BSNL 3G Services: ಭಾರತ್ ಸಂಚಾರ್ ನಿಗಮ್ ಲಿಮಿಟೆಡ್ (BSNL) ತನ್ನ ಸೇವೆಗಳ ಪೈಕಿ ಒಂದನ್ನು ಬಂದ್ ಮಾಡುತ್ತಿದೆ. ಇದು ಲಕ್ಷಾಂತರ ಗ್ರಾಹಕರ ಮೇಲೆ ಪರಿಣಾಮ ಬೀರಲಿದೆ. ಸರ್ಕಾರಿ ಟೆಲಿಕಾಂ ಕಂಪನಿ ಬಿಹಾರದ ರಾಜಧಾನಿ ಪಾಟ್ನಾ ಸೇರಿದಂತೆ ಹಲವು ಜಿಲ್ಲೆಗಳಲ್ಲಿ ತನ್ನ 3G ಸೇವೆ ನಿಲ್ಲಿಸುತ್ತಿದೆ. ಮೊದಲ ಹಂತದಲ್ಲಿ ಮೋತಿಹಾರಿ, ಕತಿಹಾರ್, ಖಗರಿಯಾ ಮತ್ತು ಮುಂಗೇರ್ ಮುಂತಾದ ಜಿಲ್ಲೆಗಳಲ್ಲಿ 3ಜಿ ನಿಲ್ಲಿಸಿತ್ತು. ಜನವರಿ 15ರಿಂದ ಪಾಟ್ನಾ ಮತ್ತು ಇತರ ಜಿಲ್ಲೆಗಳಲ್ಲೂ ಈ ಸೇವೆಯನ್ನು ನಿಲ್ಲಿಸಲಾಗುತ್ತದೆ.
3G ಸೇವೆಯನ್ನು ಬಂದ್ ಮಾಡುವುದು 3G ಸಿಮ್‌ಗಳನ್ನು ಹೊಂದಿರುವ ಗ್ರಾಹಕರ ಮೇಲೆ ಪರಿಣಾಮ ಬೀರುತ್ತದೆ. ಸೇವೆ ನಿಲ್ಲಿಸಿದ ನಂತರ ಅವರು ತಮ್ಮ ಮೊಬೈಲ್‌ನಲ್ಲಿ ಇಂಟರ್ನೆಟ್ ಡೇಟಾ ಆನಂದಿಸಲು ಸಾಧ್ಯವಾಗುವುದಿಲ್ಲ. ಕರೆಗಳು ಮತ್ತು SMS ಮಾಡಲು ಮಾತ್ರ ಸಾಧ್ಯವಾಗುತ್ತದೆ. ರಾಜ್ಯದಲ್ಲಿ 4ಜಿ ನೆಟ್‌ವರ್ಕ್ ಅಪ್ಡೇಟ್ ಮಾಡಲಾಗಿದೆ ಎಂದು ಬಿಎಸ್ಎನ್ಎಲ್ ಅಧಿಕಾರಿಗಳು ತಿಳಿಸಿದ್ದಾರೆ. ಹೀಗಾಗಿ 3ಜಿ ಸೇವೆಯನ್ನು ನಿಲ್ಲಿಸಲಾಗುತ್ತಿದೆ. ಈ ವರ್ಷ ದೇಶಾದ್ಯಂತ 4G ನೆಟ್‌ವರ್ಕ್ ಅಪ್‌ಗ್ರೇಡ್ ಮಾಡುವ ಮತ್ತು 5G ಸೇವೆಗಳನ್ನು ಪ್ರಾರಂಭಿಸುವ ಯೋಜನೆಗಳೊಂದಿಗೆ ಕಂಪನಿ ಮುಂದುವರಿಯುತ್ತಿದೆ.
ರಾಜ್ಯದ ವಿವಿಧ ಜಿಲ್ಲೆಗಳಲ್ಲಿ 4G ನೆಟ್‌ವರ್ಕ್ ಅನ್ನು ಸಂಪೂರ್ಣವಾಗಿ ಅಪ್ಡೇಟ್ ಮಾಡಲಾಗಿದೆ. ಅದಕ್ಕಾಗಿಯೇ ಸುಮಾರು ಅನೇಕ ಜಿಲ್ಲೆಗಳಲ್ಲಿ 3 ಜಿ ಡೇಟಾ ಸೌಲಭ್ಯವನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸಲಾಗಿದೆ. ಉಳಿದ ಪ್ರದೇಶಗಳಲ್ಲಿ ಜನವರಿ 15ರಿಂದ ಸ್ಥಗಿತಗೊಳಿಸಲಾಗುತ್ತಿದೆ ಎಂದು ಬಿಎಸ್ಎನ್ಎಲ್ ಮುಖ್ಯ ಜನರಲ್ ಮ್ಯಾನೇಜರ್ ಆರ್‌ಕೆ ಚೌಧರಿ ಹೇಳುವಂತೆ ಹಲವಾರು ಮಾಧ್ಯಮ ವರದಿಗಳು ಉಲ್ಲೇಖಿಸಿವೆ.
ಈಗಿರುವ 3G ಸಿಮ್ ಏನಾಗುತ್ತದೆ?: 3G ಸಿಮ್ ಬಳಕೆದಾರರು ಡೇಟಾ ಆನಂದಿಸಲು ಬಯಸಿದರೆ, ಅವರು ಸಿಮ್ ಬದಲಾಯಿಸಬೇಕಾಗುತ್ತದೆ. ಕಂಪನಿ ಯಾವುದೇ ವೆಚ್ಚವಿಲ್ಲದೆ 3G ಸಿಮ್ ಬದಲಿಗೆ 4G ಸಿಮ್ ನೀಡುತ್ತಿದೆ. ಭವಿಷ್ಯದಲ್ಲಿ ಈ ಸಿಮ್‌ನಲ್ಲಿ 5G ಡೇಟಾ ಕಾರ್ಯನಿರ್ವಹಿಸುತ್ತದೆ. BSNL ಕಚೇರಿಗೆ ಭೇಟಿ ನೀಡುವ ಮೂಲಕ ಬಳಕೆದಾರರು ತಮ್ಮ ಸಿಮ್ ಬದಲಾಯಿಸಬಹುದು. ಇದಕ್ಕಾಗಿ ಅವರು ಗುರುತಿನ ಚೀಟಿಯನ್ನು ತಮ್ಮೊಂದಿಗೆ ಕೊಂಡೊಯ್ಯಬೇಕಾಗುತ್ತದೆ. ಕಂಪನಿ ದೇಶದ ಇತರ ಹಲವು ಭಾಗಗಳಲ್ಲಿ ತನ್ನ 3G ಸೇವೆಯನ್ನು ನಿಲ್ಲಿಸಿದೆ.
ಹೆಚ್ಚಿದ BSNL ಗ್ರಾಹಕರ ಸಂಖ್ಯೆ: ಇತ್ತೀಚಿನ ದಿನಗಳಲ್ಲಿ ಸರ್ಕಾರಿ ಟೆಲಿಕಾಂ ಕಂಪನಿಯ ಗ್ರಾಹಕರ ಸಂಖ್ಯೆ ಹೆಚ್ಚಾಗುತ್ತಿದೆ. ಇದಕ್ಕೆ ಕಾರಣ ಖಾಸಗಿ ಟೆಲಿಕಾಂ ಕಂಪನಿಗಳ ದುಬಾರಿ ರೀಚಾರ್ಜ್ ಯೋಜನೆಗಳು. ಖಾಸಗಿ ಕಂಪನಿಗಳು ತಮ್ಮ ರೀಚಾರ್ಜ್ ಯೋಜನೆಗಳ ಬೆಲೆಯನ್ನು ಹಲವು ಬಾರಿ ಹೆಚ್ಚಿಸಿವೆ. ಇದರಿಂದ ತೊಂದರೆಗೀಡಾದ ಗ್ರಾಹಕರು ಬಿಎಸ್ಎಲ್ಎನ್ ಸೇವೆಗಳನ್ನು ಆಯ್ಕೆ ಮಾಡಿಕೊಳ್ಳುತ್ತಿದ್ದಾರೆ.
ಇದನ್ನೂ ಓದಿ: ಹೊಸ ಪ್ಲಾನ್ ಪರಿಚಯಿಸಿದ ಬಿಎಸ್ಎನ್ಎಲ್; ಪ್ರತಿದಿನ 3 ಜಿಬಿ ಡೇಟಾ ಜೊತೆ ಇಷ್ಟೊಂದು ಆಫರ್!
