Hyderabad Nexon EV Fire Case: ಟಾಟಾ ನೆಕ್ಸಾನ್ ಇವಿ ಸುಟ್ಟು ಹೋದ ಪ್ರಕರಣ ಸಂಬಂಧ ಟಾಟಾ ಮೋಟಾರ್ಸ್ಗೆ ಕೋರ್ಟ್‌ನಲ್ಲಿ ಹಿನ್ನಡೆಯಾಗಿದೆ. ಕಾರಿನ ಸಂಪೂರ್ಣ ಬೆಲೆಯನ್ನು ಮಾಲೀಕರಿಗೆ ಹಿಂದಿರುಗಿಸುವಂತೆ ಹೈದರಾಬಾದ್‌ನ ಗ್ರಾಹಕ ನ್ಯಾಯಾಲಯ ಆದೇಶಿಸಿದೆ.
ಪ್ರಕರಣವೇನು?: ಜೋನಾಥನ್ ಬ್ರೈನಾರ್ಡ್ ಎಂಬ ವ್ಯಕ್ತಿ 2022ರಲ್ಲಿ ಟಾಟಾ ಮೋಟಾರ್ಸ್‌ನ ಜನಪ್ರಿಯ ಮತ್ತು ಹೆಚ್ಚು ಮಾರಾಟವಾದ ಎಲೆಕ್ಟ್ರಿಕ್ ಕಾರು ಟಾಟಾ ನೆಕ್ಸಾನ್ ಖರೀದಿಸಿದ್ದರು. ಆದರೆ ಖರೀದಿಸಿದ ಕೆಲವು ತಿಂಗಳ ನಂತರ ಕಾರು ಚಲಿಸುತ್ತಿರುವಾಗಲೇ ದೊಡ್ಡ ಸ್ಫೋಟ ಸಂಭವಿಸಿ ಬೆಂಕಿ ಹೊತ್ತಿಕೊಂಡಿತ್ತು. ಆ ಸಮಯದಲ್ಲಿ ನಾನು ಕಾರನ್ನು ಗಂಟೆಗೆ 38 ಕಿಮೀ ವೇಗದಲ್ಲಿ ಅಂದ್ರೆ ಕಡಿಮೆ ವೇಗದಲ್ಲಿ ಓಡಿಸುತ್ತಿದ್ದೆ ಎಂದು ಬ್ರೈನಾರ್ಡ್ ನ್ಯಾಯಾಲಯಕ್ಕೆ ವಿವರಿಸಿದ್ದರು.
ಜೂನ್ 1, 2023ರಂದು ನಡೆದ ಈ ಘಟನೆಯಲ್ಲಿ, ಕಾರು ಬೆಂಕಿಯಿಂದ ಸಂಪೂರ್ಣ ಸುಟ್ಟುಹೋಗಿತ್ತು. ಕಾರಿಗೆ ಬೆಂಕಿ ಹೊತ್ತಿಕೊಳ್ಳುತ್ತಿದ್ದಂತೆ ಬ್ರೈನ್ಡ್ ಕೂಡಲೇ ಇಳಿದು ತಮ್ಮ ಪ್ರಾಣ ಉಳಿಸಿಕೊಂಡಿದ್ದರು. ಬೆಂಕಿ ವೇಗವಾಗಿ ಹರಡುತ್ತಿದ್ದಂತೆ ಕಾರಿನ ಬಾಗಿಲುಗಳು ಜಾಮ್ ಆಗಿದ್ದವು. ಅಷ್ಟರಲ್ಲಿ ಪಕ್ಕದ ಬಾಗಿಲಿನಿಂದ ಹೊರಬಂದು ಪ್ರಾಣ ಉಳಿಸಿಕೊಂಡೆ ಎಂದು ಕೋರ್ಟ್ಗೆ ತಿಳಿಸಿದರು.
ಕಾರಿಗೆ ಬೆಂಕಿ ಹೊತ್ತಿಕೊಂಡಿದ್ದ ವಿಡಿಯೋ ಕೂಡ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿತ್ತು. ಈ ಘಟನೆಯ ನಂತರ ಬ್ರೈನಾರ್ಡ್ ಗ್ರಾಹಕ ನ್ಯಾಯಾಲಯದಲ್ಲಿ ಟಾಟಾ ಮೋಟಾರ್ಸ್ ವಿರುದ್ಧ ಪ್ರಕರಣ ದಾಖಲಿಸಿದ್ದರು. ತಾಂತ್ರಿಕ ದೋಷದಿಂದ ಘಟನೆ ನಡೆದಿದೆ ಎಂದು ದೂರಿನ ಉಲ್ಲೇಖಿಸಿದ್ದರು.
ಕಾರಿನ ಬ್ಯಾಟರಿ ಬೇಗನೆ ಡಿಸ್ಚಾರ್ಜ್ ಆಗುತ್ತಿದೆ ಎಂದು ಬ್ರೈನಾರ್ಡ್ ತಮ್ಮ ದೂರಿನಲ್ಲಿ ತಿಳಿಸಿದ್ದಾರೆ. ಶೇ 18ರಷ್ಟು ಚಾರ್ಜ್ ಮಾಡಿದ ನಂತರವೂ ಕಾರು ಸ್ಟಾರ್ಟ್ ಆಗುವುದಿಲ್ಲ. ಸರ್ವಿಸ್ ಸೆಂಟರ್ನಲ್ಲಿ ಮೆಕ್ಯಾನಿಕ್ ಬಳಿ ತೋರಿಸಿದಾಗ ಕಾರಿನ ಹೆಚ್ವಿ ಬ್ಯಾಟರಿ ಕೆಟ್ಟು ಹೋಗಿದೆ ಎಂದು ಹೇಳಿದರು. ಆದರೆ ಕಾರಿನಲ್ಲಿ ಹೊಸ ಬ್ಯಾಟರಿಯ ಬದಲು ಹಳೆಯ ಬ್ಯಾಟರಿಯನ್ನು ಅಳವಡಿಸಲಾಗಿದೆ ಎಂದು ಮಾಲೀಕರು ಆರೋಪಿಸಿದ್ದಾರೆ.
16.95 ಲಕ್ಷ ರೂ ಮರುಪಾವತಿಗೆ ಕೋರ್ಟ್ ಆದೇಶ: ಪ್ರಕರಣದ ವಿಚಾರಣೆ ನಡೆಸಿದ ಹೈದರಾಬಾದ್‌ನ ಗ್ರಾಹಕ ನ್ಯಾಯಾಲಯ, ಕಾರಿನ ಸಂಪೂರ್ಣ ಬೆಲೆಯನ್ನು ಅಂದರೆ 16.95 ಲಕ್ಷ ರೂಪಾಯಿಯನ್ನು ನೀಡುವಂತೆ ಟಾಟಾ ಮೋಟಾರ್ಸ್ಗೆ ಆದೇಶಿಸಿದೆ.
