ಸುಳ್ಳು ಮಾಹಿತಿ ತಡೆಯಲು ಯಾವ ಸಿದ್ಧತೆ ಮಾಡಿಕೊಂಡಿದ್ದಿರಿ: ಸಾಮಾಜಿಕ ಜಾಲತಾಣಗಳ ಕಂಪನಿ ಮುಖ್ಯಸ್ಥರಿಗೆ ಪತ್ರ

ಸಾಮಾಜಿಕ ಜಾಲತಾಣದ ವೇದಿಕೆಗಳಲ್ಲಿ ಸುಳ್ಳು ಮಾಹಿತಿಗಳ ಹರಡದಂತೆ ತಡೆಯಲು ಯಾವ ಸಿದ್ಧತೆ ಮಾಡಿಕೊಂಡಿದ್ದಿರಿ ಎಂದು ಅಮೆರಿಕದ ಪ್ರಭಾವಿ ಸೆನೆಟರ್ ಸಾಮಾಜಿಕ ಜಾಲತಾಣಗಳ ಕಂಪನಿ ಮುಖ್ಯಸ್ಥರಿಗೆ ಪತ್ರ ಬರೆದಿದ್ದಾರೆ.

ವಾಷಿಂಗ್ಟನ್ (ಅಮೆರಿಕ): ''ಸಾಮಾಜಿಕ ಜಾಲತಾಣದ ವೇದಿಕೆಗಳು ತಪ್ಪುದಾರಿಗೆಳೆಯುವ ಮತ್ತು ಸುಳ್ಳು ವಿಷಯವನ್ನು ಪ್ರಚಾರ ಮಾಡುವುದರಲ್ಲಿ ಸುದೀರ್ಘ ದಾಖಲೆಯನ್ನು ಹೊಂದಿವೆ. ಮೆಟಾ ಒಡೆತನದ ವಾಟ್ಸಾಪ್ ಸೇರಿದಂತೆ ಸಾಮಾಜಿಕ ಜಾಲತಾಣ ವೇದಿಕೆಗಳು ಭಾರತದಲ್ಲಿ ಚುನಾವಣೆಯಲ್ಲಿ ಸಮಯದಲ್ಲಿ ಸುಳ್ಳು ಮಾಹಿತಿ ಹರಡದಂತೆ ತಡೆಯಲು ಯಾವ ಸಿದ್ಧತೆಗಳನ್ನು ಮಾಡಿಕೊಂಡಿವೆ'' ಎಂದು ಅಮೆರಿಕದ ಪ್ರಭಾವಿ ಸೆನೆಟರ್ ಶುಕ್ರವಾರ ಯುಎಸ್ ಸಾಮಾಜಿಕ ಜಾಲತಾಣಗಳ ಕಂಪನಿಗಳನ್ನು ಕೇಳಿದ್ದಾರೆ.

ಸಾಮಾಜಿಕ ಜಾಲತಾಣದ ಮುಖ್ಯಸ್ಥರಿಗೆ ಪತ್ರ: ಅಮೆರಿಕದ ಚುನಾವಣೆಗಳ ಮೇಲೆ ನಿಗಾವಹಿಸಿರುವ ಸೆನೆಟ್ ಇಂಟೆಲಿಜೆನ್ಸ್ ಮತ್ತು ರೂಲ್ಸ್ ಕಮಿಟಿಗಳ ಸದಸ್ಯ, ಸೆನೆಟರ್ ಮೈಕೆಲ್ ಬೆನೆಟ್ ಬರೆದ ಪತ್ರವು ಭಾರತದ ಚುನಾವಣಾ ಆಯೋಗವು (ಇಸಿಐ) ಭಾರತದಲ್ಲಿ ಚುನಾವಣೆಗಳನ್ನು ಘೋಷಿಸುವ ಮುನ್ನಾದಿನವೇ ಬಹಿರಂಗವಾಗಿದೆ. ಆಲ್ಫಾಬೆಟ್, ಮೆಟಾ, ಟಿಕ್‌ಟಾಕ್ ಮತ್ತು ಎಕ್ಸ್‌ನ ಮುಖ್ಯಸ್ಥರಿಗೆ ಬೆನೆಟ್ ಪತ್ರ ಬರೆಯುವ ಮೂಲಕ ಭಾರತ ಸೇರಿದಂತೆ ವಿವಿಧ ದೇಶಗಳಲ್ಲಿ ಚುನಾವಣೆಗೆ ತಮ್ಮ ಸಿದ್ಧತೆಗಳ ಕುರಿತು ಈ ಕಂಪನಿಗಳಿಂದ ಮಾಹಿತಿ ಪಡೆಯಲು ಉದ್ದೇಶಿದ್ದಾರೆ.

''ನಿಮ್ಮ ಪ್ಲಾಟ್‌ಫಾರ್ಮ್‌ಗಳು ಚುನಾವಣೆಗಳಿಗೆ ಅಪಾಯ ಒಡ್ಡಲಿವೆ. ಕೃತಕ ಬುದ್ಧಿಮತ್ತೆ (AI) ಮಾದರಿಗಳು ಪ್ರಜಾಪ್ರಭುತ್ವ ಪ್ರಕ್ರಿಯೆ ಮತ್ತು ರಾಜಕೀಯ ಸ್ಥಿರತೆ ಎರಡಕ್ಕೂ ಅಪಾಯಗಳನ್ನು ಉಲ್ಬಣಗೊಳಿಸಲು ಸಾಮಾಜಿಕ ಜಾಲತಾಣಗಳು ಸಿದ್ಧವಾಗಿವೆ. ಅತ್ಯಾಧುನಿಕ AI ಪರಿಕರಗಳ ಪ್ರಸರಣವು ಬಳಕೆದಾರರನ್ನು ಗಾಬರಿಗೊಳಿಸುತ್ತದೆ. ಚಿತ್ರಗಳು, ವಿಡಿಯೋ ಮತ್ತು ಆಡಿಯೋವನ್ನು ರಚಿಸಲು ಅವಕಾಶ ಮಾಡಿಕೊಡುತ್ತದೆ'' ಎಂದು ಬೆನೆಟ್ ತಿಳಿಸಿದ್ದಾರೆ.

70ಕ್ಕೂ ಹೆಚ್ಚು ದೇಶಗಳಲ್ಲಿ ಚುನಾವಣೆಗಳು ನಡೆಯಲಿವೆ. ಈ ವರ್ಷ ಎರಡು ಶತಕೋಟಿಗೂ ಹೆಚ್ಚು ಜನರು ಮತ ಚಲಾಯಿಸಲಿದ್ದಾರೆ. 2024 ಪ್ರಜಾಪ್ರಭುತ್ವದ ವರ್ಷವಾಗಿದೆ. ಆಸ್ಟ್ರೇಲಿಯಾ, ಬೆಲ್ಜಿಯಂ, ಕ್ರೊಯೇಷಿಯಾ, ಯುರೋಪಿಯನ್ ಯೂನಿಯನ್, ಫಿನ್ಲ್ಯಾಂಡ್, ಘಾನಾ, ಐಸ್ಲ್ಯಾಂಡ್, ಭಾರತ, ಲಿಥುವೇನಿಯಾ, ನಮೀಬಿಯಾ, ಮೆಕ್ಸಿಕೋ, ಮೊಲ್ಡೊವಾ, ಮಂಗೋಲಿಯಾ, ಪನಾಮ, ರೊಮೇನಿಯಾ, ಸೆನೆಗಲ್, ದಕ್ಷಿಣ ಆಫ್ರಿಕಾ, ಯುನೈಟೆಡ್ ಕಿಂಗ್‌ಡಮ್ ಮತ್ತು ಯುನೈಟೆಡ್ ಸ್ಟೇಟ್ಸ್​ನಲ್ಲಿ ಈ ವರ್ಷ ಚುನಾವಣೆ ನಡೆಯಲಿವೆ.

ಪತ್ರದಲ್ಲಿರುವ ವಿಷಯವೇನು?: ಎಕ್ಸ್‌ನ ಎಲಾನ್ ಮಸ್ಕ್, ಮೆಟಾದ ಮಾರ್ಕ್ ಜುಕರ್‌ಬರ್ಗ್, ಟಿಕ್ ಟೋಕ್‌ನ ಶೌ ಝಿ ಚೆವ್ ಮತ್ತು ಆಲ್ಫಾಬೆಟ್‌ನ ಸುಂದರ್ ಪಿಚೈ ಅವರಿಗೆ ಬರೆದ ಪತ್ರದಲ್ಲಿ, ಬೆನೆಟ್ ಸಾಮಾಜಿಕ ಜಾಲತಾಣ ವೇದಿಕೆಗಳ ಚುನಾವಣಾ-ಸಂಬಂಧಿತ ನೀತಿಗಳು, ಕಂಟೆಂಟ್ ಮಾಡರೇಶನ್ ತಂಡಗಳು, ಒಳಗೊಂಡಿರುವ ಭಾಷೆಗಳು ಮತ್ತು ಅಂಕಿ ಸಂಖ್ಯೆ ಸೇರಿದಂತೆ ಮಾಹಿತಿಯನ್ನು ನೀಡುವಂತೆ ವಿನಂತಿಸಿದ್ದಾರೆ. ಸತ್ಯ ಮತ್ತು ಕಾಲ್ಪನಿಕ ಕಥೆಗಳ ನಡುವಿನ ವ್ಯತ್ಯಾಸವಿಲ್ಲದೇ ತಪ್ಪು ಮಾಹಿತಿ ಪ್ರಸಾರ ಮಾಡಲಾಗುತ್ತಿದೆ. ತಪ್ಪು ಮಾಹಿತಿಯು ಪ್ರಜಾಪ್ರಭುತ್ವದ ಆಶಯವನ್ನು ವಿಷಪೂರಿತಗೊಳಿಸುತ್ತದೆ. ನಿಮ್ಮ ವೇದಿಕೆಗಳು ಪ್ರಜಾಪ್ರಭುತ್ವವನ್ನು ಬಲಪಡಿಸಬೇಕು, ಅದನ್ನು ದುರ್ಬಲಗೊಳಿಸಬಾರದು ಎಂದು ಅವರು ಪತ್ರದಲ್ಲಿ ಬರೆದಿದ್ದಾರೆ.

ಸ್ವಂತ ಲಾಭಕ್ಕಾಗಿ ಸಾಮಾಜಿಕ ಜಾಲತಾಣ ಬಳಕೆ- ಸೆನೆಟರ್: ವಿಶ್ವದ ಅತಿದೊಡ್ಡ ಪ್ರಜಾಪ್ರಭುತ್ವವಾದ ಭಾರತದಲ್ಲಿ, ಮೆಟಾ-ಮಾಲೀಕತ್ವದ WhatsApp ಸೇರಿದಂತೆ ದೇಶದ ಪ್ರಬಲ ಸಾಮಾಜಿಕ ಜಾಲತಾಣದ ಪ್ಲಾಟ್‌ಫಾರ್ಮ್‌ಗಳು ತಪ್ಪುದಾರಿಗೆಳೆಯುವ ಮತ್ತು ಸುಳ್ಳು ವಿಷಯವನ್ನು ಪ್ರಚಾರ ಮಾಡುವುದರಲ್ಲಿ ಸುದೀರ್ಘ ದಾಖಲೆಯನ್ನು ಹೊಂದಿದೆ. ತಮ್ಮ ಸ್ವಂತ ಲಾಭಕ್ಕಾಗಿ ಕೆಲವು ರಾಜಕೀಯ ನಾಯಕರು ಸಾಮಾಜಿಕ ಜಾಲತಾಣದ ಪ್ಲಾಟ್‌ಫಾರ್ಮ್‌ಗಳಲ್ಲಿ ತಪ್ಪು ಮಾಹಿತಿ ಹರಡುವುದು ಕಂಡುಬಂದಿದೆ ಎಂದು ಸೆನೆಟರ್ ತಿಳಿಸಿದ್ದಾರೆ.

2024ರ ಭಾರತೀಯ ಚುನಾವಣೆಗೆ ಸಿದ್ಧವಾಗಲು ನೀವು ಯಾವುದಾದರೂ ಹೊಸ ನೀತಿಗಳನ್ನು ಜಾರಿಗೊಳಿಸಿದ್ದಿರಾ? ನೀವು ಪ್ರಸ್ತುತ ಅಸ್ಸಾಮಿ, ಬೆಂಗಾಲಿ, ಗುಜರಾತಿ, ಹಿಂದಿ, ಕನ್ನಡ, ಕಾಶ್ಮೀರಿ, ಕೊಂಕಣಿ, ಮಲಯಾಳಂ, ಮಣಿಪುರಿ, ಮರಾಠಿ, ನೇಪಾಳಿ, ಒರಿಯಾ, ಪಂಜಾಬಿ, ಸಂಸ್ಕೃತ, ಸಿಂಧಿ, ತಮಿಳು, ತೆಲುಗು, ಉರ್ದು, ಬೋಡೋ, ಸಂತಾಲಿ, ಮೈಥಿಲಿ ಮತ್ತು ಡೋಗ್ರಿ ಸೇರಿದಂತೆ ವಿವಿಧ ಭಾಷೆಗಳಲ್ಲಿ ಎಷ್ಟು ವಿಷಯ ಮಾಡರೇಟರ್‌ಗಳನ್ನು ನೇಮಿಸಿದ್ದೀರಿ ಎಂದು ಪ್ರಶ್ನೆ ಮಾಡಿದ್ದಾರೆ.

ಸಾಮಾಜಿಕ ಜಾಲತಾಣದ ಪ್ಲಾಟ್‌ಫಾರ್ಮ್‌ಗಳ ಚುನಾವಣಾ-ಸಂಬಂಧಿತ ನೀತಿಗಳು, ಒಳಗೊಂಡಿರುವ ಭಾಷೆಗಳು ಸೇರಿದಂತೆ ವಿಷಯ ಮಾಡರೇಶನ್ ತಂಡಗಳು ಮತ್ತು ಪೂರ್ಣ ಸಮಯ ಅಥವಾ ಅರೆಕಾಲಿಕ ಒಪ್ಪಂದಗಳಲ್ಲಿ ಮಾಡರೇಟರ್‌ಗಳ ಸಂಖ್ಯೆ ಮತ್ತು ಎಐ ರಚಿತವಾದ ವಿಷಯವನ್ನು ಗುರುತಿಸಲು ಅಳವಡಿಸಿಕೊಂಡ ಸಾಧನಗಳ ಕುರಿತು ಮಾಹಿತಿಯನ್ನು ನೀಡುವಂತೆ ಬೆನೆಟ್ ಪತ್ರದಲ್ಲಿ ವಿನಂತಿಸಿದ್ದಾರೆ.

ಇದನ್ನೂ ಓದಿ: ಕೆನಡಾದಲ್ಲಿ ಭಾರತೀಯ ಮೂಲದ ಒಂದೇ ಕುಟುಂಬದ ಮೂವರ ಸಾವು