സംഘടന ഗോള്‍ഡി ബ്രാര്‍ രൂപീകരിക്കുകയുണ്ടായി. സംഘടനയുടെ രക്ഷാകര്‍തൃത്വം ലോറന്‍സിനായിരുന്നു. 2020 ഒക്‌ടോബറിലാണ് ഗുര്‍ലാല്‍ ബ്രാര്‍ ഛത്തീസ്‌ഗഡില്‍ വച്ച് കൊല്ലപ്പെടുന്നത്.
തന്‍റെ സഹോദരന്‍റെ കൊലപാതകത്തിന് പകരം ചോദിക്കണം എന്നതായി പിന്നീട് ഗോള്‍ഡി ബ്രാറിന്‍റെ ചിന്ത. ലോറന്‍സുമായി ഗോള്‍ഡിക്കുണ്ടായിരുന്ന അടുത്ത ബന്ധം അതിലേക്കുള്ള വഴി എളുപ്പമാക്കി. ഇതിനിടെ ഗുർലാല്‍ ബ്രാറിന്‍റെ കൊലപാതകത്തിൽ യൂത്ത് കോൺഗ്രസ് നേതാവ് ഗുർലാൽ പഹൽവാന്‍റെ പേര് ഉയർന്നു. ഗോൾഡി ബ്രാർ പഹല്‍വാനെ കൊലപ്പെടുത്തി. ശേഷം കാനഡയിലേക്ക് രക്ഷപ്പെട്ടു.
മകന്‍റെ ചെയ്‌തികളില്‍ മനംമടുത്ത പൊലീസ് ഓഫിസറായ പിതാവ്: ഗുർലാൽ പഹൽവാൻ വധക്കേസിൽ ഗോൾഡി ബ്രാറിന്‍റെ പേര് ഉയർന്നതോടെ ഗോള്‍ഡിയുടെ പിതാവ് ഷംഷേര്‍ സിങ്ങിന് വലിയ ചീത്തപ്പേരായി. പൊലീസുകാരനായ തനിക്ക് മാഫിയ തലവനായ ഒരു മകന്‍, അത് അദ്ദേഹത്തിന് അംഗീകരിക്കാനായില്ല. പിന്നാലെ പഞ്ചാബ് പൊലീസിൽ അസിസ്റ്റന്‍റ് സബ് ഇൻസ്‌പെക്‌ടറായ (എഎസ്‌ഐ) ഷംഷേർ സിങ് വിരമിക്കാൻ നിർബന്ധിതനായി.
ലോറന്‍സ് ബിഷ്‌ണോയിയുടെ വലംകൈ: ലോറന്‍സ് ബിഷ്‌ണോയിയുമായി ഉണ്ടായിരുന്ന ബന്ധം കാനഡയിലെത്തിയ ഗോള്‍ഡിയെ അവിടെ ലോറന്‍സ് സംഘത്തിന്‍റെ പ്രവര്‍ത്തനങ്ങള്‍ ഏകോപിപ്പിക്കാന്‍ സഹായിച്ചു. 2022 ഫെബ്രുവരി 25നാണ് ലോറന്‍സിന്‍റെയും ഗോള്‍ഡി ബ്രാറിന്‍റെയും നിര്‍ദേശ പ്രകാരം മുൻ കൗൺസിലർ പരംജിത് തക്രാനും സഹോദരൻ സുർജിത്തും ഗുരുഗ്രാമിൽ കൊല്ലപ്പെടുന്നത്. കാനഡയില്‍ ഇരുന്നു കൊണ്ട് പഞ്ചാബ്, ഹരിയാന, ഹിമാചല്‍ പ്രദേശ്, രാജസ്ഥാന്‍, ഡല്‍ഹി എന്നിവിടങ്ങളിലുള്ള ലോറന്‍സിന്‍റെ നെറ്റ്‌വര്‍ക്കിനെ ഗോള്‍ഡി ഏകോപിപ്പിച്ചു കൊണ്ടിരുന്നു. ലോറന്‍സ് തടവിലായപ്പോഴും ഗോള്‍ഡിയാണ് ലോറന്‍സ് സംഘത്തിന് വേണ്ട നിര്‍ദേശങ്ങള്‍ നല്‍കിയത്. കൂടാതെ പഞ്ചാബിലെ ആയുധ വിതരണത്തിലും ഗോള്‍ഡിക്ക് പങ്കുണ്ടായിരുന്നു.
മൂസേവാല വധത്തില്‍ ഗോള്‍ഡിയുടെ കുമ്പസാരം: കഴിഞ്ഞ വര്‍ഷം മെയ്‌ 29ന് സിദ്ദു മൂസേവാലയുടെ കൊലപാതകത്തിന് തൊട്ടുപിന്നാലെ, കുറ്റസമ്മതം നടത്തിക്കൊണ്ട് ഗോള്‍ഡി ബ്രാര്‍ രംഗത്തുവന്നു. സോഷ്യല്‍ മീഡിയയില്‍ പങ്കുവച്ച വീഡിയോയിലായിരുന്നു ഗോള്‍ഡിയുടെ കുറ്റസമ്മതം. ലോറന്‍സിന്‍റെ കോളജ് സുഹൃത്തായിരുന്ന വിക്കി മിദ്ദുഖേഡയുടെ കൊലപാതകത്തിൽ പങ്കുണ്ടെന്ന് ആരോപിച്ചായിരുന്നു സിദ്ദുവിനെ കൊലപ്പെടുത്തിയത്.
മാൻസയിലെ ജവഹർകെ ഗ്രാമത്തിൽ മൂസേവാലയെ കൊലപ്പെടുത്താൻ ഗോൾഡി ഹരിയാനയിൽ നിന്നും പഞ്ചാബിൽ നിന്നും ആറ് ഷൂട്ടർമാരെ അയച്ചതായാണ് പിന്നാലെ പുറത്തുവന്ന റിപ്പോർട്ടുകൾ പറയുന്നത്. സിദ്ദു മൂസേവാലയ്‌ക്ക് ഉണ്ടായിരുന്ന വിഐപി സുരക്ഷ പഞ്ചാബ് സര്‍ക്കാര്‍ പിന്‍വലിച്ചതിന് പിന്നാലെയായിരുന്നു 30 റൗണ്ട് വെടിയേറ്റ് ഗായകന്‍ കൊല്ലപ്പെട്ടത്.
