ನವದೆಹಲಿ : ಉತ್ತರಾಖಂಡದ ಪಿಥೋರಗಢ ಜಿಲ್ಲೆಯ ಪುಟ್ಟ ಹಳ್ಳಿಯೊಂದರ ಓಟಗಾರ ಮಾನ್ ಸಿಂಗ್ ಹಾಂಕಾಂಗ್ ಏಷ್ಯನ್ ಮ್ಯಾರಥಾನ್ನಲ್ಲಿ ಅದ್ಭುತ ಸಾಧನೆ ಮಾಡಿದ್ದಾರೆ. ಇತ್ತೀಚೆಗೆ ಭಾರತೀಯ ಸೇನೆಯಲ್ಲಿ ನೇಮಕಗೊಂಡ ಮಾನ್ಸಿಂಗ್ ಏಷ್ಯನ್ ಮ್ಯಾರಥಾನ್ ಚಾಂಪಿಯನ್‌ಶಿಪ್ 2024ರಲ್ಲಿ ಚಿನ್ನದ ಪದಕವನ್ನು ಗೆದ್ದಿದ್ದಾರೆ. ಇವರಿಂದಾಗಿ ಭಾರತ 73 ವರ್ಷಗಳ ನಂತರ ಏಷ್ಯನ್ ಮ್ಯಾರಥಾನ್ ಸ್ಪರ್ಧೆಯಲ್ಲಿ ಚಿನ್ನದ ಪದಕ ಗೆದ್ದಿದೆ. ಅವರು ತಮ್ಮ ಇಲ್ಲಿಯವರೆಗಿನ ಪ್ರಯಾಣದ ಬಗ್ಗೆ ಮಾಹಿತಿ ಹಂಚಿಕೊಂಡಿದ್ದಾರೆ.
ಪ್ರಶ್ನೆ- ನಿಮ್ಮ ಆರಂಭಿಕ ಜೀವನ ಹೇಗಿತ್ತು?. ಓಟಗಾರನಾಗುವ ಆಲೋಚನೆ ನಿಮ್ಮ ಮನಸ್ಸಿಗೆ ಹೇಗೆ ಬಂದಿತು?
ಉತ್ತರ - ನಾನು ಪಿಥೋರಗಢ್ ಜಿಲ್ಲೆಯ ಬಂಗಪಾನಿ ತಹಸಿಲ್‌ನ ಮೆಟ್ಲಿ ಕುಂಡಿಯಾ ಎಂಬ ಸಣ್ಣ ಹಳ್ಳಿಯಿಂದ ಬಂದವನು. ಆರಂಭಿಕ ಜೀವನವನ್ನ ನಾನು ಹಳ್ಳಿಯಲ್ಲಿಯೇ ಕಳೆದಿದ್ದೇನೆ. ನನಗೆ ಓಡುವುದು ತುಂಬಾ ಇಷ್ಟವಾಗಿತ್ತು. ನಮ್ಮ ಗ್ರಾಮ ಹೆಚ್ಚಾಗಿ ಗುಡ್ಡಗಾಡು ಪ್ರದೇಶವಾಗಿದ್ದು, ಅಲ್ಲಿ ರಸ್ತೆಯೇ ಇರಲಿಲ್ಲ. ರಸ್ತೆಯನ್ನು ತಲುಪಲು 10 ರಿಂದ 12 ಕಿಲೋಮೀಟರ್ ನಡೆಯಬೇಕಿತ್ತು. ಶಾಲೆಯೂ ಮೂರು-ನಾಲ್ಕು ಕಿಲೋಮೀಟರ್ ದೂರದಲ್ಲಿತ್ತು. ಅಲ್ಲಿಗೆ ಪ್ರತಿದಿನ ಹೋಗುತ್ತಿದ್ದರಿಂದ ನನ್ನ ಕಾಲುಗಳ ಬಲವನ್ನು ಹೆಚ್ಚಿಸಿತು.
ಪ್ರಶ್ನೆ- ನಿಮ್ಮ ಓಟ ಶುರುವಾಗಿದ್ದು ಎಲ್ಲಿ? ಯಶಸ್ಸು ಸಾಧಿಸಿದ್ದು ಹೇಗೆ?
ಉತ್ತರ - ಸೇನೆಗೆ ಸೇರಿದ ನಂತರ ಹೆಚ್ಚು ಓಡತೊಡಗಿದೆ. ಓಟಗಾರನಾಗುವ ಯೋಚನೆ ನನ್ನ ಮನದಲ್ಲಿ ಮೂಡಿದ್ದು ಅಲ್ಲಿಂದಲೇ. ಇದಾದ ನಂತರ 2011ರಿಂದ ತರಬೇತಿ ಆರಂಭಿಸಿ 2012ರಿಂದ ಸ್ಪರ್ಧೆಗಳಲ್ಲಿ ಪದಕ ಗೆಲ್ಲಲು ಆರಂಭಿಸಿದೆ. ಹಾಂಕಾಂಗ್‌ನಲ್ಲಿ ನಡೆದ ಏಷ್ಯನ್ ಮ್ಯಾರಥಾನ್ ಚಾಂಪಿಯನ್‌ಶಿಪ್‌ನಲ್ಲಿ ಚಿನ್ನದ ಪದಕ ಗೆದ್ದಿರುವುದಕ್ಕೆ ತುಂಬಾ ಸಂತೋಷವಾಗಿದೆ. ಪ್ರತಿ ದಿನವೂ ವಿಭಿನ್ನ ತಾಲೀಮು ಇರುತ್ತದೆ. ಮ್ಯಾರಥಾನ್‌ಗೆ ಹೆಚ್ಚಿನ ಅಭ್ಯಾಸದ ಅಗತ್ಯವಿದೆ. ಪ್ರತಿದಿನ ಬೆಳಿಗ್ಗೆ ಮತ್ತು ಸಂಜೆ ಅವಧಿಗಳಲ್ಲಿ ಒಟ್ಟು 30-35 ಕಿಲೋ ಮೀಟರ್ ಓಟವನ್ನು ಅಭ್ಯಾಸ ಮಾಡಬೇಕಿತ್ತು.
ಪ್ರಶ್ನೆ- ಮುಂಬರುವ ರಾಷ್ಟ್ರೀಯ ಕ್ರೀಡಾಕೂಟಕ್ಕೆ ನಿಮ್ಮ ಸಿದ್ಧತೆ ಹೇಗಿದೆ?
ಉತ್ತರ - ನಾನು ಈಗಾಗಲೇ ರಾಷ್ಟ್ರೀಯ ಕ್ರೀಡಾಕೂಟಕ್ಕೆ ತಯಾರಿ ನಡೆಸುತ್ತಿದ್ದೇನೆ. ಸದ್ಯ ರಾಷ್ಟ್ರೀಯ ಕ್ರೀಡಾಕೂಟದಲ್ಲಿ ಮ್ಯಾರಥಾನ್ ಇಲ್ಲದ ಕಾರಣ 10,000 ಮೀಟರ್ ಓಟಕ್ಕೆ ಸಿದ್ಧತೆ ನಡೆಸಿ ಉತ್ತರಾಖಂಡಕ್ಕೆ ಪದಕ ತಂದುಕೊಡುವ ಪ್ರಯತ್ನ ಮಾಡುತ್ತೇನೆ. ರಾಷ್ಟ್ರೀಯ ಕ್ರೀಡಾಕೂಟಕ್ಕೆ ತಯಾರಿ ನಡೆಸುತ್ತಿರುವ ಯುವಕರು ತಮ್ಮ ಮೇಲೆ ನಂಬಿಕೆ ಇಟ್ಟು ಶ್ರಮಿಸುವಂತೆ ಹೇಳಲು ಬಯಸುತ್ತೇನೆ. ಇದು ಮಾತ್ರ ಯಶಸ್ಸಿಗೆ ಕಾರಣವಾಗುತ್ತದೆ. ಇದಕ್ಕಾಗಿ ಸರಿಯಾದ ವ್ಯಾಯಾಮದ ಜೊತೆಗೆ ಉತ್ತಮ ಆಹಾರವೂ ಅಗತ್ಯ. ಓಡಲು ಫಿಟ್ನೆಸ್ಗೆ ಗಮನ ಕೊಡುವುದು ಬಹಳ ಮುಖ್ಯ.
ಪ್ರಶ್ನೆ- ಏಷ್ಯನ್ ಮ್ಯಾರಥಾನ್ ಚಾಂಪಿಯನ್‌ಶಿಪ್‌ನಲ್ಲಿ ಚಿನ್ನದ ಪದಕ ಗೆದ್ದ ಎರಡನೇ ಭಾರತೀಯ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದೀರಿ. ನಿಮ್ಮ ಮುಂದಿನ ಸಿದ್ಧತೆಗಳೇನು?
ಉತ್ತರ - ಈ ವರ್ಷ ಒಲಿಂಪಿಕ್ ಕ್ರೀಡಾಕೂಟ ನಡೆಯಲಿದೆ. ಈಗ ಅದೇ ತಯಾರಿಯ ಯೋಚನೆಯಲ್ಲಿದ್ದೇನೆ. ನಾನು ಹಾಂಕಾಂಗ್‌ಗೆ ಆಡಲು ಹೋದಾಗ ಅಲ್ಲಿನ ವಾತಾವರಣ ಸಂಪೂರ್ಣ ಭಿನ್ನವಾಗಿತ್ತು. ನನ್ನ ಮುಂದಿನ ಗುರಿ ಒಲಂಪಿಕ್ ಪದಕ ತರುವುದು. ಮುಂಬೈನಲ್ಲಿ ನಡೆಯಲಿರುವ ಮ್ಯಾರಥಾನ್‌ಗೆ ನಾನು ಸಿದ್ಧತೆ ನಡೆಸಿದ್ದೆ. ಆದರೆ ಅದೇ ದಿನಾಂಕದಂದು ಏಷ್ಯನ್ ಮ್ಯಾರಥಾನ್ ನಡೆಯುತ್ತಿರುವ ಬಗ್ಗೆ ನನಗೆ ತಿಳಿದಿತ್ತು. ನಂತರ ನಾನು ಏಷ್ಯನ್ ಚಾಂಪಿಯನ್‌ಶಿಪ್‌ನಲ್ಲಿ ಭಾಗವಹಿಸಲು ನಿರ್ಧರಿಸಿದೆ. ಏಷ್ಯನ್ ಮ್ಯಾರಥಾನ್ ಸಮಯದಲ್ಲಿ ನನ್ನ ಮುಂಬೈ ಮ್ಯಾರಥಾನ್ ತಯಾರಿ ಚೆನ್ನಾಗಿತ್ತು. ಅಂತಹ ವೇದಿಕೆಯಲ್ಲಿ ರಾಷ್ಟ್ರಗೀತೆ ನುಡಿಸಿದಾಗಲೆಲ್ಲ ನನಗೆ ತುಂಬಾ ಹೆಮ್ಮೆ ಅನಿಸುತ್ತದೆ.
ಇದನ್ನೂ ಓದಿ: ಆತ್ಮವಿಶ್ವಾಸವೇ ನಮ್ಮ ಗುರಿ ಸಾಧನೆಗೆ ಸೋಪಾನ: ಭರ್ಚಿ ದೊರೆ ನೀರಜ್ ಚೋಪ್ರಾ
