ನ್ಯೂಯಾರ್ಕ್: ಭಾರತ ತಂಡವು ಸತತ ಮೂರನೇ ಗೆಲುವಿನೊಂದಿಗೆ ಟಿ20 ವಿಶ್ವಕಪ್ ಟೂರ್ನಿಯ ಸೂಪರ್-8 ಹಂತಕ್ಕೆ ಎಂಟ್ರಿಕೊಟ್ಟಿದೆ. ರೋಹಿತ್ ಶರ್ಮಾ ಪಡೆಯು ಅಮೆರಿಕ ವಿರುದ್ಧ ಬುಧವಾರ ನಡೆದ ಪಂದ್ಯದಲ್ಲಿ 7 ವಿಕೆಟ್ಗಳ ಜಯ ದಾಖಲಿಸಿತು. ಚೇಸಿಂಗ್ ವೇಳೆ ಅಮೆರಿಕ ಮಾಡಿದ ಪ್ರಮಾದದಿಂದಾಗಿ ಭಾರತದ ಸ್ಕೋರ್ಗೆ ಉಚಿತವಾಗಿ 5 ರನ್ ಸೇರ್ಪಡೆಯಾದವು.
ನ್ಯೂಯಾರ್ಕ್ನ ನಸ್ಸೌ ಕೌಂಟಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಂನಲ್ಲಿ ಭಾರತಕ್ಕೆ 111 ರನ್ ಗುರಿ ಬೆನ್ನಟ್ಟುವುದು ಸುಲಭವಾಗಿರಲಿಲ್ಲ. ಈ ವೇಳೆ ಟೀಂ ಇಂಡಿಯಾಗೆ 5 ರನ್ಗಳು ಬೋನಸ್ ಎಂಬಂತೆ ಸಿಕ್ಕವು. ಅದು ಹೇಗೆ ಎಂಬ ಬಗ್ಗೆ ಆರಂಭದಲ್ಲಿ ಕೆಲಕಾಲ ಗೊಂದಲ ಕಂಡುಬಂದರೂ ಸಹ ಆ ಬಳಿಕ ಸ್ಪಷ್ಟತೆ ಸಿಕ್ಕಿತು. ಅನಿರೀಕ್ಷಿತ 5 ರನ್ಗಳು ಯುಎಸ್ ತಂಡದ ಮೇಲೆ ಒತ್ತಡ ಹೇರಿತು. ಭಾರತ 7 ವಿಕೆಟ್ಗಳ ಗೆಲುವು ಸಾಧಿಸಿತು.
ಭಾರತಕ್ಕೆ 5 ರನ್ ನೀಡಿದ್ದು ಯಾಕೆ?: ಪಂದ್ಯದ 15 ಓವರ್ಗಳ ಅಂತ್ಯಕ್ಕೆ ಟೀಂ ಇಂಡಿಯಾಗೆ 30 ಎಸೆತಗಳಲ್ಲಿ 35 ರನ್ ಅಗತ್ಯವಿತ್ತು. ಆದರೆ, ಮತ್ತೊಂದು ಓವರ್ ಆರಂಭಿಸುವಲ್ಲಿ ಯುಎಸ್ ತಂಡ ತಡ ಮಾಡಿತು. ಹೀಗಾಗಿ, 60 ಸೆಕೆಂಡುಗಳ ವಿಳಂಬದ ಹಿನ್ನೆಲೆಯಲ್ಲಿ 5 ರನ್ಗಳ ದಂಡಕ್ಕೆ ಗುರಿಯಾಯಿತು. ಅದಾಗಲೇ ಎರಡು ಸಲ ಓವರ್ಗಳ ನಡುವೆ ತಡ ಮಾಡಿದ್ದ ಯುಎಸ್ ತಂಡ ಮೂರನೇ ಬಾರಿಗೆ ತಪ್ಪನ್ನು ಮರುಕಳಿಸಿದ್ದರಿಂದ ನಿಯಮದ ಪ್ರಕಾರ ದಂಡ ವಿಧಿಸಲಾಯಿತು. ಕಳೆದ ವರ್ಷ ಐಸಿಸಿ ಜಾರಿಗೆ ತಂದ ಹೊಸ ನಿಯಮ ಅಮೆರಿಕಕ್ಕೆ ತಲೆನೋವು ತಂದಿತು. ಈ ನಿಯಮವನ್ನು ಸ್ಟಾಪ್ ಕ್ಲಾಕ್ ರೂಲ್ (stop-clock rule) ಎಂದು ಕರೆಯಲಾಗುತ್ತದೆ.
ಏನಿದು ನಿಯಮ?: ಕಳೆದ ವರ್ಷ ಡಿಸೆಂಬರ್‌ನಿಂದ ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಸ್ಟಾಪ್-ಕ್ಲಾಕ್ ನಿಯಮ ಪ್ರಯೋಗಿಸಲಾಗಿದೆ. ಬಳಿಕ ಏಪ್ರಿಲ್ 2024ರಲ್ಲಿ ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್‌ನಲ್ಲಿ ಇದು ಜಾರಿಗೆ ಬಂದಿದೆ. ಸಮಯದ ಬಳಕೆಯನ್ನು ನಿಯಂತ್ರಣ ಮಾಡಲು ಇದರ ಬಳಕೆಯಾಗುತ್ತಿದೆ. ಓವರ್ಗಳ ನಡುವೆ, ತಂಡಗಳು ಮುಂದಿನ ಓವರ್ ಪ್ರಾರಂಭಿಸುವಾಗ 60 ಸೆಕೆಂಡ್ಗಳ ಕಾಲ ಮಾತ್ರ ಅವಕಾಶವಿದೆ. ಫೀಲ್ಡಿಂಗ್ ವೇಳೆ ಈ ಅವಧಿಯನ್ನು ಮೀರಿ ಸಮಯ ವ್ಯಯಿಸಿದರೆ, ಎರಡು ಬಾರಿ ವಾರ್ನಿಂಗ್ ಮಾಡಲಾಗುತ್ತದೆ. ಬಳಿಕವೂ ಮೂರನೇ ಬಾರಿಗೆ ತಪ್ಪು ಮರುಕಳಿಸಿದರೆ ದಂಡಕ್ಕೆ ಗುರಿಯಾಗಬೇಕಾಗುತ್ತದೆ. ಮುಂದಿನ ಪ್ರತಿಯೊಂದು ಉಲ್ಲಂಘನೆಗೂ ಕೂಡ 5 ರನ್ ಪೆನಾಲ್ಟಿ ವಿಧಿಸಲಾಗುತ್ತದೆ.
ಇದೀಗ ಭಾರತದ ವಿರುದ್ಧ ದಂಡ ಅನುಭವಿಸಿದ ಯುಎಸ್ ತಂಡ, ಎದುರಾಳಿಗೆ ಗೆಲುವನ್ನು ಇನ್ನಷ್ಟು ಸುಲಭವಾಗಿಸಿತು. ಹೀಗೆ 5 ರನ್ ದಂಡಕ್ಕೆ ಗುರಿಯಾದ ಮೊದಲ ತಂಡವಾದ ಕುಖ್ಯಾತಿ ಯುಎಸ್ ತಂಡದ್ದಾಯಿತು.
ಇದನ್ನೂ ಓದಿ: ಟಿ20 ವಿಶ್ವಕಪ್: ಅರ್ಷದೀಪ್ ಮಾರಕ ದಾಳಿ; ಅಮೆರಿಕ ಮಣಿಸಿ ಸೂಪರ್-8ಕ್ಕೆ ಭಾರತ ಲಗ್ಗೆ - India Enters super 8
