ಆಂಟಿಗುವಾ: ಇಲ್ಲಿನ ಸರ್ ವಿವಿಯನ್ ರಿಚರ್ಡ್ಸ್ ಮೈದಾನದಲ್ಲಿ ನಡೆದ ಟಿ20 ವಿಶ್ವಕಪ್ ಟೂರ್ನಿಯ ಸೂಪರ್-8 ಹಂತದ ಪಂದ್ಯದಲ್ಲಿ ಅಮೆರಿಕ ವಿರುದ್ಧ ದಕ್ಷಿಣ ಆಫ್ರಿಕಾ ತಂಡವು 18 ರನ್ಗಳ ಗೆಲುವು ಸಾಧಿಸಿದೆ.
ಟಾಸ್ ಗೆದ್ದ ಅಮೆರಿಕ ತಂಡ ಮೊದಲು ಹರಿಣಗಳನ್ನು ಬ್ಯಾಟಿಂಗ್ಗೆ ಆಹ್ವಾನಿಸಿತು. ಮೈದಾನಕ್ಕಿಳಿದ ದಕ್ಷಿಣ ಆಫ್ರಿಕಾಗೆ ಆರಂಭಿಕ ಆಟಗಾರ ಕ್ವಿಂಟನ್ ಡಿ ಕಾಕ್ (74) ಭರ್ಜರಿ ಅರ್ಧಶತಕ ಗಳಿಸಿ ನೆರವಾದರು. ಮತ್ತೋರ್ವ ಆರಂಭಿಕ ರೀಜಾ ಹೆನ್ರಿಕ್ಸ್ ಕೇವಲ 11 ರನ್ಗೆ ವಿಕೆಟ್ ಒಪ್ಪಿಸಿದರು. ಕ್ವಿಂಟನ್ಗೆ ನಾಯಕ ಎಡನ್ ಮಾರ್ಕ್ರಮ್ (46) ಉತ್ತಮ ಸಾಥ್ ನೀಡಿದರು. ಈ ಜೋಡಿ ಎರಡನೇ ವಿಕೆಟ್ಗೆ ಭರ್ಜರಿ 110 ರನ್ ಸೇರಿಸಿ, ತಂಡಕ್ಕೆ ಭದ್ರ ಬುನಾದಿ ಹಾಕಿಕೊಟ್ಟಿತು.
74 ರನ್ ಬಾರಿಸಿದ ಡಿ ಕಾಕ್ ಹರ್ಮೀತ್ ಸಿಂಗ್ ಬೌಲಿಂಗ್ನಲ್ಲಿ ಔಟಾದರು. ಬಳಿಕ ಬಂದ ಡೆವಿಡ್ ಮಿಲ್ಲರ್ ಶೂನ್ಯ ಸುತ್ತಿದರು. ಇದಾದ ಕೆಲಹೊತ್ತಲ್ಲೇ ಅರ್ಧಶತಕದ ಅಂಚಿನಲ್ಲಿದ್ದ ಮಾರ್ಕ್ರಮ್ ಕೂಡ ನೆಟ್ರಾವಾಲ್ಕರ್ ಬೌಲಿಂಗ್ನಲ್ಲಿ ಎಡವಿದರು. ತದನಂತರ, ಹೆನ್ರಿಚ್ ಕ್ಲಾಸಿನ್ (36) ಹಾಗೂ ಟ್ರಿಸ್ಟಾನ್ ಸ್ಟಬ್ಸ್ (20) ಜೋಡಿ ಅಜೇಯ ಆಟವಾಡಿ ತಂಡದ ಮೊತ್ತವನ್ನು 194ಕ್ಕೆ ಕೊಂಡೊಯ್ದಿತು. ಇವರಿಬ್ಬರೂ 5ನೇ ವಿಕೆಟ್ಗೆ 53 ರನ್ ಸೇರಿಸಿದರು.
195 ರನ್ ಗುರಿ ಬೆನ್ನಟ್ಟಿದ ಅಮೆರಿಕ ಅಬ್ಬರದ ಆರಂಭ ಪಡೆದರೂ ನಿರಂತರವಾಗಿ ವಿಕೆಟ್ ಕಳೆದುಕೊಳ್ಳುತ್ತಲೇ ಸಾಗಿತು. ಆರಂಭಿಕ ಸ್ಟಿವನ್ ಟೇಲರ್ 14 ಎಸೆತಗಳಲ್ಲಿ 24 ರನ್ ಬಾರಿಸಿ ಮೊದಲಿಗರಾಗಿ ವಿಕೆಟ್ ಒಪ್ಪಿಸಿದರು. ಮತ್ತೊಂದೆಡೆ, ವಿಕೆಟ್ ಕೀಪರ್ ಆಡ್ರಿಸ್ ಗೌಸ್ ಅಜೇಯ 80 ರನ್ ಗಳಿಸಿದರೂ ಸಹ ತಂಡವನ್ನು ಗೆಲ್ಲಿಸಲಾಗಲಿಲ್ಲ.
ಒಂದು ಹಂತದಲ್ಲಿ 76 ರನ್ಗೆ 5 ವಿಕೆಟ್ ಕಳೆದುಕೊಂಡಿದ್ದ ಅಮೆರಿಕ ಸೋಲಿನತ್ತ ಮುಖ ಮಾಡಿತ್ತು. ನಿತೀಶ್ ಕುಮಾರ್ 8, ನಾಯಕ ಆ್ಯರೋನ್ ಜೋನ್ಸ್ 0, ಅನುಭವಿ ಕೋರಿ ಆ್ಯಂಡರ್ಸನ್ 12 ಹಾಗೂ ಶಾಯನ್ ಜಹಂಗಿರ್ 3 ರನ್ಗೆ ವಿಕೆಟ್ ಒಪ್ಪಿಸಿದ್ದರು. ಆಗ ಒಂದಾದ ಹರ್ಮೀತ್ ಸಿಂಗ್ (38) ಹಾಗೂ ಆಡ್ರಿಸ್ ಗೌಸ್ 6ನೇ ವಿಕೆಟ್ಗೆ 91 ರನ್ ಜೊತೆಯಾಟವಾಡಿ, ಯುಎಸ್ಗೆ ಗೆಲವಿನ ಭರವಸೆ ಮೂಡಿಸಿದ್ದರು.
ಕೊನೆಯ ಎರಡು ಓವರ್ಗಳಲ್ಲಿ ಗೆಲುವಿಗೆ 27 ರನ್ ಆಗತ್ಯವಿದ್ದಾಗ ಹರ್ಮೀತ್ ಸಿಂಗ್ ಔಟಾದರು. ಅಲ್ಲದೆ, ರಬಾಡ ಎಸೆದ 19ನೇ ಓವರ್ನಲ್ಲಿ ಹರ್ಮೀತ್ ವಿಕೆಟ್ ಕಳೆದುಕೊಂಡಿದ್ದಲ್ಲದೆ, ಕೇವಲ 2 ರನ್ಗಳು ಬಂದವು. ಇದರಿಂದಾಗಿ ಕೊನೆಯ ಓವರ್ನಲ್ಲಿ 25 ರನ್ ಬಾರಿಸುವ ಆಗತ್ಯವಿತ್ತು. ಕೇವಲ 7 ರನ್ ಗಳಿಸಲಷ್ಟೇ ಶಕ್ತವಾದ ಅಮೆರಿಕ 20 ಓವರ್ಗಳಲ್ಲಿ 6 ವಿಕೆಟ್ಗೆ 176 ರನ್ ಗಳಿಸಿ, 18 ರನ್ ಅಂತರದ ಸೋಲು ಕಂಡಿತು. ಹರಿಣಗಳ ಪರ ಕಗೀಸೊ ರಬಾಡಾ 18 ರನ್ಗೆ 3 ವಿಕೆಟ್ ಕಬಳಿಸಿದರು. ಸೂಪರ್-8 ಹಂತದ ಮೊದಲ ಪಂದ್ಯ ಗೆದ್ದ ಮಾರ್ಕ್ರಮ್ ಪಡೆ ಶುಭಾರಂಭ ಮಾಡಿತು.
