Spyware Attack: ಇಸ್ರೇಲಿ ಸ್ಪೈವೇರ್ ಕಂಪೆನಿ ಪ್ಯಾರಾಗಾನ್ ಹ್ಯಾಕಿಂಗ್ ತನ್ನ ಬಳಕೆದಾರರ ಮೇಲೆ ದಾಳಿ ಮಾಡಿದೆ ಎಂದು ವಾಟ್ಸ್‌ಆ್ಯಪ್ ಆರೋಪಿಸಿದೆ. ಇಸ್ರೇಲಿ ಕಂಪೆನಿಯು ತನ್ನ ಗ್ರಾಫೈಟ್ ಸ್ಪೈವೇರ್ ಮೂಲಕ ಪತ್ರಕರ್ತರು ಮತ್ತು ಇತರರನ್ನು ಗುರಿಯಾಗಿಸಿಕೊಂಡಿದೆ ಎಂದು ತಿಳಿಸಿದೆ.
ಮೆಟಾ ಮಾಲೀಕತ್ವದ ವಾಟ್ಸ್‌ಆ್ಯಪ್, ಇಸ್ರೇಲಿ ಸ್ಪೈವೇರ್ ಕಂಪೆನಿ ಪ್ಯಾರಗಾನ್ ಸೊಲ್ಯೂಷನ್ಸ್ ಹ್ಯಾಕಿಂಗ್ ಮಾಡಿದೆ ಎಂದು ದೂರಿದೆ. ಸ್ಪೈವೇರ್ ಗ್ರ್ಯಾಫೈಟ್ ಸಹಾಯದಿಂದ ಸುಮಾರು 24 ದೇಶಗಳ ನೂರಾರು ಪತ್ರಕರ್ತರು ಮತ್ತು ನಾಗರಿಕ ಸಮಾಜದ ಸದಸ್ಯರನ್ನು ಗುರಿಯಾಗಿಸಲಾಗಿದ್ದು, ಪ್ಯಾರಗನ್ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳುವ ಬಗ್ಗೆ ವಾಟ್ಸ್‌ಆ್ಯಪ್ ಹೇಳಿಕೆ ನೀಡಿದೆ.
ಇದು ಝಿರೋ-ಕ್ಲಿಕ್ ದಾಳಿ: ಪ್ಯಾರಾಗಾನ್ ಸೊಲ್ಯೂಷನ್ಸ್ ಕಚೇರಿ ಅಮೆರಿಕದ ವರ್ಜೀನಿಯಾದಲ್ಲಿದೆ. ಗ್ರ್ಯಾಫೈಟ್ ಸ್ಪೈವೇರ್ ಅತ್ಯಂತ ಅಪಾಯಕಾರಿ. ಇದನ್ನು ಬಲಿಪಶುವಿಗೆ ತಿಳಿಯದಂತೆ ಸಾಧನದಲ್ಲಿ ಅಳವಡಿಸಲಾಗುತ್ತದೆ. ಅಷ್ಟೇ ಅಲ್ಲ ಬಳಕೆದಾರರು ಯಾವುದೇ ಲಿಂಕ್ ಸೇರಿದಂತೆ ಇತ್ಯಾದಿಗಳನ್ನು ಕ್ಲಿಕ್ ಮಾಡುವ ಅಗತ್ಯವಿಲ್ಲ. ಈ ರೀತಿಯ ತಂತ್ರವನ್ನು ಝಿರೋ-ಕ್ಲಿಕ್ ದಾಳಿ ಎಂದು ಕರೆಯಲಾಗುತ್ತದೆ. ಒಮ್ಮೆ ನಿಮ್ಮ ಸಾಧನದಲ್ಲಿ ಈ ವೈರಸ್ ಅಳವಡಿಕೆ ನಂತರ ಹ್ಯಾಕರ್‌ಗಳು ನಿಮ್ಮ ಸಾಧನವನ್ನು ಸುಲಭವಾಗಿಯೇ ಆಪರೇಟ್ ಮಾಡುತ್ತಾರೆ. ನಂತರ ಹ್ಯಾಕರ್‌ಗಳು ತಮ್ಮ ಇಚ್ಛೆಯಂತೆ ಫೋನ್‌ನಿಂದ ಡೇಟಾ ಕದಿಯಬಹುದು. ಇದು ಹಲವು ಗಂಭೀರ ಆರೋಪಗಳನ್ನು ಎದುರಿಸುತ್ತಿರುವ NSO ಗ್ರೂಪ್‌ನ ಪೆಗಾಸಸ್ ಸ್ಪೈವೇರ್‌ನಂತೆ ಕಾರ್ಯನಿರ್ವಹಿಸುತ್ತದೆ ಎಂಬುದು ಗಮನಾರ್ಹ.
ಡಿಸೆಂಬರ್‌ನಲ್ಲಿ ದಾಳಿ: ಪತ್ರಕರ್ತ ಮತ್ತು ಇತರ ಬಲಿಪಶುಗಳನ್ನು ಯಾವಾಗಿನಿಂದಲೋ ಗುರಿಯಾಗಿಸಲಾಯಿತು ಎಂದು ವಾಟ್ಸ್‌ಆ್ಯಪ್ ಹೇಳಿಲ್ಲ. ಆದರೆ ದಾಳಿ ಡಿಸೆಂಬರ್‌ನಲ್ಲಿ ನಡೆದಿದೆ ಎಂದು ದೃಢಪಡಿಸಿದೆ. ಕಂಪೆನಿಯು ಈಗ ಪೀಡಿತ ಬಳಕೆದಾರರಿಗೆ ಸಹಾಯ ಮಾಡುವುದರ ಜೊತೆಗೆ ಭವಿಷ್ಯದಲ್ಲಿ ಇಂತಹ ಸ್ಪೈವೇರ್ ಅನ್ನು ತಪ್ಪಿಸಲು ತನ್ನ ಭದ್ರತೆಯನ್ನು ಬಲಪಡಿಸುತ್ತಿದೆ.
ದಾಳಿಕೋರರನ್ನು ಗುರುತಿಸಲು ಸಾಧ್ಯವಾಗಲಿಲ್ಲ: ಸ್ಪೈವೇರ್‌ನ ಹಿಂದಿರುವ ದಾಳಿಕೋರರನ್ನು ಇನ್ನೂ ಗುರುತಿಸಲಾಗಿಲ್ಲ. ಇತರ ಸ್ಪೈವೇರ್ ಕಂಪೆನಿಗಳಂತೆ ಪ್ಯಾರಾಗಾನ್ ತನ್ನ ಸಾಫ್ಟ್‌ವೇರ್ ಅನ್ನು ಸರ್ಕಾರಗಳಿಗೆ ಮಾರಾಟ ಮಾಡಿದರೂ, ಈ ದಾಳಿಗಳ ಹಿಂದೆ ಯಾರಿದ್ದಾರೆ ಎಂಬುದನ್ನು ಇನ್ನೂ ಗುರುತಿಸಲು ಸಾಧ್ಯವಾಗಿಲ್ಲ ಎಂದು ವಾಟ್ಸ್‌ಆ್ಯಪ್ ಹೇಳಿದೆ. ಮತ್ತೊಂದೆಡೆ, ಪ್ಯಾರಗಾನ್‌ಗೆ ಹತ್ತಿರವಿರುವ ಮೂಲಗಳು ಕಂಪನಿಯು ಸುಮಾರು 35 ಸರ್ಕಾರಿ ಗ್ರಾಹಕರನ್ನು ಹೊಂದಿದ್ದು, ಅವರೆಲ್ಲರೂ ಪ್ರಜಾಪ್ರಭುತ್ವ ರಾಷ್ಟ್ರಗಳಾಗಿವೆ ಎಂದು ಹೇಳುತ್ತವೆ. ಗ್ರೀಸ್, ಪೋಲೆಂಡ್, ಹಂಗೇರಿ, ಮೆಕ್ಸಿಕೊ ಮತ್ತು ಭಾರತದಂತಹ ದೇಶಗಳೊಂದಿಗೆ ಪ್ಯಾರಾಗಾನ್ ವ್ಯವಹಾರ ನಡೆಸುವುದಿಲ್ಲ. ಏಕೆಂದರೆ ಅವರು ಈ ಹಿಂದೆ ಪ್ಯಾರಗನ್ ವಿರುದ್ಧ ಆರೋಪಗಳನ್ನು ಮಾಡಿದ್ದಾರೆ ಎಂದು ವರದಿಯಾಗಿದೆ.
ಆರೋಪಗಳಿಗೆ ಸ್ಪಂದಿಸದ ಕಂಪೆನಿ: ಇಲ್ಲಿಯವರೆಗೆ, ಪ್ಯಾರಾಗಾನ್ ಸೊಲ್ಯೂಷನ್ಸ್ ಈ ಆರೋಪಗಳಿಗೆ ಪ್ರತಿಕ್ರಿಯಿಸಿಲ್ಲ. ಕೆನಡಾ ಮೂಲದ ಇಂಟರ್ನೆಟ್ ವಾಚ್ಡಾಗ್ ಸಿಟಿಜನ್ ಲ್ಯಾಬ್ ಪ್ರಕಾರ, ಕಂಪೆನಿಯು ರಾಷ್ಟ್ರೀಯ ಭದ್ರತೆ ಮತ್ತು ಅಪರಾಧ ತಡೆಗಟ್ಟುವಿಕೆಗಾಗಿ ಬಳಸಲಾಗುವ ಅಡ್ವಾನ್ಸ್ಡ್ ಸರ್ವೆಲೆನ್ಸ್ ಸಾಫ್ಟ್‌ವೇರ್ ಅನ್ನು ಸರ್ಕಾರಗಳಿಗೆ ಮಾರಾಟ ಮಾಡುತ್ತದೆ. ಆದರೆ ಪತ್ರಕರ್ತರು ಮತ್ತು ನಾಗರಿಕ ಸಮಾಜದ ಸದಸ್ಯರ ವಿರುದ್ಧ ಇಂತಹ ಸಾಧನಗಳ ಬಳಕೆಯು ಗಂಭೀರ ಕಳವಳಕಾರಿ ವಿಷಯವಾಗಿದೆ.
ಇದರಿಂದ ಬಚಾವ್ ಆಗುವುದು ಹೇಗೆ?: ವಾಟ್ಸ್‌ಆ್ಯಪ್ ಅನ್ನು ಆಗಾಗ್ಗೆ ಅಪ್ಡೇಟ್ ಮಾಡುತ್ತಲೇ ಇರಿ. ನೀವು ಅಪರಿಚಿತ ಸಂಖ್ಯೆಯಿಂದ ಲಿಂಕ್ ಅಥವಾ ಫೈಲ್ ಬಂದ್ರೆ ಅದಕ್ಕೆ ಪ್ರತಿಕ್ರಿಯಿಸಬೇಡಿ. ಆ ಸಂಖ್ಯೆಗಳನ್ನು ಬ್ಲಾಕ್ ಲಿಸ್ಟ್ ಹಾಕುವುದು ಸೂಕ್ತ. ಆಗಾಗ್ಗೆ ನಿಮ್ಮ ಫೋನ್‌ನ ಸೆಟ್ಟಿಂಗ್ಸ್ ಮತ್ತು ಅಪ್ಲಿಕೇಶನ್ ಅನುಮತಿಗಳನ್ನು ಪರಿಶೀಲಿಸುವುದು ಸೂಕ್ತ.
ಇದನ್ನೂ ಓದಿ: ಸ್ಮಾರ್ಟ್ಫೋನ್ ಗೀಳಿನಲ್ಲಿ ಯುವ ಪೀಳಿಗೆ, ದುರಾಲೋಚನೆಗೆ ದಾರಿ; ಇದನ್ನು ತಡೆಯುವುದು ಹೇಗೆ?
