ಕರಾಚಿ, ಪಾಕಿಸ್ತಾನ: ಜಪಾನ್ ಬೆಂಗಾವಲು ವಾಹನವನ್ನು ಗುರಿಯಾಗಿಸಿ ನಡೆಸಿದ ಆತ್ಮಾಹುತಿ ಬಾಂಬ್ ದಾಳಿಯಲ್ಲಿ ಇಬ್ಬರು ಸಾವನ್ನಪ್ಪಿರುವ ಘಟನೆ ಪಾಕಿಸ್ತಾನದ ಸಿಂಧ್ ಪ್ರಾಂತ್ಯದಲ್ಲಿ ನಡೆದಿದೆ. ಘಟನೆಯಲ್ಲಿ ಅದೃಷ್ಟವಶಾತ್ ಐವರು ಜಪಾನಿ ಪ್ರಜೆಗಳು ಪಾರಾಗಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಪೂರ್ವ ಡಿಐಜಿ ಅಜ್ಫಾರ್ ಮಹೆಸರ್ ಘಟನೆ ಕುರಿತು ಮಾತನಾಡಿದ್ದು, ಜಪಾನಿ ಪ್ರಜೆಗಳಿದ್ದ ವ್ಯಾನ್ಗೆ ಉಗ್ರಗಾಮಿ ಮೋಟರ್ಬೈಕ್ ಮೂಲಕ ಗುದ್ದಿದ್ದಾನೆ. ಲಂಧಿಯ ಮುರ್ಜಾಜ್ ಛೋರ್ಂಗಿಯ ಸಮೀಪದ ಪಾಕಿಸ್ತಾನ್ ಸುಜುಕಿ ಮೋಟರ್ಸ್ನಲ್ಲಿ ಈ ಜಪಾನಿ ಪ್ರಜೆಗಳು ಕಾರ್ಯ ನಿರ್ವಹಿಸುತ್ತಿದ್ದರು. ಘಟನೆಯಲ್ಲಿ ಐದು ಜಪಾನಿಗರು ಸುರಕ್ಷಿತವಾಗಿದ್ದು, ಅವರ ರಕ್ಷಣೆ ನಡೆಸುತ್ತಿದ್ದ ಖಾಸಗಿ ಸೆಕ್ಯೂರಿಟಿ ಗಾರ್ಡ್ ಗಾಯಗೊಂಡಿದ್ದಾರೆ. ಭಯೋತ್ಪಾದಕ ವಾಹನದ ಮುಂಭಾಗದಿಂದ ಗನ್ ತೆಗೆದು ದಾಳಿ ನಡೆಸಲು ಮುಂದಾದ ವೇಳೆ ಪೊಲೀಸ್ ಭದ್ರತಾ ಸಿಬ್ಬಂದಿ ಫೈರಿಂಗ್ ನಡೆಸಿ ಕೊಂದಿದ್ದಾರೆ.
ಸಿಟಿಡಿ ಡಿಐಜಿ ಆಸಿಫ್ ಐಜಾಜ್ ಶೇಖ್ ಮಾತನಾಡಿ, ಜಪಾನಿ ಪ್ರಜೆಗಳು ಇಬ್ಬರು ಸೆಕ್ಯೂರಿಟಿ ಗಾರ್ಡ್ಗಳೊಂದಿಗೆ ವ್ಯಾನ್ನಲ್ಲಿ ಪ್ರಯಾಣಿಸುವಾಗ ಉಗ್ರಗಾಮಿಗಳು ವ್ಯಾನ್ ಮೇಲೆ ದಾಳಿ ನಡೆಸಿದ್ದಾರೆ. ಸೆಕ್ಯೂರಿಟಿ ಗಾರ್ಡ್ ಒಬ್ಬ ಉಗ್ರಗಾಮಿಯನ್ನು ಕೊಂದಿದ್ದು, ಮತ್ತೊಬ್ಬ ಉಗ್ರನಿಗಾಗಿ ವ್ಯಾನ್ನ ಸಮೀಪ ಬರುವಾಗ ತನ್ನನ್ನು ತಾನೇ ಸ್ಪೋಟಿಸಿಕೊಂಡು ಸಾವನ್ನಪ್ಪಿದ್ದಾನೆ ಎಂದಿದ್ದಾರೆ.
ಘಟನೆಯ ದಾಳಿಯ ಹೊಣೆಯನ್ನು ಇದುವರೆಗೆ ಯಾರು ಹೊತ್ತಿಲ್ಲ. ಜಪಾನಿಗರು ಪ್ರಯಾಣಿಸುತ್ತಿದ್ದ ವ್ಯಾನ್ ಬುಲೆಟ್ ಪ್ರೂಫ್ ಹೊಂದಿತ್ತು ಎಂದು ವರದಿಯಲ್ಲಿ ತಿಳಿಸಲಾಗಿದೆ. ಘಟನೆಯಲ್ಲಿ ಗಾಯಗೊಂಡ ಇಬ್ಬರು ಸೆಕ್ಯೂರಿಟಿ ಗಾರ್ಡ್ ಮತ್ತು ದಾರಿಹೋಕನೊಬ್ಬ ಗಾಯಗೊಂಡಿದ್ದು, ಅವರನ್ನು ಜಿನ್ಹಾ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಇದರಲ್ಲಿ ಇಬ್ಬರ ಪರಿಸ್ಥಿತಿ ಗಂಭೀರವಾಗಿದೆ. ಯಾವುದೇ ವಿದೇಶಿಗರನ್ನು ಚಿಕಿತ್ಸೆಗೆ ಕರೆ ತಂದಿಲ್ಲ ಎಂದು ಆಸ್ಪತ್ರೆ ಅಧಿಕಾರಿಗಳು ತಿಳಿಸಿದೆ.
ಘಟನೆ ಕುರಿತು ಸಿಂದ್ ಸಾರಿಗೆ ಸಚಿವ ಶರ್ಜೀಲ್ ಇನಾಂ ಮೆಮೊನ್ ಖಂಡನೆ ವ್ಯಕ್ತಪಡಿಸಿದ್ದಾರೆ. ಈ ಘಟನೆಯ ಉದ್ದೇಶವೇನು, ಈ ಘಟನೆ ಹಿಂದಿರುವ ಮಾಸ್ಟರ್ಮೈಡ್ ಯಾರು ಎಂಬುದನ್ನು ಕಾನೂನು ಕಾರಿ ಅಧಿಕಾರಿಗಳು ಪತ್ತೆ ಮಾಡಬೇಕು ಎಂದು ಒತ್ತಾಯಿಸಿದ್ದಾರೆ.
ಮಾರ್ಚ್ 26ರಂದು ಖೈಬರ್ ಪಖ್ತುಂಖ್ವಾ ಪ್ರಾಂತ್ಯದಲ್ಲಿ ನಡೆದ ಪ್ರಮುಖ ಭಯೋತ್ಪಾದಕ ದಾಳಿಯಲ್ಲಿ ಮಹಿಳೆ ಮತ್ತು ಪಾಕಿಸ್ತಾನದ ಚಾಲಕ ಸೇರಿದಂತೆ ಐದು ಚೀನಿ ಪ್ರಜೆಗಳು ಮೃತಪಟ್ಟಿದ್ದರು. ಚೀನಾ ಪಾಕಿಸ್ತಾನ ಎಕಾನಾಮಿಕ್ ಕಾರಿಡಾರ್ (ಸಿಪಿಇಸಿ) ಸಂಬಂಧ ಕಾರ್ಯ ನಿರ್ವಹಿಸುತ್ತಿದ್ದ ಚೀನಾ ಪ್ರಜೆಗಳ ಮೇಲೆ ಸಣ್ಣ ಪ್ರತ್ಯೇಕ ಗುಂಪು ಮತ್ತು ತೆಹರಿಕ್- ಇ- ತಾಲೀಬಾನ್ ದಾಳಿ ನಡೆಸಿತು. (ಪಿಟಿಐ)
ಇದನ್ನೂ ಓದಿ: ಆತ್ಮಾಹುತಿ ದಾಳಿ: ಜೀವಭಯದಿಂದ ಪಾಕಿಸ್ತಾನ ತೊರೆಯಲು ಮುಂದಾದ ಚೀನಿ ಎಂಜಿನಿಯರ್ಗಳು
