ಹೈದರಾಬಾದ್: 'ಭೂಲ್ ಭುಲಯ್ಯಾ 3'. ಇದು ಬಾಲಿವುಡ್ನ ಬಹುನಿರೀಕ್ಷಿತ ಚಿತ್ರ. ಕಾರ್ತಿಕ್ ಆರ್ಯನ್ ಹಾಗೂ ತೃಪ್ತಿ ದಿಮ್ರಿ ತೆರೆ ಹಂಚಿಕೊಂಡಿರುವ ಕಾಮಿಡಿ ಹಾರರ್ ಸಿನಿಮಾದ ಟೀಸರ್ ಇಂದು ಅನಾವರಣಗೊಂಡಿದೆ. ಇದು ಜನಪ್ರಿಯ ಹಾರರ್-ಕಾಮಿಡಿ ಫ್ರ್ಯಾಂಚೈಸ್‌ನ ಅಭಿಮಾನಿಗಳ ಉತ್ಸಾಹಕ್ಕೆ ಕಾರಣವಾಗಿದೆ. ಟೀಸರ್ಗಾಗಿ ಅಪಾರ ಸಂಖ್ಯೆಯ ಅಭಿಮಾನಿಗಳು, ಸಿನಿಪ್ರಿಯರು ಕಾತರರಾಗಿದ್ದರು.
ಅನೀಸ್ ಬಾಜ್ಮಿ ಆ್ಯಕ್ಷನ್ ಕಟ್ ಹೇಳಿರುವ ಭೂಲ್ ಭುಲಯ್ಯಾ 3 ಚಿತ್ರದ ಟೀಸರ್ ಅಲೌಕಿಕ ಪ್ರಪಂಚದ ಒಂದು ನೋಟ ಒದಗಿಸಿದೆ. ಟೀಸರ್ ಹಾರರ್, ಕಾಮಿಡಿ ಮತ್ತು ರೋಮಾಂಚಕ ತಿರುವುಗಳಿಂದ ಕೂಡಿದೆ. ಬಹುಬೇಡಿಕೆ ನಟ ಕಾರ್ತಿಕ್ ಆರ್ಯನ್ ನಿರ್ವಹಿಸಿರುವ ಪಾತ್ರ ರೂಹ್ ಬಾಬಾ ಹೊಸದೊಂದು ರಹಸ್ಯವನ್ನು ಎದುರಿಸಲು ಹಿಂತಿರುಗಿದ್ದು, ದೃಶ್ಯಗಳು ಪ್ರೇಕ್ಷಕರನ್ನು ಹಾಸ್ಯ ಮತ್ತು ಭಯಾನಕ ಲೋಕಕ್ಕೆ ತಳ್ಳಿದೆ.
ಭೂಲ್ ಭುಲೈಯ್ಯಾ 3ರಲ್ಲಿ ಜನಪ್ರಿಯ ನಟಿ ವಿದ್ಯಾ ಬಾಲನ್ ಅವರ ಪುನರಾಗಮನ ಸಿನಿಪ್ರಿಯರ ಉತ್ಸಾಹ ಕೆರಳಿಸಿದೆ. ಈ ಹಿಂದಿನ ಚಿತ್ರದಲ್ಲಿ ಅವ್ನಿ/ಮಂಜುಲಿಕಾ ಪಾತ್ರವನ್ನು ನಿರ್ವಹಿಸಿದ್ದರು. ನಟಿಯ ಪಾತ್ರ ಮೂಲ ಚಿತ್ರದಲ್ಲಿ ಹಾರರ್ ಮತ್ತು ಸೈಕಲಾಜಿಕಲ್ ಥ್ರಿಲ್ಲರ್ ಅಂಶಗಳನ್ನು ಒಳಗೊಂಡಿತ್ತು. ನಟಿಯ ಹಿಂದಿರುಗುವಿಕೆ ಅಭಿಮಾನಿಗಳಲ್ಲಿ ಕುತೂಹಲ ಹುಟ್ಟಿಸಿದ್ದು, ವಿದ್ಯಾಬಾಲನ್ ಮತ್ತು ಕಾರ್ತಿಕ್ ಆರ್ಯನ್ ಪಾತ್ರಗಳ ಸುತ್ತ ಕಥೆ ಸುತ್ತುತ್ತದೆ.
ಇದನ್ನೂ ಓದಿ: ಫಸ್ಟ್ ಡೇ, ಫಸ್ಟ್ ಶೋ: ಜೂ.ಎನ್ಟಿಆರ್ ನಟನೆಯ 'ದೇವರ' ವೀಕ್ಷಿಸಿದ ರಾಜಮೌಳಿ - Rajamouli Watches Devara
ಸಿನಿಮಾದ ಹಿಂದಿನ ಭಾಗಗಳನ್ನು ಯಶಸ್ವಿಗೊಳಿಸಿರುವ ಕ್ಲಾಸಿಕ್ ಅಂಶಗಳನ್ನು ಈ ಟೀಸರ್ ಒಳಗೊಂಡಿದೆ. ಸ್ಪೂಕಿ ಬ್ಯಾಕ್‌ಗ್ರೌಂಡ್ ಮ್ಯೂಸಿಕ್, ಕಾರ್ತಿಕ್ ಅವರ ಕಾಮಿಡಿ ಡೈಲಾಗ್ಸ್, ಹಾರರ್ ದೃಶ್ಯಗಳು ಟೀಸರ್ನ ಹೈಲೆಟ್ಸ್. ಜೊತೆಗೆ, ಕಾರ್ತಿಕ್ ಮತ್ತು ತೃಪ್ತಿ ನಡುವಿನ ಕೆಮಿಸ್ಟ್ರಿ ಕೂಡಾ ಚಿತ್ರದ ಪ್ರಮುಖ ಅಂಶ ಅಂತಲೇ ಹೇಳಬಹುದು. ಅನಿಮಲ್ ಸಿನಿಮಾ ಮೂಲಕ ಬೇಡಿಕೆ ಹೆಚ್ಚಿಸಿಕೊಂಡಿರುವ ದಿಮ್ರಿಯ ಮುಂದಿನ ಚಿತ್ರದ ಮೇಲೆ ಸಾಕಷ್ಟು ನಿರೀಕ್ಷೆಗಳಿವೆ. ಈ ಸಿನಿಮಾದಲ್ಲಿ ತೃಪ್ತಿ ವಿಭಿನ್ನ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂಬ ಭರವಸೆ ಇದೆ.
ಇದನ್ನೂ ಓದಿ: ದೇವೇಗೌಡರಿಂದ ಮಾಜಿ ಶಾಸಕನ ಪುತ್ರಿಯ ಚಿತ್ರ ನಿರ್ಮಾಣ ಸಂಸ್ಥೆ ಅನಾವರಣ - Harshini Cinemas Launched
2024ರಲ್ಲಿ ಬಿಡುಗಡೆ ಆಗಲಿರುವ ಭೂಲ್ ಭುಲೈಯಾ 3ರಲ್ಲಿ ಕಾರ್ತಿಕ್ ಆರ್ಯನ್ ತಮ್ಮ ಐಕಾನಿಕ್ ರೂಹ್ ಬಾಬಾ ಪಾತ್ರವನ್ನು ಪುನರಾವರ್ತಿಸಲಿದ್ದಾರೆ. ಸಿನಿಮಾದ ಹಿಂದಿನ ಭಾಗಗಳು ಹಾರರ್ ಮತ್ತು ಕಾಮಿಡಿಯ ವಿಶಿಷ್ಟ ಮಿಶ್ರಣಕ್ಕೆ ಹೆಸರುವಾಸಿಯಾಗಿದೆ. ಮೂರನೇ ಅಧ್ಯಾಯ ಕೂಡಾ ಭಯಾನಕ ಅಂಶಗಳೊಂದಿಗೆ ಹಾಸ್ಯವನ್ನೂ ಒಳಗೊಂಡಿದ್ದು, ವೀಕ್ಷಕರನ್ನು ಹಿಡಿತದಲ್ಲಿಟ್ಟುಕೊಳ್ಳುವಂತಹ ರೋಮಾಂಚಕ ಕಥಾಹಂದರವನ್ನು ಒಳಗೊಂಡಿದೆ. ಭೂಷಣ್ ಕುಮಾರ್ ನಿರ್ಮಿಸಿರುವ ಭೂಲ್ ಭುಲೈಯಾ 3 ಈ ವರ್ಷದ ಬಹು ನಿರೀಕ್ಷಿತ ಚಿತ್ರಗಳಲ್ಲಿ ಒಂದಾಗಿದೆ. ಮಾಧುರಿ ದೀಕ್ಷಿತ್ ಕೂಡಾ ನಟಿಸಿದ್ದು, ಸಿನಿಮಾ ಇದೇ ದೀಪಾವಳಿಗೆ ಬೆಳ್ಳಿತೆರೆ ಪ್ರವೇಶಿಸಲಿದೆ. ಸಿನಿಮಾ ಈಗಾಗಲೇ ಪೋಸ್ಟರ್, ಗ್ಲಿಂಪ್ಸ್ ಮೂಲಕ ಸಾಕಷ್ಟು ಕುತೂಹಲ ಕೆರಳಿಸಿದ್ದು, ಎಷ್ಟರ ಮಟ್ಟಿಗೆ ಗೆಲ್ಲಲಿದೆ ಅನ್ನೋದನ್ನು ಕಾದು ನೋಡಬೇಕಿದೆ. ಸದ್ಯ ಟೀಸರ್ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ಸದ್ದು ಮಾಡುತ್ತಿದೆ.
