ಪ್ರೀತಿ ಖಚಿತಪಡಿಸಿದ ರಶ್ಮಿಕಾ ಮಂದಣ್ಣ : ತಾವು ಆಕರ್ಷಿತರಾಗುವ ಗುಣ ಬಹಿರಂಗಪಡಿಸಿದ ನಟಿ

''ನನಗೆ ಸಿಗುವ ಖ್ಯಾತಿಯ ಹೊರತಾಗಿಯೂ, ನಾನಿನ್ನೂ ಓರ್ವ ಮಗಳು, ಸಹೋದರಿ ಮತ್ತು ಸಂಗಾತಿ'' - ನಟಿ ರಶ್ಮಿಕಾ ಮಂದಣ್ಣ.

ದಕ್ಷಿಣ ಚಿತ್ರರಂಗದ ಜನಪ್ರಿಯ ನಟ ವಿಜಯ್ ದೇವರಕೊಂಡ ಜೊತೆ ಡೇಟಿಂಗ್​​ನಲ್ಲಿದ್ದಾರೆ ಎಂಬ ವದಂತಿ ಬಹುಭಾಷಾ ನಟಿ ರಶ್ಮಿಕಾ ಮಂದಣ್ಣ ಅವರ ಸುತ್ತ ಸುತ್ತುವರೆದಿದೆ. ಇದೀಗ ತಾವು ರಿಲೇಶನ್​ಶಿಪ್​ನಲ್ಲಿರುವುದಾಗಿ ದೃಢಪಡಿಸಿದ್ದಾರೆ. ಅದಾಗ್ಯೂ, ತಮ್ಮ ಪಾರ್ಟ್ನರ್ ಹೆಸರನ್ನು ಬಹಿರಂಗಪಡಿಸಿಲ್ಲ.

ಇತ್ತೀಚೆಗೆ ಮಾಧ್ಯಮವೊಂದರೊಂದಿಗೆ ಮಾತನಾಡುವ ವೇಳೆ, ರಶ್ಮಿಕಾ ತಮ್ಮ ಜೀವನದ ಬಗ್ಗೆ ಹಂಚಿಕೊಂಡರು. ಸಂಗಾತಿಯಲ್ಲಿ ತಾವು ಇಷ್ಟಪಡುವ ಗುಣಗಳು ಮತ್ತು ವೈಯಕ್ತಿಕ ಸಂಬಂಧಗಳೊಂದಿಗೆ ವೃತ್ತಿಜೀವನದ ಖ್ಯಾತಿಯನ್ನು ಬ್ಯಾಲೆನ್ಸ್​ ಮಾಡುವ ಬಗ್ಗೆಯೂ ಮಾತನಾಡಿದ್ದಾರೆ.

ತಮ್ಮ ''ಹ್ಯಾಪಿ ಪ್ಲೇಸ್​​'' ಬಗ್ಗೆ ಮಾತನಾಡಿದ ರಶ್ಮಿಕಾ, "ಮನೆ ನನ್ನ ಸಂತೋಷದ ಸ್ಥಳ. ಯಶಸ್ಸು ಬರಬಹುದು, ಹಾಗೇ ಹೋಗಬಹುದು. ಆದ್ರೆ ಮನೆ ಶಾಶ್ವತ. ನಾನು ಆ ಸ್ಥಳದಿಂದ ಕೆಲಸ ಮಾಡುತ್ತೇನೆ. ನನಗೆ ಸಿಗುವ ಖ್ಯಾತಿಯ ಹೊರತಾಗಿಯೂ, ನಾನಿನ್ನೂ ಓರ್ವ ಮಗಳು, ಸಹೋದರಿ ಮತ್ತು ಸಂಗಾತಿ. ನನ್ನ ಆ ವೈಯಕ್ತಿಕ ಜೀವನವನ್ನು ನಿಜವಾಗಿಯೂ ಗೌರವಿಸುತ್ತೇನೆ. ನಾನೀಗ ಎರಡೂ ಪ್ರಪಂಚಗಳಲ್ಲಿ (ವೈಯಕ್ತಿಕ ಮತ್ತು ವೃತ್ತಿಜೀವನ) ಅತ್ಯುತ್ತಮವಾಗಿ ಜೀವಿಸುತ್ತಿದ್ದೇನೆ. ನಾನು ನನ್ನ ಸ್ವಂತ ಜೀವನದೊಂದಿಗೆ ಈ ವೈಯಕ್ತಿಕ ಜೀವನವನ್ನೂ ಕಾಪಾಡಿಕೊಳ್ಳುವ ವ್ಯಕ್ತಿ ಎಂದು ಹೇಳಲಿಚ್ಛಿಸುತ್ತೇನೆ" ಎಂದರು.

ಪುರುಷನಲ್ಲಿ ಯಾವ ಗುಣಗಳು ಆಕರ್ಷಕ ಎಂದೆನಿಸುತ್ತವೆ ಎಂಬ ಪ್ರಶ್ನೆ ರಶ್ಮಿಕಾರಿಗೆ ಎದುರಾದಾಗ, "ಕಣ್ಣುಗಳು ಆತ್ಮಕ್ಕೆ ಕಿಟಕಿ. ನಾನದರಲ್ಲಿ ನಂಬಿಕೆ ಇಡುತ್ತೇನೆ. ನಗುಮುಖ ಹೊಂದಿರುವ ಜನರು ನನಗೆ ಹಿಡಿಸುತ್ತಾರೆ. ಸಹಜವಾಗಿ, ಯಾರೇ ಇರಲಿ ತಮ್ಮ ಸುತ್ತಲಿನ ಜನರನ್ನು ಗೌರವಿಸುವ ವ್ಯಕ್ತಿ ನನಗೆ ಇಷ್ಟ ಆಗುತ್ತಾರೆ'' ಎಂದು ತಿಳಿಸಿದರು.

ರಶ್ಮಿಕಾ ಮಂದಣ್ಣ ಹಾಗೂ ವಿಜಯ್ ದೇವರಕೊಂಡ ವಿವಿಧ ಕಾರ್ಯಕ್ರಮಗಳಲ್ಲಿ ಒಟ್ಟಿಗೆ ಕಾಣಿಸಿಕೊಳ್ಳುವ ಮೂಲಕ ಡೇಟಿಂಗ್ ಊಹಾಪೋಹಗಳಿಗೆ ಕಾರಣರಾಗಿದ್ದಾರೆ. ಕಳೆದ ವರ್ಷ ವಿಜಯ್ ಅವರ ಕುಟುಂಬದೊಂದಿಗೆ ರಶ್ಮಿಕಾ ದೀಪಾವಳಿ ಆಚರಿಸಿದರು. ಹಾಗೇ ಅವರೊಂದಿಗೆ ಪುಷ್ಪ 2: ದಿ ರೂಲ್ ವೀಕ್ಷಿಸಿದ್ದು ಕಂಡುಬಂದಿದೆ.

ಇದನ್ನೂ ಓದಿ: ಸೈಫ್ ಅಲಿ ಖಾನ್ ಕೇಸ್​​: 'ಸಾಕಷ್ಟು ಸಾಕ್ಷ್ಯಾಧಾರಗಳು ಸಿಕ್ಕಿವೆ' - ಮುಂಬೈ ಪೊಲೀಸ್

ಹಿಂದಿನ ಸಂದರ್ಶನವೊಂದರಲ್ಲಿ, "ನನಗೆ 35 ವರ್ಷ. ನಾನಿನ್ನು ಸಿಂಗಲ್​ ಆಗಿರುತ್ತೇನೆ ಎಂದು ನೀವು ಭಾವಿಸುತ್ತೀರಾ?" ಎಂದು ವಿಜಯ್ ತಿಳಿಸಿದ್ದರು. ಸೂಕ್ತ ಸಮಯ ಬರುವವರೆಗೂ ತಮ್ಮ ಲವ್​ ಲೈಫ್​​ ಬಗ್ಗೆ ಮಾತನಾಡಲು ಇಚ್ಛಿಸೋದಿಲ್ಲ ಎಂದು ತಿಳಿಸಿದ್ದರು.

ಇದನ್ನೂ ಓದಿ: ಮಹೇಶ್ ಬಾಬು ರಾಜಮೌಳಿ ಸಿನಿಮಾ: ತಂಡದವರಿಗೆ ಕಂಡೀಷನ್ಸ್ ಅಪ್ಲೈ; ಏನದು?

ಸಿನಿಮಾ ಬಗ್ಗೆ ಗಮನಿಸೋದಾದರೆ, ರಶ್ಮಿಕಾ ಮಂದಣ್ಣ ಲಕ್ಷ್ಮಣ್ ಉಟೇಕರ್ ನಿರ್ದೇಶನದ ಐತಿಹಾಸಿಕ ಆ್ಯಕ್ಷನ್ ಸಿನಿಮಾ 'ಛಾವಾ'ದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಛತ್ರಪತಿ ಸಂಭಾಜಿ ಮಹಾರಾಜ್ ಅವರ ಜೀವನವನ್ನು ಆಧರಿಸಿದ ಈ ಚಿತ್ರದಲ್ಲಿ ವಿಕ್ಕಿ ಕೌಶಲ್ ಮುಖ್ಯ ಪಾತ್ರದಲ್ಲಿ ಮತ್ತು ಅಕ್ಷಯ್ ಖನ್ನಾ ಚಕ್ರವರ್ತಿ ಔರಂಗಜೇಬ್ ಪಾತ್ರದಲ್ಲಿ ನಟಿಸಿದ್ದಾರೆ. ಛಾವಾ ಫೆಬ್ರವರಿ 14ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.