ರಿಷಿಕೇಶ(ಉತ್ತರಾಖಂಡ): ಏಮ್ಸ್ ರಿಷಿಕೇಶ ವೈದ್ಯಕೀಯ ಕ್ಷೇತ್ರದಲ್ಲಿ ಹೊಸ ದಾಖಲೆಗಳನ್ನು ನಿರ್ಮಿಸುತ್ತಿದೆ. ಇದೀಗ ಇಲ್ಲಿನ ವೈದ್ಯರು 35 ವರ್ಷದ ಯಕೃತ್ ಕ್ಯಾನ್ಸರ್ನಿಂದ ಬಳಲುತ್ತಿರುವ ರೋಗಿಗೆ ರೊಬೊಟಿಕ್ ತಂತ್ರಜ್ಞಾನ ಬಳಸಿ ಯಶಸ್ವಿ ಶಸ್ತ್ರಚಿಕಿತ್ಸೆ ನಡೆಸಿದ್ದಾರೆ. ಶಸ್ತ್ರಚಿಕಿತ್ಸೆಯ 5 ದಿನಗಳ ನಂತರ ರೋಗಿಯನ್ನು ಆಸ್ಪತ್ರೆಯಿಂದ ಬಿಡುಗಡೆ ಮಾಡಲಾಗಿದೆ.
ಏಮ್ಸ್ ರಿಷಿಕೇಶ್‌ನಿಂದ ನೀಡಿರುವ ಮಾಹಿತಿಯ ಪ್ರಕಾರ, ರುದ್ರಪ್ರಯಾಗ ಜಿಲ್ಲೆಯ ದರ್ಮೋಲಾ ಗ್ರಾಮದ ನಿವಾಸಿ ಲಕ್ಷ್ಮಣ್ ಸಿಂಗ್ (34) ಎಂಬವರು ಕಳೆದ ಮೂರು ತಿಂಗಳಿಂದ ಜ್ವರದಿಂದ ಬಳಲುತ್ತಿದ್ದರು. ನಂತರ ಅವರು ಚಿಕಿತ್ಸೆಗಾಗಿ ಏಮ್ಸ್ ವೈದ್ಯರನ್ನು ಸಂಪರ್ಕಿಸಿದ್ದರು.
ಈ ಬಗ್ಗೆ ಏಮ್ಸ್ ರಿಷಿಕೇಶದ ಏಮ್ಸ್ ಸರ್ಜಿಕಲ್ ಗ್ಯಾಸ್ಟ್ರೋಎಂಟರಾಲಜಿ ವಿಭಾಗದ ಸಹಾಯಕ ಪ್ರಾಧ್ಯಾಪಕಿ ಡಾ.ಸುನೀತಾ ಸುಮನ್ ಮಾತನಾಡಿ, "ಒಪಿಡಿ ಮೂಲಕ ನಡೆಸಿದ ವಿವಿಧ ಪರೀಕ್ಷೆಗಳ ಆಧಾರದ ಮೇಲೆ ರೋಗಿ 'ಲಿವರ್ ಮ್ಯಾಲಿಗ್ನೆಂಟ್ ಮೆಸೆಂಚೈಮಲ್ ಟ್ಯೂಮರ್' ಎಂಬ ಅಪರೂಪದ ಕಾಯಿಲೆಯಿಂದ ಬಳಲುತ್ತಿರುವುದು ಕಂಡುಬಂದಿತ್ತು. ಇಂಥ ಕ್ಯಾನ್ಸರ್ ಅಪಾಯಕಾರಿ ಮಟ್ಟ ತಲುಪಿತ್ತು. ಇದು ಮಾರಣಾಂತಿಕವಾಗಿದ್ದು, ಯಕೃತ್‌ನಲ್ಲಿ ಗಡ್ಡೆಗಳು ರೂಪುಗೊಳ್ಳುತ್ತವೆ. ರೋಗದ ಗಂಭೀರತೆ ಕಂಡ ಹಿರಿಯ ಶಸ್ತ್ರಚಿಕಿತ್ಸಕ ಹಾಗೂ ವಿಭಾಗದ ಮುಖ್ಯಸ್ಥ ಡಾ.ನಿರ್ಜರ್ ರಾಜ್ ರೋಗಿಗೆ ಶೀಘ್ರ ಉಪಶಮನ ನೀಡಲು ಯಕೃತ್ ಛೇದನ ಶಸ್ತ್ರಚಿಕಿತ್ಸೆ ಅಗತ್ಯ ಎಂದು ನಿರ್ಧರಿಸಿದರು. ನಂತರ ರೋಬೋಟಿಕ್ ಸಹಾಯದಿಂದ ರೋಗಿಯ ಯಕೃತ್ತಿನ ಸುಮಾರು ಶೇ 35 ರಷ್ಟು ಭಾಗವನ್ನು ಎಚ್ಚರಿಕೆಯಿಂದ ತೆಗೆದುಹಾಕಲಾಯಿತು" ಎಂದು ವಿವರಿಸಿದರು.
ಶಸ್ತ್ರಚಿಕಿತ್ಸೆ ನಡೆಸಿದ ತಂಡದ ಮತ್ತೋರ್ವ ಸದಸ್ಯ ಹಾಗೂ ವಿಭಾಗದ ಸಹಾಯಕ ಪ್ರಾಧ್ಯಾಪಕ ಡಾ.ಲೋಕೇಶ್ ಅರೋರಾ ಮಾತನಾಡಿ, "ಪ್ರಮುಖ ರಕ್ತನಾಳಗಳು ಹತ್ತಿರವಿರುವುದರಿಂದ ಯಕೃತ್ ಛೇದನ ಶಸ್ತ್ರಕ್ರಿಯೆಯಲ್ಲಿ ಅಗತ್ಯ ನಿಖರತೆ ಕುರಿತು ವಿವರಿಸಿ, ಶಸ್ತ್ರಚಿಕಿತ್ಸೆಯಿಂದ ಇದನ್ನು ಸಾಧಿಸಬಹುದಾಗಿದೆ. ರೊಬೊಟಿಕ್ ತಂತ್ರಜ್ಞಾನದಿಂದ ಹತ್ತಿರದ ಅಂಗಗಳಿಗೆ ಹಾನಿಯಾಗುವ ಅಪಾಯ ತುಂಬಾ ಕಡಿಮೆ. ಈ ಶಸ್ತ್ರಚಿಕಿತ್ಸೆ ತುಂಬಾ ಕಷ್ಟಕರವಾಗಿತ್ತು. ಆದರೆ ತಂಡವಾಗಿ ಕೆಲಸ ಮಾಡಿ ಶಸ್ತ್ರಚಿಕಿತ್ಸೆ ಸಂಪೂರ್ಣವಾಗಿ ಯಶಸ್ವಿಯಾಗಿದೆ" ಎಂದು ಹೇಳಿದರು.
ಏಮ್ಸ್ ರಿಷಿಕೇಶದ ಕಾರ್ಯನಿರ್ವಾಹಕ ನಿರ್ದೇಶಕ ಪ್ರೊಫೆಸರ್ ಡಾ.ಮೀನು ಸಿಂಗ್ ಮಾತನಾಡಿ, ಯಶಸ್ವಿ ಶಸ್ತ್ರಚಿಕಿತ್ಸೆ ನಡೆಸಿದ ತಂಡದ ದಕ್ಷತೆಯನ್ನು ಶ್ಲಾಘಿಸಿದರು. ಈ ಶಸ್ತ್ರಚಿಕಿತ್ಸೆಯು ಆರೋಗ್ಯ ರಕ್ಷಣೆಯಲ್ಲಿ ಏಮ್ಸ್ ಋಷಿಕೇಶದ ಶ್ರೇಷ್ಠತೆಗೆ ಸಾಕ್ಷಿಯಾಗಿದೆ ಎಂದರು. ಪ್ರತಿ ಆಯುಷ್ಮಾನ್ ಕಾರ್ಡ್ ಹೊಂದಿರುವವರು ಮತ್ತು ಬಡವರಿಗೂ ಏಮ್ಸ್‌ನಿಂದ ವಿಶ್ವದರ್ಜೆಯ ಆರೋಗ್ಯ ಸೌಲಭ್ಯಗಳನ್ನು ಒದಗಿಸಲಾಗುತ್ತಿದೆ ಎಂದು ಮೀನು ಸಿಂಗ್ ತಿಳಿಸಿದರು.
ವೈದ್ಯಕೀಯ ಅಧೀಕ್ಷಕ ಪ್ರೊಫೆಸರ್ ಆರ್.ಬಿ.ಕಾಲಿಯಾ ಮಾತನಾಡಿ, ಯಕೃತ್ತಿನ ಛೇದನ ಶಸ್ತ್ರಚಿಕಿತ್ಸೆಯ ಯಶಸ್ಸಿನಲ್ಲಿ ಅಪಾಯದ ಸವಾಲನ್ನು ಸ್ವೀಕರಿಸುವಲ್ಲಿ ವೈದ್ಯರ ತಂಡ ಅಸಾಧಾರಣ ಕೌಶಲ್ಯ ಮತ್ತು ಬದ್ಧತೆ ಪ್ರದರ್ಶಿಸಿದೆ ಎಂದು ಹೇಳಿದರು.
ಏನಿದು ರೊಬೊಟಿಕ್ ಸರ್ಜರಿ?: ರೊಬೊಟಿಕ್ ಜೀರ್ಣಾಂಗ ಮತ್ತು ಹೆಪಟೊಬಿಲಿಯರಿ ಶಸ್ತ್ರಚಿಕಿತ್ಸಕ ಡಾ.ನಿರ್ಜರ್ ರಾಜ್ ಮಾತನಾಡಿ, ರೋಗಿಯ ಸುರಕ್ಷತೆ ಮತ್ತು ಸೌಕರ್ಯವನ್ನು ಖಾತ್ರಿಪಡಿಸುವ ಮೂಲಕ ರೊಬೊಟಿಕ್ ಶಸ್ತ್ರಚಿಕಿತ್ಸೆಯಿಂದ ಉತ್ತಮ ಫಲಿತಾಂಶಗಳನ್ನು ಸಾಧಿಸಬಹುದು. ಸಾಮಾನ್ಯ ಶಸ್ತ್ರಚಿಕಿತ್ಸಾ ವಿಧಾನದಲ್ಲಿ, ಹೊಟ್ಟೆಯಲ್ಲಿ ಉದ್ದವಾದ ಛೇದನ ಮಾಡಬೇಕಾಗುತ್ತದೆ ಮತ್ತು ಚಿಕಿತ್ಸೆಯ ನಂತರ ರೋಗಿಯು 10-15 ದಿನಗಳವರೆಗೆ ಆಸ್ಪತ್ರೆಯಲ್ಲಿ ಉಳಿಯಬೇಕಾಗುತ್ತದೆ. ರೊಬೊಟಿಕ್ ತಂತ್ರಜ್ಞಾನ ಬಳಸಿ ಮಾಡಿದ ಶಸ್ತ್ರಚಿಕಿತ್ಸೆಯಿಂದಾಗಿ ರೋಗಿ ಶೀಘ್ರವಾಗಿ ಚೇತರಿಸಿಕೊಳ್ಳುತ್ತಾನೆ. ಅಷ್ಟೇ ಅಲ್ಲ, 5ರಿಂದ 7 ದಿನಗಳಲ್ಲಿ ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಆಗುತ್ತಾರೆ. ಇದಲ್ಲದೆ, ಇದು ಸಾಮಾನ್ಯ ಶಸ್ತ್ರಚಿಕಿತ್ಸೆ ವಿಧಾನಕ್ಕಿಂತ 10 ಪಟ್ಟು ಉತ್ತಮವಾಗಿ ಕಾಣುತ್ತದೆ. ಅದರ ಸಹಾಯದಿಂದ, ಅತ್ಯಂತ ಸಂಕೀರ್ಣ ಸ್ಥಳಗಳಲ್ಲಿ ಸಹ ಶಸ್ತ್ರಚಿಕಿತ್ಸೆ ಮಾಡಬಹುದು ಎಂದು ವಿವರಿಸಿದರು.
ಇದನ್ನೂ ಓದಿ: ಬೆನ್ನಿಗೆ ಹೊಕ್ಕಿದ್ದ ಆರು ಇಂಚು ಉದ್ದದ ಚಾಕು ಹೊರಕ್ಕೆ: ಏಮ್ಸ್ನಲ್ಲಿ ಯಶಸ್ವಿ ಶಸ್ತ್ರಚಿಕಿತ್ಸೆ
