ಬೆಂಗಳೂರು: ನನಗೆ ಚನ್ನಪಟ್ಟಣ ಒಂದೇ ಕ್ಷೇತ್ರದಲ್ಲಿ ಜನರು 10,000 ಅಹವಾಲು ಅರ್ಜಿಗಳನ್ನು ಕೊಟ್ಟಿದ್ದಾರೆ. ಅಂದರೆ, ಹೆಚ್.ಡಿ.ಕುಮಾರಸ್ವಾಮಿ ಕೆಲಸ ಮಾಡಿಲ್ಲ ಎಂಬುದಕ್ಕೆ ಇದಕ್ಕಿಂತ ದೊಡ್ಡ ಸಾಕ್ಷಿ ಬೇಕಾ ಎಂದು ಕೆಪಿಸಿಸಿ ಅಧ್ಯಕ್ಷ, ಉಪಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ತಿರುಗೇಟು ನೀಡಿದರು.
ರಾಜ್ಯ ಸರ್ಕಾರ ಏನು ಕೆಲಸ ಮಾಡುತ್ತಿಲ್ಲ ಮತ್ತು ಅದಕ್ಕಾಗಿ ನನಗೆ 3 ಸಾವಿರ ಅಹವಾಲು ಅರ್ಜಿಗಳು ಬಂದಿದೆ ಎಂಬ ಕೇಂದ್ರ ಸಚಿವ ಹೆಚ್.ಡಿ.ಕುಮಾರಸ್ವಾಮಿ ಹೇಳಿಕೆ ವಿಚಾರವಾಗಿ ಪ್ರತಿಕ್ರಿಯಿಸಿದ ಡಿಕೆಶಿ, ''ಅವರು ಹೇಳೋದು ಸರಿ ಇದೆ. ನನಗೆ ಚನ್ನಪಟ್ಟಣ ಒಂದೇ ಕ್ಷೇತ್ರದಲ್ಲಿ ಜನತೆ 10,000 ಅರ್ಜಿ ಕೊಟ್ಟಿದ್ದಾರೆ. ಅರ್ಜಿ ಕೊಟ್ಟವರ ಫೋನ್ ಸಂಖ್ಯೆ ಮತ್ತು ಅರ್ಜಿ ಇದೆ. ಆ ಅರ್ಜಿಗಳನ್ನೆಲ್ಲಾ ಕೌಂಟರ್ನಲ್ಲಿ ಸ್ವೀಕಾರ ಮಾಡಿದ್ದೇವೆ. ಹೆಚ್ಡಿಕೆ ಏನು ಕೆಲಸ ಮಾಡಿಲ್ಲ ಎಂಬುದಕ್ಕೆ ಇದಕ್ಕಿಂತ ದೊಡ್ಡ ಸಾಕ್ಷಿ ಬೇಕಾ?. ಅವರು ಮಾತ್ರ ರಾಜಕಾರಣ ಮಾಡುತ್ತಾರಾ?, ನಮಗೆ ರಾಜಕಾರಣ ಮಾಡಲು ಬರುತ್ತೆ. ಆದರೆ, ನಮಗೆ ರಾಜಕಾರಣ ಮುಖ್ಯ ಅಲ್ಲ. ಜನರ ಸೇವೆ ಮಾಡಬೇಕು ಎಂಬುದು ನಮಗೆ ಮುಖ್ಯ'' ಎಂದು ತಿಳಿಸಿದರು.
ಮುಡಾ ನಿವೇಶನ ವಿಚಾರವಾಗಿ ಪ್ರತಿಕ್ರಿಯಿಸಿದ ಅವರು, ''ಆಸ್ತಿ ಕಳೆದಕೊಂಡಿರುವವರು ಅರ್ಜಿ ಸಲ್ಲಿಸಿ ಪರಿಹಾರ ಕೇಳಿದ್ದಾರೆ. ಮುಡಾ ನಿಯಮದ ಪ್ರಕಾರ, ನಿವೇಶನ ಹಂಚಿಕೆ ಮಾಡಲಾಗಿದೆ. ಎಲ್ಲ ಕಡೆ ಈ ತರ ನಿವೇಶನ ಹಂಚಿಕೆ ಮಾಡುವ ಅವಕಾಶ ಇದೆ. ಅದರ ಪ್ರಕಾರ ಮುಡಾದವರು ಪರಿಹಾರ ಕೊಟ್ಟಿದ್ದಾರೆ. ಸಿಎಂ ಕೂಡ ತಮ್ಮ ಅಫಿಡವಿಟ್ನಲ್ಲಿ ತಮ್ಮ ಪತ್ನಿಗೆ ಈ ರೀತಿ ಆಸ್ತಿ ಬಂದಿದೆ ಎಂಬುವುದಾಗಿ ಉಲ್ಲೇಖಿಸಿದ್ದಾರೆ'' ಎಂದು ಹೇಳಿದರು.
''ಈ ನಿವೇಶನಗಳನ್ನು ಬಿಜೆಪಿ ಸರ್ಕಾರ ಅವಧಿಯಲ್ಲಿ ಹಂಚಲಾಗಿದೆ. ಮುಡಾದಲ್ಲಿ ನಿಯಮದ ಪ್ರಕಾರ 50:50 ಅನುಪಾತದಲ್ಲಿ ಪರಿಹಾರ ಕೊಡಬೇಕು ಎಂದು ತೀರ್ಮಾನ ಆಗಿದೆಯಂತೆ. ಬಿಡಿಎಯಲ್ಲಿ 60:40 ಅನುಪಾತದಲ್ಲಿ ಪರಿಹಾರ ಕೊಡುತ್ತಾರೆ. ಬಿಜೆಪಿ, ಜೆಡಿಎಸ್ನವರಿಗೆ ರಾಜಕಾರಣ ಮಾಡಬೇಕು. ದಳದವರು ಪಾಪ.. ಬಹಳ ಅನುಕಂಪ ನನ್ನ ಮೇಲೆ ತೋರಿಸುತ್ತಿದ್ದಾರೆ'' ಎಂದು ಟಾಂಗ್ ನೀಡಿದರು.
ಇದೇ ವೇಳೆ, ರಾಮನಗರದಲ್ಲಿ ಡಿಸಿಗಳ ಜೊತೆ ಮಾಜಿ ಸಂಸದ ಡಿ.ಕೆ.ಸುರೇಶ್ ಸಭೆ ಮಾಡಿದ್ದಾರೆ ಎಂಬ ಹೆಚ್ಡಿಕೆ ಆರೋಪ ವಿಚಾರವಾಗಿ ಮಾತನಾಡಿ, ''ಯಾರೂ ಯಾವ ಸಭೆಯನ್ನೂ ಮಾಡಿಲ್ಲ. ಅದು ಸುಳ್ಳು. ಅಧಿಕಾರಿಗಳು ಬಂದು ಭೇಟಿ ಮಾಡಿರಬಹದು. ಉತ್ತಮವಾಗಿ ಕೆಲಸ ಮಾಡುತ್ತಿದ್ದೀರಾ ಎಂಬ ಬಗ್ಗೆ ಧನ್ಯವಾದ ಹೇಳಿರಬಹದು. ಡಿ.ಕೆ.ಸುರೇಶ್ ಯಾವ ಸಭೆಯನ್ನೂ ಮಾಡಿಲ್ಲ. ನಾನು ಗ್ರಾಮ ಸಭೆಯನ್ನು ಮಾಡಿದ್ದೇನೆ ಅಷ್ಟೇ'' ಎಂದರು.
