ಹುಬ್ಬಳ್ಳಿ: ನಗರದಲ್ಲಿ ನೂತನವಾಗಿ ನಿರ್ಮಿಸಿರುವ ಚೆನ್ನಮ್ಮ ವೃತ್ತದ ಬಳಿಯ ಹಳೇ ಬಸ್ ನಿಲ್ದಾಣ ಭಾನುವಾರ ಉದ್ಘಾಟನೆಯಾಗಲಿದೆ. ಈ ಬಸ್ ನಿಲ್ದಾಣ ಪ್ರಯಾಣಿರು, ವ್ಯಾಪಾರಿಗಳು ಹಾಗೂ ಆಟೋ ಚಾಲಕರ ಜೀವನದ ಜೊತೆ ಅವಿನಾಭಾವ ಸಂಬಂಧ ಹೊಂದಿದೆ. ಹಳೇ ಬಸ್ ನಿಲ್ದಾಣ ಇದೀಗ ಹೊಸ ರೂಪ ಪಡೆದುಕೊಂಡಿದ್ದಕ್ಕೆ ಪ್ರಯಾಣಿಕರು ಹಾಗೂ ವ್ಯಾಪಾರಿಗಳು 'ಈಟಿವಿ ಭಾರತ' ಜೊತೆ ಸಂತಸ ಹಂಚಿಕೊಂಡಿದ್ದಾರೆ.
ಹಣ್ಣಿನ ವ್ಯಾಪಾರಿ ನಾಗರಾಜ್ ಪ್ರತಿಕ್ರಿಯಿಸಿ, "ಹಳೇ ಬಸ್ ನಿಲ್ದಾಣವನ್ನು ಅದ್ಭುತವಾಗಿ ಕಟ್ಟಿದ್ದಕ್ಕೆ ತುಂಬ ಖುಷಿ ಇದೆ. ಆದರೆ ನಾವು ಅಜ್ಜನ ಕಾಲದಿಂದಲೂ ಇದೇ ಬಸ್ ನಿಲ್ದಾಣದಲ್ಲಿ ಹಣ್ಣಿನ ವ್ಯಾಪಾರ ಮಾಡಿಕೊಂಡು ಜೀವನ ನಿರ್ವಹಣೆ ಮಾಡುತ್ತಿದ್ದೇವೆ. ಈಗ ಸರಿಯಾದ ಜಾಗ ನಮಗೆ ಗುರುತಿಸಿಲ್ಲ. ಹೀಗಾಗಿ ಸಂಬಂಧಪಟ್ಟ ಅಧಿಕಾರಿಗಳು ಸ್ಪಂದಿಸಿ ಇಲ್ಲೇ ವ್ಯಾಪಾರ ನಡೆಸಿಕೊಂಡು ಹೋಗಲು ವ್ಯವಸ್ಥೆ ಮಾಡಿಕೊಡಬೇಕು" ಎಂದು ಮನವಿ ಮಾಡಿದರು.
ಆಟೋ ಚಾಲಕರ ಸಂಘದ ಅಧ್ಯಕ್ಷ ಶೇಖರಯ್ಯ ಮಠಪತಿ ಪ್ರತಿಕ್ರಿಯಿಸಿ, "ಈ ಬಸ್ ನಿಲ್ದಾಣ ಉದ್ಘಾಟನೆಯಾಗುತ್ತಿರುವುದು ಸಂತಸ ತಂದಿದೆ. ಆಟೋ ಚಾಲಕರು ಇದೇ ಬಸ್ ನಿಲ್ದಾಣದಿಂದ ಜೀವನ ಕಟ್ಟಿಕೊಂಡಿದ್ದಾರೆ. ಈ ಹಿಂದೆಯೂ ಕೂಡ ನೂರಾರು ಆಟೋ ಚಾಲಕರು ಇದೇ ಬಸ್ ನಿಲ್ದಾಣ ನೆಚ್ಚಿಕೊಂಡಿದ್ದರು. ಆದರೆ ನಮಗೆ ಪ್ರತ್ಯೇಕವಾದ ವ್ಯವಸ್ಥೆ ಇಲ್ಲ. ಸಾವಿರಾರು ಪ್ರಯಾಣಿಕರು ನಿತ್ಯ ಬರುತ್ತಾರೆ. ಇದು ಹಿಂದೆ ಅಂತರ್ ಜಿಲ್ಲಾ ಬಸ್ ನಿಲ್ದಾಣವಾಗಿತ್ತು. ನಗರ ಸಾರಿಗೆ ಮಾಡಿದ್ದಾರೆ. ಹೀಗಾಗಿ ಅಂತರ್ ಜಿಲ್ಲಾ ಬಸ್ ನಿಲುಗಡೆ ಮಾಡಬೇಕು. ಆಟೋ ನಿಲ್ದಾಣಕ್ಕೂ ಅವಕಾಶ ನೀಡಬೇಕು" ಎಂದು ಮನವಿ ಮಾಡಿದರು.
ವ್ಯಾಪಾರಿ ಇಕ್ಬಾಲ್ ಪ್ರತಿಕ್ರಿಯಿಸಿ, "ಹಳೆ ಬಾಸ್ ನಿಲ್ದಾಣಕ್ಕಿಂತಲೂ ಇದು ಚನ್ನಾಗಿದೆ. ಸ್ಮಾರ್ಟ್ ಸಿಟಿಯಿಂದ ಎಲ್ಲಾ ಸೌಲಭ್ಯ ಕಲ್ಪಿಸಿದ್ದಾರೆ. ಹಳೇ ಬಸ್ ನಿಲ್ದಾಣಕ್ಕೆ ಹೊಸ ಕಳೆ ಬಂದಿದೆ. ಹಳೇ ಬಸ್ ನಿಲ್ದಾಣ ಹುಬ್ಬಳ್ಳಿಗೆ ಒಂದು ನಿಶಾನ್ ಆಗಿದೆ" ಎಂದರು.
ನವಲಗುಂದದ ಪ್ರಯಾಣಿಕರಾದ ಮುತ್ತು ಕಟ್ಟಿಮನಿ ಹಾಗೂ ಜಯಶ್ರೀ ಮಾತನಾಡಿ, "ಹಳೇ ಬಸ್ ನಿಲ್ದಾಣ ಹೊಸ ರೂಪ ಪಡೆದು ಮರು ಆರಂಭವಾಗುತ್ತಿರುವುದಕ್ಕೆ ಸಂತಸವಾಗುತ್ತಿದೆ. ಕಳೆದ ನಾಲ್ಕು ವರ್ಷಗಳಿಂದ ದಿನ ಬಳಕೆ ವಸ್ತುಗಳನ್ನು ಖರೀದಿ ಮಾಡಲು ಇಲ್ಲಿಗೆ ಬರುವವರಿಗೆ ಯಾವುದೇ ವ್ಯವಸ್ಥೆ ಇರಲಿಲ್ಲ. ಅದು ಹಳೇ ಕಟ್ಟಡವಾಗಿತ್ತು. ಈಗ ಹೊಸದಾಗಿ ನಿರ್ಮಿಸಿದ್ದರಿಂದ ನಮಗೆ ಅನುಕೂಲಕರವಾಗಿದೆ" ಎಂದು ಸಂತಸ ವ್ಯಕ್ತಪಡಿಸಿದರು.
ವಿದ್ಯಾರ್ಥಿ ವಿಠಲ್ ಪ್ರತಿಕ್ರಿಯಿಸಿ, ಹಳೇ ಬಸ್ ನಿಲ್ದಾಣ ಆರಂಭವಾಗುತ್ತಿರುವುದಕ್ಕೆ ಸಂತಸ ವ್ಯಕ್ತಪಡಿಸಿದ್ದಾರೆ. "ಈ ಹಿಂದೆ ನಾವು ಇಲ್ಲಿ ಕುಳಿತು‌ಕೊಳ್ಳಲು ಆಗುತ್ತಿರಲಿಲ್ಲ. ಬಹಳ ಗದ್ದಲ ಜೊತೆಗೆ ಸಾಕಷ್ಟು ಬಸ್ ಇದ್ದವು. ಈಗ ಕೇವಲ ನಗರ ಸಾರಿಗೆ ಬಸ್ಗಳು ಮಾತ್ರ ನಿಲ್ದಾಣಕ್ಕೆ ಬರುತ್ತಿವೆ, ಬಸ್ ನಿಲ್ದಾಣ ಬಹಳ ವಿಶಾಲವಿವಾಗಿದೆ" ಎಂದು ಹೇಳಿದರು.
ರಾಣೆಬೆನ್ನೂರಿನ ಪ್ರಯಾಣಿಕರಾದ ಹನುಮಂತಪ್ಪ ಪ್ರತಿಕ್ರಿಯಿಸಿ, "ಈ ಹಿಂದೆ ಎಲ್ಲಾ ಬಸ್ಗಳು ಇಲ್ಲಿಗೆ ಬರುತ್ತಿದ್ದವು. ನಾವು ಇಲ್ಲಿ ದಿನ ಬಳಕೆ ವಸ್ತುಗಳನ್ನು ಖರೀದಿ ಮಾಡಿಕೊಂಡು ಇಲ್ಲಿಯೇ ಬಸ್ ಏರಿ ಹೋಗುತ್ತಿದ್ದೆವು. ಈಗ ಮತ್ತೆ ಹಳೇ ಬಸ್ ನಿಲ್ದಾಣ ಉದ್ಘಾಟನೆ ಆಗುತ್ತಿರುವುದಕ್ಕೆ ಸಂತೋಷವಾಗಿದೆ. ನಮ್ಮ ಊರಿನ ಕಡೆ ಹೋಗುವ ಬಸ್ಗೆ ಇಲ್ಲಿ ಅವಕಾಶ ನೀಡಿದರೆ ಉತ್ತಮ" ಎಂದರು.
ಇದನ್ನೂ ಓದಿ: ಹೊಸ ರೂಪದಲ್ಲಿ ಹುಬ್ಬಳ್ಳಿ ಹಳೇ ಬಸ್ ನಿಲ್ದಾಣ; ಉದ್ಘಾಟನೆಗೆ ಕೊನೆಗೂ ಮುಹೂರ್ತ ಫಿಕ್ಸ್
