ರಾಂಚಿ: ಪದಾರ್ಪಣೆ ಪಂದ್ಯದಲ್ಲೇ ಮಿಂಚಿನ ಬೌಲಿಂಗ್ ಪ್ರದರ್ಶಿಸಿದ ಆಕಾಶ್ ದೀಪ್ ದಾಳಿಗೆ ಸಿಲುಕಿದ ಇಂಗ್ಲೆಂಡ್ ತಂಡ ಭೋಜನ ವಿರಾಮದ ವೇಳೆಗೆ 5 ವಿಕೆಟ್ ಕಳೆದುಕೊಂಡು 112 ರನ್ ಗಳಿಸಿದೆ. ಇಲ್ಲಿನ ಜೆಎಸ್‌ಸಿಎ ಇಂಟರ್‌ನ್ಯಾಷನಲ್ ಮೈದಾನದಲ್ಲಿ ನಡೆಯುತ್ತಿರುವ ನಾಲ್ಕನೇ ಟೆಸ್ಟ್ ಪಂದ್ಯದಲ್ಲಿ ಟಾಸ್ ಗೆದ್ದ ಆಂಗ್ಲರು ಮೊದಲು ಬ್ಯಾಟಿಂಗ್ಗಿಳಿದಿದ್ದಾರೆ.
ಸರಣಿ ಸಮಬಲ ಸಾಧಿಸುವ ನಿಟ್ಟಿನಲ್ಲಿ ಕಣಕ್ಕಿಳಿದಿರುವ ಇಂಗ್ಲೆಂಡ್ ಎಂದಿನಂತೆ ಬಾಜ್ಬಾಲ್ ಶೈಲಿಯ ಬಿರುಸಿನ ಆರಂಭ ಪಡೆಯಿತು. ಮೊದಲ ವಿಕೆಟ್ಗೆ ಝಾಕ್ ಕ್ರಾಲಿ (42) ಹಾಗೂ ಬೆನ್ ಡಕೆಟ್ (11) 9.2 ಓವರ್ಗಳಲ್ಲೇ 47 ರನ್ ಸೇರಿಸಿದರು. ಈ ಹಂತದಲ್ಲಿ 11 ರನ್ ಬಾರಿಸಿದ್ದ ಡಕೆಟ್ ಆಕಾಶ್ ದೀಪ್ಗೆ ಮೊದಲ ಬಲಿಯಾದರು.
ನಂತರ ಬ್ಯಾಟಿಂಗ್ಗೆ ಬಂದ ಒಲಿ ಪೋಪ್ ಕೇವಲ ಎರಡು ಎಸೆತಗಳನ್ನು ಎದುರಿಸಿ ಶೂನ್ಯಕ್ಕೆ ಪೆವಿಲಿಯನ್ಗೆ ಮರಳಿದರು. ಈ ಮೂಲಕ ಆಕಾಶ್ ಎರಡನೇ ವಿಕೆಟ್ ಕಬಳಿಸಿದರು. 12 ನೇ ಓವರ್ನಲ್ಲಿ ಭರ್ಜರಿ ಇನ್ಸ್ವಿಂಗರ್ ಎಸೆದ ಆಕಾಶ್ ದೀಪ್ ಉತ್ತಮವಾಗಿ ಆಡುತ್ತಿದ್ದ ಕ್ರಾಲಿ ಬೌಲ್ಡ್ ಮಾಡಿ, ಇಂಗ್ಲೆಂಡ್ಗೆ ಮತ್ತೊಂದು ಶಾಕ್ ನೀಡಿದರು. 57 ರನ್ಗಳಿಗೆ ಇಂಗ್ಲೆಂಡ್ 3 ವಿಕೆಟ್ ಕಳೆದು ಕೊಂಡಿತ್ತು.
ಇದನ್ನೂ ಓದಿ: ನಾಲ್ಕನೇ ಟೆಸ್ಟ್: ಸರಣಿ ಗೆಲುವಿನತ್ತ ಭಾರತ ಚಿತ್ತ; ಮರು ಹೋರಾಟಕ್ಕೆ ಆಂಗ್ಲ ಪಡೆ ಸಜ್ಜು
ಈ ಹಂತದಲ್ಲಿ ಒಂದಾದ ಅನುಭವಿ ಜೋ ರೂಟ್ ಹಾಗೂ ಜಾನಿ ಬೈರ್ಸ್ಟೋ ನಾಲ್ಕನೇ ವಿಕೆಟ್ಗೆ 52 ರನ್ ಸೇರಿಸಿ ಆಸರೆಯಾದರು. ಈ ಹಂತದಲ್ಲಿ ಆಕ್ರಮಣಕಾರಿ ಆಟವಾಡುತ್ತಿದ್ದ ಬೈರ್ಸ್ಟೋ (38, 34 ಎಸೆತ) ಅವರು ಅಶ್ವಿನ್ ಸ್ಪಿನ್ ಬಲೆಗೆ ಬಿದ್ದರು. ಬಳಿಕ ಮೈದಾನಕ್ಕಿಳಿದ ನಾಯಕ ಬೆನ್ ಸ್ಟೋಕ್ಸ್ರನ್ನು ಜಡೇಜಾ ಕೇವಲ 3 ರನ್ಗೆ ಎಲ್ಬಿ ಬಲೆಗೆ ಬೀಳಿಸಿದರು.
ಸ್ಟೋಕ್ಸ್ ಔಟಾಗುತ್ತಿದ್ದಂತೆ ಭೋಜನ ವಿರಾಮ ತೆಗೆದುಕೊಳ್ಳಲಾಗಿದೆ. 24.1 ಓವರ್ಗಳಲ್ಲಿ ಇಂಗ್ಲೆಂಡ್ 5 ವಿಕೆಟ್ಗೆ 112 ರನ್ ಪೇರಿಸಿದೆ. ಭಾರತದ ಪರ ಆಕಾಶ್ ದೀಪ್ 24 ರನ್ಗೆ 3 ಹಾಗೂ ಸ್ಪಿನ್ ಜೋಡಿ ಆರ್. ಅಶ್ವಿನ್ ಮತ್ತು ರವೀಂದ್ರ ಜಡೇಜಾ ತಲಾ ಒಂದು ವಿಕೆಟ್ ಪಡೆದು ಪಂದ್ಯದ ಆರಂಭಿಕ ಅವಧಿಯಲ್ಲೇ ಟೀಂ ಇಂಡಿಯಾಕ್ಕೆ ಮೇಲುಗೈ ಒದಗಿಸಿದ್ದಾರೆ.
ಇದನ್ನೂ ಓದಿ: ರಾಂಚಿ ಟೆಸ್ಟ್: ಟಾಸ್ ಗೆದ್ದ ಇಂಗ್ಲೆಂಡ್ ಬ್ಯಾಟಿಂಗ್ ಆಯ್ಕೆ; ಭಾರತದ ಪರ ಆಕಾಶ್ ದೀಪ್ ಪದಾರ್ಪಣೆ
