ನವದೆಹಲಿ: ಒಲಿಂಪಿಕ್ಸ್ ಎಂಬುದು ವಿಶ್ವದ ಅತೀ ದೊಡ್ಡ ಕ್ರೀಡಾಕೂಟ. ಈ ಬಹುರಾಷ್ಟ್ರೀಯ ಕೂಟದ ಪ್ರತಿ ಸೀಸನ್ನಲ್ಲಿ 200ಕ್ಕೂ ಹೆಚ್ಚು ರಾಷ್ಟ್ರಗಳ ಕ್ರೀಡಾಪಟುಗಳು ಭಾಗವಹಿಸುತ್ತಾರೆ. ಇಂತಹ ದೊಡ್ಡ ಕ್ರೀಡೋತ್ಸವದಲ್ಲಿ ಪದಕಗಳನ್ನು ಗೆಲ್ಲುವುದು ಸುಲಭದ ಮಾತಲ್ಲ. ಆದರೆ ಇಲ್ಲೊಬ್ಬ ಕ್ರೀಡಾಪಟು ಒಂದಲ್ಲ, ಎರಡಲ್ಲ 28 ಪದಕ ಬೇಟೆಯಾಡಿದ್ದಾರೆ.
ಹೌದು, ಅಮೆರಿಕದ ಮಾಜಿ ಈಜುಗಾರ ಮೈಕೆಲ್ ಫೆಲ್ಪ್ಸ್ ತಮ್ಮ ಹೆಸರಿನಲ್ಲಿ ಯಾರೂ ಸರಿಗಟ್ಟಲಾಗದ ದಾಖಲೆ ಬರೆದಿದ್ದಾರೆ. ಒಟ್ಟು 28 ಒಲಿಂಪಿಕ್ಸ್ ಪದಕಗಳನ್ನು ಗೆದ್ದಿರುವ ಇವರ ಖಾತೆಯಲ್ಲಿ 23 ಚಿನ್ನ, 3 ಬೆಳ್ಳಿ ಹಾಗೂ 2 ಕಂಚಿನ ಪದಕಗಳಿವೆ. ಇದು ಒಲಿಂಪಿಕ್ಸ್ ಇತಿಹಾಸದಲ್ಲೇ ಆಟಗಾರನೊಬ್ಬ ಗೆದ್ದ ಅತ್ಯಧಿಕ ಪದಕಗಳು ಎಂಬ ಸಾರ್ವಕಾಲಿಕ ದಾಖಲೆ.
ಫೆಲ್ಪ್ಸ್ ಗೆದ್ದ ಚಿನ್ನದ ಪದಕಗಳ ಸಂಖ್ಯೆ ವಿಶ್ವದ 162 ದೇಶಗಳು ಒಲಿಂಪಿಕ್ಸ್ನಲ್ಲಿ ಗೆದ್ದ ಚಿನ್ನದ ಪದಕಗಳಿಗಿಂತ ಹೆಚ್ಚು. ಉದಾಹರಣೆಗೆ, ಭಾರತ ಒಲಿಂಪಿಕ್ ಇತಿಹಾಸದಲ್ಲಿ ಇಲ್ಲಿಯವರೆಗೆ ಒಟ್ಟು 10 ಚಿನ್ನದ ಪದಕ ಗೆದ್ದಿದೆ. ಇದು ಫೆಲ್ಪ್ಸ್ ಗೆದ್ದ 23 ಚಿನ್ನದ ಪದಕಗಳಲ್ಲಿ ಅರ್ಧಕ್ಕಿಂತಲೂ ಕಡಿಮೆ!.
ಮೈಕೆಲ್ ಫೆಲ್ಪ್ಸ್ 15ನೇ ವಯಸ್ಸಿನಲ್ಲಿರುವಾಗಲೇ ಒಲಿಂಪಿಕ್ಸ್ಗೆ ಪದಾರ್ಪಣೆ ಮಾಡಿದ್ದರು. ಸಿಡ್ನಿಯಲ್ಲಿ ನಡೆದ 2000 ಒಲಿಂಪಿಕ್ಸ್‌ನೊಂದಿಗೆ ಇವರ ಪ್ರಯಾಣ ಪ್ರಾರಂಭವಾಯಿತು. ತಮ್ಮ ಚೊಚ್ಚಲ ಒಲಿಂಪಿಕ್ಸ್‌ನಲ್ಲೇ ಫೆಲ್ಪ್ಸ್ ಇವರಿಗೆ ಯಾವುದೇ ಪದಕ ಗೆಲ್ಲಲು ಸಾಧ್ಯವಾಗಿರಲಿಲ್ಲ. 200 ಮೀಟರ್ ಬಟರ್ಫ್ಲೈ ಈಜು ಸ್ಪರ್ಧೆಯಲ್ಲಿ 5ನೇ ಸ್ಥಾನ ಪಡೆದು ನಿರಾಸೆ ಅನುಭವಿಸಿದ್ದರು.
ಶ್ರೇಷ್ಠ ಅಥ್ಲೀಟ್ ಫೆಲ್ಪ್ಸ್ ಯಶಸ್ಸು ಕೇವಲ ಪದಕಕ್ಕೆ ಸೀಮಿತವಾಗದೇ ಅವರ ಆರ್ಥಿಕ ಸ್ಥಿತಿಗತಿಯನ್ನೂ ಬದಲಾಯಿಸಿತು. ಸದ್ಯ ಫೆಲ್ಪ್ಸ್ ನಿವ್ವಳ ಆಸ್ತಿ ಮೌಲ್ಯ ಸುಮಾರು 100 ಮಿಲಿಯನ್ ಡಾಲರ್ (ಸುಮಾರು ರೂ 837 ಕೋಟಿ) ಆಗಿದ್ದು, ಜಗತ್ತಿನ ಅತ್ಯಂತ ಶ್ರೀಮಂತ ಕ್ರೀಡಾಪಟುಗಳ ಪಟ್ಟಿಯಲ್ಲಿ ಇವರೂ ಒಬ್ಬರು.
ಇದನ್ನೂ ಓದಿ: ಸೆಮಿಫೈನಲ್‌ಗೂ ಮುನ್ನ ಭಾರತ ಹಾಕಿ ತಂಡಕ್ಕೆ ಆಘಾತ: ಅಮಿತ್ ರೋಹಿದಾಸ್ ನಿಷೇಧ! - Paris olympics 2024
