ಧಾರವಾಡ: ನನಗೆ ಧಾರವಾಡ ಹೈಕೋರ್ಟ್ ಪೀಠದ ಜೊತೆ ಸಂಬಂಧವಿದೆ. ನಾನು ಇಲ್ಲಿ ಪ್ರಕರಣವೊಂದರಲ್ಲಿ ವಾದ ಮಾಡಿದ್ದೆ ಎಂದು ಉಪ ರಾಷ್ಟ್ರಪತಿ ಜಗದೀಪ ಧನಕರ ಹೇಳಿದರು.
ಧಾರವಾಡ ಐಐಟಿಯಲ್ಲಿ ಜ್ಞಾನ ಸಂಪನ್ಮೂಲ ದತ್ತಾಂಶ ಕೇಂದ್ರ, ಸೆಂಟ್ರಲ್ ಲರ್ನಿಂಗ್ ಥಿಯೇಟರ್, ಹಾಗು ಎರಡು ಪ್ರವೇಶದ್ವಾರ ಉದ್ಘಾಟಿಸಿ ಮಾತನಾಡಿದ ಅವರು, ಧಾರವಾಡದ ಜೊತೆ ನನಗೆ ಹಳೆ ಸಂಬಂಧವಿದೆ ಎಂದರು. ಇದೇ ವೇಳೆ ಧಾರವಾಡ ಪೇಡಾ ನೆನಪಿಸಿಕೊಂಡರು.
ನಾನು ರಾಜ್ಯಸಭೆಯ ಸಭಾಪತಿ. ಬಲಗಡೆ ನೋಡಿದರೆ ಪ್ರಲ್ಹಾದ ಜೋಶಿ ಕಾಣ್ತಾರೆ. ಎಡಗಡೆ ನೋಡಿದರೆ ಮಲ್ಲಿಕಾರ್ಜುನ ಖರ್ಗೆ ಕಾಣ್ತಾರೆ. ಮಲ್ಲಿಕಾರ್ಜುನ ಖರ್ಗೆ ಬಹಳ ಅನುಭವಿ ರಾಜಕಾರಣಿ. ಜೋಶಿಯವರು ಬಹಳ ಅಚ್ಚುಕಟ್ಟಿನ ಕೆಲಸ ಮಾಡ್ತಾರೆ ಎಂದು ಹೊಗಳಿದರು.
ಸಭಾಪತಿ ಹೊರಟ್ಟಿ ಬಗ್ಗೆ ಮಾತನಾಡಿದ ಉಪರಾಷ್ಟ್ರಪತಿ, ಬಹಳ ಸಿಂಪಲ್ ಮನುಷ್ಯ ಎಂದರು. ವಿದ್ಯಾರ್ಥಿಗಳಿಂದಲೇ ದೇಶದ ಬದಲಾವಣೆ ಆಗಬೇಕಿದೆ. ದೇಶದ ಐಐಟಿಗಳಲ್ಲಿ ಯುವಕರು ಕಲಿಯುತ್ತಿದ್ದಾರೆ. ಕರ್ನಾಟಕ ರಾಜ್ಯದ ಮೊದಲ ಐಐಟಿ ಇದು. ಇಡೀ ವಿಶ್ವದಲ್ಲೇ ಧಾರವಾಡದ ಐಐಟಿ ಉತ್ತುಂಗಕ್ಕೇರಲಿದೆ. ಹಳೆ ವಿದ್ಯಾರ್ಥಿಗಳು ಐಐಟಿ ಜೊತೆ ಸಂಬಂಧ ಇಟ್ಟುಕೊಳ್ಳಬೇಕು. ಈಗ ಏನಿದ್ದರೂ ಮೆರಿಟ್ ಮೇಲೆ ಎಲ್ಲವೂ ನಡೆದಿದೆ. ಇದು ಇದೀಗ ನಡೆದಿರುವ ಬದಲಾವಣೆ ನಿಮಗೆ ಸ್ವಂತ ಅಲೋಚನೆ ಬೇಕು. ನಿಮಗೆ ಬೆಳೆಯಲು ಸ್ವಂತ ಶಕ್ತಿ ಬೇಕು. ದೇಶಕ್ಕೆ ಇದು ಅಮೃತಕಾಲ. ಇದೀಗ ಎಲ್ಲೆಡೆ ಮಹಿಳಾ ಶಕ್ತಿ ಹೆಚ್ಚಾಗಿದೆ. ಲೋಕಸಭೆಯಲ್ಲಿ ಶೇ.33ರಷ್ಟು ಮಹಿಳೆಯರಿಗೆ ಅವಕಾಶ ಸಿಕ್ಕಿದೆ. 2029ಕ್ಕೆ ಶೇ.33ರಷ್ಟು ಸಂಸದರು ಮಹಿಳೆಯರಿರುತ್ತಾರೆ ಎಂದು ತಿಳಿಸಿದರು.
ಯುವಕರೇ ಸೋಲೇ ಗೆಲುವಿನ ಸೋಪಾನ ಅನ್ನೋದನ್ನು ಅರ್ಥೈಸಿಕೊಳ್ಳಿ. ಚಂದ್ರಯಾನ 2ರಲ್ಲಿ ನಾವು ಕೊನೆ ಹಂತದಲ್ಲಿ ಸೋತೆವು. ಕೊನೆ ಹಂತದಲ್ಲಿ ಸಾಫ್ಟ್ ಲ್ಯಾಂಡಿಂಗ್ ಇರಲಿಲ್ಲ. ನಾವು ಶೇ.90ರಷ್ಟು ಯಶಸ್ವಿಯಾಗಿದ್ದೇವೆ ಎಂದು ಎಂದು ಮೋದಿ ಹೇಳಿದ್ದರು. ಚಂದ್ರಯಾನ 3 ಯಶಸ್ವಿಯಾಯಿತು ಎಂದರು.
ಇದು ಕೇವಲ ನಮ್ಮ ದೇಶದಿಂದ ಸಾಧ್ಯವಾಯಿತು. ನಮ್ಮ ದೇಶ ವಿಕ್ರಾಂತ್ ತಯಾರಿಸಿದೆ. ಹೆಲಿಕಾಪ್ಟರ್‌ಗಳನ್ನು ಕೂಡಾ ತಯಾರಿಸುತ್ತಿದೆ. ಇದೀಗ ಬಹಳ ಬದಲಾವಣೆ ಆಗಿದೆ. ಇಸ್ರೋ ಬೇರೆ ದೇಶಗಳ ಉಪಗ್ರಹ ಉಡಾಯಿಸುತ್ತಿದೆ. ಭಾರತೀಯತೆಯೇ ನಮ್ಮ ಗುರುತು ಅನ್ನೋದನ್ನು ಮರೆಯಬಾರದು ಎಂದರು.
ಕೇಂದ್ರ ಸಚಿವ ಪ್ರಲ್ಹಾದ ಜೋಶಿ ಮಾತನಾಡಿ, ಪ್ರಧಾನಿ ಮೋದಿ ಅವರು ಈ ಐಐಟಿ ಉದ್ಘಾಟನೆ ಮಾಡಿದ್ದರು. 23 ಐಐಟಿಗಳಲ್ಲಿ ಧಾರವಾಡ ಐಐಟಿ ಕೂಡಾ ಒಂದು. ಮೋದಿ ಅಧಿಕಾರಕ್ಕೆ ಬಂದ ನಂತರ 7 ಐಐಟಿಗಳನ್ನು ಕೊಟ್ಟಿದ್ದಾರೆ ಎಂದು ಹೇಳಿದರು.
ಇದನ್ನೂ ಓದಿ: ರಾಜ್ಯಾದ್ಯಂತ ದ್ವಿತೀಯ ಪಿಯುಸಿ ಕನ್ನಡ ಪರೀಕ್ಷೆ ಯಶಸ್ವಿ
