ಅಂತಾರಾಜ್ಯ ವನ್ಯಜೀವಿ ಅವಶೇಷಗಳ ಕಳ್ಳಸಾಗಾಣೆದಾರರ ಬಂಧನ‌: ನಗರ ಪೊಲೀಸ್​ ಆಯುಕ್ತ ದಯಾನಂದ ಮಾಹಿತಿ

ಜಿಂಕೆ ಕೊಂಬು ಹಾಗೂ ತಲೆಗಳ ಮಾರಾಟಕ್ಕೆ ಯತ್ನಿಸುತ್ತಿದ್ದ ಇಬ್ಬರು ಅಂತಾರಾಜ್ಯ ಕಳ್ಳಸಾಗಣೆದಾರರನ್ನು ಬಂಧಿಸಲಾಗಿದೆ ಎಂದು ನಗರ ಪೊಲೀಸ್ ಆಯುಕ್ತ ಬಿ ದಯಾನಂದ್ ತಿಳಿಸಿದರು.

ಬೆಂಗಳೂರು : ಜಿಂಕೆ ಕೊಂಬು ಹಾಗೂ ತಲೆಗಳ ಮಾರಾಟಕ್ಕೆ ಯತ್ನಿಸುತ್ತಿದ್ದ ಅಂತಾರಾಜ್ಯ ಕಳ್ಳಸಾಗಣೆದಾರರನ್ನ ಕಾಡುಗೋಡಿ ಠಾಣಾ ಪೊಲೀಸರು ಬಂಧಿಸಿದ್ದಾರೆ. ಫಣಿಂದರ್ ಹಾಗೂ ರೆಹಮತುಲ್ಲಾ ಎಂಬುವವರು ಬಂಧಿತ ಆರೋಪಿಗಳು ಎಂದು ತಿಳಿದುಬಂದಿದೆ.

ಈ ಬಗ್ಗೆ ನಗರ ಪೊಲೀಸ್ ಆಯುಕ್ತ ಬಿ ದಯಾನಂದ್ ಅವರು ಮಾತನಾಡಿದ್ದು, ಜಿಂಕೆಗಳನ್ನು ಭೇಟೆಯಾಡಿ ಆ ಜಿಂಕೆ ಕೊಂಬುಗಳನ್ನ ಮಾರಾಟ ಮಾಡಲು ಪ್ರಯತ್ನ ಮಾಡಿರುವಂತಹ ಅಂತಾರಾಜ್ಯ ಆರೋಪಿಗಳನ್ನು ಬಂಧಿಸುವಲ್ಲಿ ಕಾಡುಗೋಡಿ ಠಾಣೆಯ ಪೊಲೀಸರು ಯಶಸ್ವಿಯಾಗಿದ್ದಾರೆ. ಇದು ಮಂಗಳವಾರ ನಡೆದಿರುವ ಕಾರ್ಯಾಚರಣೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಇಬ್ಬರು ಆರೋಪಿಗಳನ್ನು ಬಂಧಿಸಿರುವ ಪೊಲೀಸರು, ಅವರಿಂದ ಒಟ್ಟು 33 ಜಿಂಕೆ ಕೊಂಬುಗಳನ್ನು ವಶಪಡಿಸಿಕೊಂಡಿದ್ದಾರೆ.

ಇದರಲ್ಲಿ 33 ಜಿಂಕೆಗಳಲ್ಲಿ ತಲೆಬುರುಡೆಗಳಿಲ್ಲ. ಉಳಿದಂತೆ 6 ಜಿಂಕೆಗಳಿಗೆ ತಲೆಬುರುಡೆ ಇದೆ. ಒಟ್ಟು ಇದೇ ರೀತಿಯ 33 ವನ್ಯಜೀವಿಯ ಕೊಂಬುಗಳನ್ನು ವಶಪಡಿಸಿಕೊಂಡಿದ್ದಾರೆ. ಆಂಧ್ರಪ್ರದೇಶದಿಂದ ಖಾಸಗಿ ಬಸ್ ಮೂಲಕ ವನ್ಯ ಜೀವಿ ಕೊಂಬುಗಳನ್ನು ತಂದಿದ್ದ ಆರೋಪಿಗಳು, ಮೈಸೂರಿನಲ್ಲಿ 40-50 ಸಾವಿರ ರೂಪಾಯಿಗೆ ಮಾರಾಟ ಮಾಡಲು ಸಿದ್ಧತೆ ಮಾಡಿಕೊಂಡಿದ್ದರು ಎಂದು ಮಾಹಿತಿ ನೀಡಿದ್ದಾರೆ.

ಇದನ್ನೂ ಓದಿ : ಬೆಂಗಳೂರು: ಎರಡು ತಲೆಯ 2 ಹಾವು, 12 ಜಿಂಕೆ ಕೊಂಬು, ಆನೆ ದಂತಗಳು ವಶ.. ಐವರ ಬಂಧನ