ലുധിയാന/ പഞ്ചാബ്: ലുധിയാനയിൽ പതിനൊന്ന് വയസുകാരി ആണ്‍കുഞ്ഞിന് ജന്മം നൽകിയ സംഭവത്തിൽ പ്രതിക്കെതിരെ തെരച്ചിൽ തുടർന്ന് പൊലീസ്. ലുധിയാനയിലെ മച്ചിവാഡ പട്ടണത്തിലാണ് കേസിനാസ്‌പദമായ സംഭവം. ഫാക്‌ടറിയിൽ ഒരുമിച്ച് ജോലിചെയ്യുകയായിരുന്ന യുവാവ് വിവാഹ വാഗ്‌ദാനം നൽകി പെണ്‍കുട്ടിയെ പീഡനത്തിനിരയാക്കുകയായിരുന്നു.
പീഡനത്തിനിരയായ പെണ്‍കുട്ടിയെ വിവാഹം കഴിക്കണമെന്ന ആവശ്യവുമായി വീട്ടുകാർ പ്രതിയെ സമീപിച്ചെങ്കിലും ഇയാൾ അതിന് കൂട്ടാക്കിയില്ല. തുടർന്ന് വീട്ടുകാർ ഈ സംഭവം തങ്ങളുടെ അയൽവാസിയോട് പറഞ്ഞു. പിന്നാലെ പെണ്‍കുട്ടിയെ അയൽവാസി കൂടെക്കൂട്ടി മാസങ്ങളോളം കൂടെനിർത്തി. എന്നാൽ അവിടെ അവർ പ്രതിക്കനുകൂലമായി പ്രവർത്തിച്ച് പെണ്‍കുട്ടിയെ തുടർന്നും പീഡനത്തിനിരയാക്കുകയായിരുന്നു.
തുടർന്ന് വീട്ടുകാർ പൊലീസിൽ പരാതിപ്പെടുകയായിരുന്നു. പൊലീസെത്തി പെണ്‍കുട്ടിയെ അയൽവാസിയിൽ നിന്ന് മോചിപ്പിച്ച് ആശുപത്രിയിൽ പ്രവേശിപ്പിക്കുകയും പെണ്‍കുട്ടി ഒരാണ്‍കുഞ്ഞിന് ജന്മം നൽകുകയും ചെയ്‌തു. എന്നാൽ കേസെടുത്തതറിഞ്ഞ് പ്രതി ഒളിവിൽ പോയി. പൊലീസ് ഇയാൾക്കായി തെരച്ചിൽ ആരംഭിച്ചിട്ടുണ്ട്.
