ಬೆಂಗಳೂರು: ನರೇಂದ್ರ ಮೋದಿ, ಅಮಿತ್ ಶಾರವರೇ ಇಡಿ ಮೂಲಕ ಎಲ್ಲವನ್ನೂ ಮಾಡಿಸುತ್ತಿದ್ದಾರೆ ಎಂದು ಸಚಿವ ದಿನೇಶ್ ಗುಂಡೂರಾವ್ ವಾಗ್ದಾಳಿ ನಡೆಸಿದರು. ವಿಧಾನಸೌಧದಲ್ಲಿ ಮಾತನಾಡಿದ ಅವರು, ಇಡಿ ವಿರುದ್ಧ ಪ್ರಕರಣಕ್ಕೆ ಕೋರ್ಟ್ ಸ್ಟೇ ಕೊಡುವುದು ಬೇರೆ ವಿಚಾರ. ಆದರೆ, ರಾಜ್ಯಕ್ಕೆ ಇಡಿ ಬಂದಿರುವ ಉದ್ದೇಶವೇನು. ಕಾಂಗ್ರೆಸ್ ಸರ್ಕಾರವನ್ನು ರಾಜ್ಯದಲ್ಲಿ ತೆಗೆಯಬೇಕು. ನಮ್ಮ ಮುಖ್ಯಮಂತ್ರಿಗಳನ್ನು ಅರೆಸ್ಟ್ ಮಾಡಿಸಬೇಕು ಅನ್ನೋದು ಅವರ ಉದ್ದೇಶ. ಸಂಪೂರ್ಣ ದೇಶದಲ್ಲೇ ಇಡಿ ಇದೇ ರೀತಿ ಕೆಲಸ ಮಾಡ್ತಾ ಇದೆ. ಇಡಿ ಬಿಜೆಪಿ ಅಂಗ ಸಂಸ್ಥೆಯಾಗಿ ಕೆಲಸ ಮಾಡ್ತೀರೋದು ಜಗತ್ತಿಗೆ ತಿಳಿದಿರುವ ವಿಚಾರ ಎಂದು ಆರೋಪಿಸಿದರು.
ಆದರೆ, ಕರ್ನಾಟಕದಲ್ಲಿ ಅದು ಸಾಧ್ಯವಿಲ್ಲ ಅನ್ನೋದನ್ನು ನಾವು ಸಾಬೀತು ಮಾಡಬೇಕಿದೆ. ಆ ಮೂಲಕ ದೇಶಕ್ಕೆ ಮೆಸೇಜ್ ಪಾಸ್ ಮಾಡ ಬೇಕಿದೆ. ದೂರು ಕೊಟ್ಟಿರುವ ಆ ಅಧಿಕಾರಿ ಯಾರೋ ಏನೋ ನಮಗೆ ಗೊತ್ತಿಲ್ಲ. ಅಧಿಕಾರಿ ದೂರು ಕೊಡದಿದ್ರೂ, ನಮ್ಮ ಹತ್ತಿರ ಮಾಹಿತಿ ಇದೆ. ಯಾರನ್ನೆಲ್ಲ ಇಡಿ ಅವರು ಕರೆಸಿಕೊಂಡಿದ್ದಾರೋ ಅವರೆಲ್ಲರ ಮೇಲೆ ಒತ್ತಡ ತರಲಾಗ್ತಿದೆ. ಸಿಎಂ ಹೆಸರು ಹೇಳಿ, ಸಚಿವರ ಹೆಸರು ಹೇಳಿ ಅಂತ ಒತ್ತಡ ಹಾಕುತ್ತಿದ್ದಾರೆ. ನಾನೇನು ನಾಗೇಂದ್ರ ಅವರ ವಕಾಲತ್ತು ವಹಿಸುತ್ತಿಲ್ಲ ಎಂದು ಕಿಡಿಕಾರಿದರು.
ಎಸ್ಐಟಿ, ಸಿಬಿಐ ಬಿ.ನಾಗೇಂದ್ರ ಅವರ ಮೇಲೆ ಯಾವುದೇ ಎಫ್ಐಆರ್ ಹಾಕಿಲ್ಲ. ಆದರೆ, ಯಾವುದೇ ಜಾರ್ಜ್ಶೀಟ್ ಇಲ್ಲದೇ ಇಡಿ ಅವರನ್ನು ಅರೆಸ್ಟ್ ಮಾಡಿ ಒಳಗೆ ಹಾಕಿಕೊಂಡಿದ್ದಾರೆ. ದೇಶದಲ್ಲಿ ಇಡಿ ಉಪಯೋಗಿಸಿ ಕೊಂಡು ಯಾರನ್ನಾದರೂ ಮುಗಿಸುವ ತಂತ್ರಕ್ಕೆ ಬಿಜೆಪಿ ಮೊರೆಹೋಗಿದೆ. ಇದೆಲ್ಲ ಮೊದಲೇ ಫಿಕ್ಸ್ ಆಗಿರೋ ಸಂಚು. ಇಡಿ ಅವರಿಂದ ಸಿಎಂಗೆ ನೋಟಿಸ್ ಕೊಡಿಸೋದು. ಬನ್ನಿ ತನಿಖೆಗೆ ಅಂತ ಕರೆದು ಅರೆಸ್ಟ್ ಮಾಡಿಸೋದು. ಆಮೇಲೆ ಮುಖ್ಯಮಂತ್ರಿಗಳ ರಾಜೀನಾಮೆಗೆ ಒತ್ತಾಯಿಸೋದು. ಇದೆಲ್ಲವನ್ನೂ ವ್ಯವಸ್ಥಿತವಾಗಿ ಮಾಡಿಸುತ್ತಿದ್ದಾರೆ ಎಂದು ವಾಗ್ದಾಳಿ ನಡೆಸಿದರು.
ರಾಜ್ಯದಲ್ಲಿ 3,300 ಡೆಂಘೀ ಆ್ಯಕ್ಟೀವ್ ಪ್ರಕರಣ: ಡೆಂಘೀ ವಿಚಾರವಾಗಿ ಹಲವು ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ. ಡೆಂಘೀಯನ್ನು ನಿಯಂತ್ರಣ ಮಾಡುವ ಕೆಲಸ ನಡೆಯುತ್ತಿದೆ. ರಾಜ್ಯದಲ್ಲಿ 3,300 ಡೆಂಘೀ ಆ್ಯಕ್ಟೀವ್ ಪ್ರಕರಣಗಳು ಇವೆ. 600 ಜನರು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಉಳಿದವರು ಮನೆಯಲ್ಲೆ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಇದುವರೆಗೂ ರಾಜ್ಯದಲ್ಲಿ ಡೆಂಘೀಯಿಂದ 10 ಜನ ಸಾವನ್ನಪ್ಪಿದ್ದಾರೆ. ಇದು ಬಹಳ ನೋವಿನ ಸಂಗತಿ ಎಂದರು.
ಆಸ್ಪತ್ರೆಯಲ್ಲಿ ಎಲ್ಲಾ ರೀತಿ ಚಿಕಿತ್ಸೆಗಳಿಗೆ ಬೇಕಾದ ಔಷಧಿಗಳನ್ನು ಪೂರೈಕೆ ಮಾಡಲಾಗಿದೆ. ಜನರಿಗೆ ಜಾಗೃತಿ ಮೂಡಿಸುವ ಕೆಲಸ ನಡೆಯುತ್ತಿದೆ. ಇನ್ನು ಎರಡು ಮೂರು ತಿಂಗಳು ಜನರು ಜಾಗೃತಿಯಿಂದ ಇರುವ ಅವಶ್ಯಕತೆ ಇದೆ. ನಮ್ಮ ಜೊತೆಗೆ ಬಹಳ ಸಂಘ ಸಂಸ್ಥೆಗಳು ಡೆಂಘೀ ಜಾಗೃತಿಗೆ ಕೈ ಜೋಡಿಸಿದ್ದಾರೆ. ಇದು ಇನ್ನೂ ಪೀಕ್ ಗೆ ಹೋಗುತ್ತೆ ಅಂತ ನಾನು ಹೇಳೋದಿಲ್ಲ. ಮುಂದೆ ಕಡಿಮೆ ಆಗುತ್ತದೆ. ಏಕೆಂದರೆ ಎಲ್ಲ ಕಡೆ ಮಳೆ ಜೋರಾಗಿ ಬರ್ತಾ ಇದೆ. ಆದರೆ, ಸೆಪ್ಟೆಂಬರ್ ಅಕ್ಟೋಬರ್ ವರೆಗೂ ನಾವು ಜಾಗೃತರಾಗಿರಬೇಕು. ಡೆಂಘೀ ನೋಟಿಫೈಡ್ ಡಿಸೀಸ್ ಎಂದು ನಾವು ಹೇಳಿದ್ದೇವೆ. ಕೇಸ್ ಗಳ ಬಗ್ಗೆ ಎಲ್ಲ ಆಸ್ಪತ್ರೆ ಅವರು ನಮಗೆ ಗಮನಕ್ಕೆ ತರಬೇಕು. ಟೆಸ್ಟಿಂಗ್ ಗೆ ದರ ನಿಗದಿ ಮಾಡಿದ್ದೇವೆ ಎಂದರು.
