ಹೈದರಾಬಾದ್: ವಿದೇಶದಲ್ಲಿ ಉನ್ನತ ಶಿಕ್ಷಣ ಪಡೆಯಬೇಕು ಎಂಬುದು ಅನೇಕ ಭಾರತೀಯ ವಿದ್ಯಾರ್ಥಿಗಳ ಕನಸಾಗಿರುತ್ತದೆ. ಇದಕ್ಕೆ ಪ್ರಮುಖ ಆಯ್ಕೆ ಸ್ಥಾನವಾಗಿರುವುದು ಅಮೆರಿಕ. ಆದರೆ, ಇತ್ತೀಚಿನ ರಾಜಕೀಯ ಬದಲಾವಣೆ ಮತ್ತು ವಲಸೆ ನೀತಿಗಳು ವೀಸಾ ನಿಯಮಾವಳಿ, ಉದ್ಯೋಗ ಅವಕಾಶ ಮತ್ತು ಅರೆಕಾಲಿಕ ಕೆಲಸದ ಬಗ್ಗೆ ಕಾಳಜಿ ಮೂಡಿಸಿದೆ. ಈ ಎಲ್ಲ ಅನಿಶ್ಚಿತತೆ ಹೊರತಾಗಿ ವಿದೇಶದಲ್ಲಿ ಓದಲು ಇದು ಸೂಕ್ತ ಸಮಯ ಎನ್ನುತ್ತಾರೆ ತಜ್ಞರು.
ಅನುಮಾನಗಳಿಗೆ ತೆರೆ: ಅಮೆರಿಕ ಅಧ್ಯಕ್ಷ ಡೋನಾಲ್ಡ್ ಟ್ರಂಪ್ ಅವಧಿಯಲ್ಲಿ ಅಂತಾರಾಷ್ಟ್ರೀಯ ವಿದ್ಯಾರ್ಥಿಗಳು ಉನ್ನತ ಶಿಕ್ಷಣವನ್ನು ಅಲ್ಲಿ ಪೂರೈಸಲು ಸವಾಲು ಎದುರಿಸಬಹುದು. ಅವರ ವೀಸಾ ಮತ್ತು ಉದ್ಯೋಗದಲ್ಲಿ ಮಿತಿಗಳು ಎದುರಿಸಬಹುದು ಎಂಬ ಊಹಾಪೋಹ ಹರಡಿದೆ. ನಿಯಮಗಳು ಬಿಗಿಯಾಗಿರುವುದು ಸಹಜ. ಸರಿಯಾದ ದಾಖಲೀಕರಣವಿಲ್ಲದೇ ಇರುವವರು ಪ್ರಾಥಮಿಕವಾಗಿ ಸಮಸ್ಯೆ ಎದುರಿಸಬಹುದು. ಆದರೆ, ಸರಿಯಾದ ವೀಸಾ ಮತ್ತು ಕಾನೂನಾತ್ಮಕ ಅನುಮತಿಗಳಿದ್ದವರಿಗೆ ಯಾವ ಸಮಸ್ಯೆ ಅಥವಾ ತೊಂದರೆ ಎದುರಾಗುವುದಿಲ್ಲ.
ಸರ್ಕಾರಿ ದತ್ತಾಂಶದ ಪ್ರಕಾರ, ಕಳೆದ ಐದು ವರ್ಷದಲ್ಲಿ ಭಾರತದಿಂದ ವಿದೇಶಕ್ಕೆ ಶಿಕ್ಷಣ ಪಡೆಯುವ ಉದ್ದೇಶದಿಂದ ಹೋಗುವವರ ಸಂಖ್ಯೆ ಶೇ 50ರಷ್ಟು ಹೆಚ್ಚಿದೆ. 2024ರಲ್ಲಿ ಸರಿಸುಮಾರು 9 ಲಕ್ಷ ವಿದ್ಯಾರ್ಥಿಗಳು ಶಿಕ್ಷಣಕ್ಕಾಗಿ ವಿದೇಶ ಪ್ರಯಾಣ ಬೆಳೆಸಿದ್ದಾರೆ. ಇದರಲ್ಲಿ ಅಮೆರಿಕ ಮೊದಲ ಸ್ಥಾನದಲ್ಲಿದ್ದರೆ ನಂತರದ ಸ್ಥಾನದಲ್ಲಿ ಕೆನಡಾ, ಯುಕೆ ಮತ್ತು ಆಸ್ಟ್ರೇಲಿಯಾ ಇದೆ.
ವಿದೇಶದಲ್ಲಿ ಓದು ಏಕೆ?
- ಜಾಗತಿಕ ವೇದಿಕೆ ಜೊತೆಗೆ ಉದ್ಯೋಗಾವಕಾಶ
- ಮೌಲ್ಯಯುತ ಔದ್ಯೋಗಿಕ ನೆಟ್ವರ್ಕ್
- ಭಾಷಾ ಸುಲಲಿತತೆ ವೃದ್ದಿ
- ಹೊಸ ಪರಿಸರ ಅಳವಡಿಕೆಗೆ ಅನುಕೂಲ
- ಗಳಿಕ ಸಾಮರ್ಥ್ಯದ ಹೆಚ್ಚುವಿಕೆ
ಎದುರಾಗುವ ಸವಾಲುಗಳು ಯಾವುವು?
- ಹೆಚ್ಚಿನ ಟ್ಯೂಷನ್ ಶುಲ್ಕ ಮತ್ತು ಜೀವನ ವೆಚ್ಚ
- ಭಾಷಾ ತೊಡಕು
- ಸಾಂಸ್ಕೃತಿಕ ಮತ್ತು ಶೈಕ್ಷಣಿಕ ಹೊಂದಾಣಿಕೆ
ಅರೆಕಾಲಿಕ ಉದ್ಯೋಗದ ನೈಜತೆ: ಅಂತಾರಾಷ್ಟ್ರೀಯ ವಿದ್ಯಾರ್ಥಿಗಳು ವಿದೇಶಿ ನೆಲದಲ್ಲಿ ತಮ್ಮ ಶೈಕ್ಷಣಿಕ ಜೀವನದ ಜೊತೆಗೆ ಅಲ್ಲಿನ ಜೀವನ ಶೈಲಿ ವೆಚ್ಚಕ್ಕೆ ಹೊಂದಾಣಿಕೆಗಾಗಿ ಚಿಲ್ಲರೆ, ಅತಿಥ್ಯ, ಶಿಕ್ಷಣ, ಗ್ರಾಹಕ ಸೇವೆ ಮತ್ತು ಡೆಲಿವರಿ ಸೇವೆಯಲ್ಲಿ ಅರೆಕಾಲಿಕ ಉದ್ಯೋಗ ನಿರ್ವಹಣೆ ಮಾಡುತ್ತಾರೆ. ಆದರೆ, ಇದೀಗ ವಲಸಿಗ ನೀತಿಯಲ್ಲಿ ಕಟ್ಟುನಿಟ್ಟಾದ ಕ್ರಮ ತೆಗೆದುಕೊಂಡಿರುವುದರಿಂದ ಈ ಅರೆಕಾಲಿಕ ಉದ್ಯೋಗ ನಿರ್ವಹಣೆ ಸವಾಲಿನಿಂದ ಕೂಡಿರುವ ಸಾಧ್ಯತೆ ಇದೆ.
ಈ ಅಂಶದ ಬಗ್ಗೆ ಇರಲಿ ಗಮನ
ಶಿಕ್ಷಣಕ್ಕೆ ಆದ್ಯತೆ: ಈ ಹಿಂದೆ ಪದವಿ ಪಡೆಯುವ ವೇಳೆ ವಲಸಿಗ ವಿದ್ಯಾರ್ಥಿಗಳು ಅರೆಕಾಲಿಕ ಉದ್ಯೋಗ ನಿರ್ವಹಣೆ ಮಾಡುತ್ತಿದ್ದರು. ಆದಾಗ್ಯೂ, ಇದೀಗ ಮತ್ತಷ್ಟು ಕಟ್ಟುನಿಟ್ಟಿನ ಕ್ರಮ ಜಾರಿಯಾಗಿದ್ದು, ವಿದ್ಯಾರ್ಥಿಗಳು ತಮ್ಮ ಕೋರ್ಸ್ ಮೇಲೆ ಹೆಚ್ಚಿನ ಗಮನ ಹರಿಸಬೇಕಿದೆ. ಇದರಿಂದಾಗಿ ಅವರು ಶೈಕ್ಷಣಿಕ ಜೀವನದಲ್ಲಿ ಉತ್ತಮ ಪ್ರದರ್ಶನ ನೀಡಿ ಪದವಿ ಬಳಿಕ ಒಳ್ಳೆಯ ಉದ್ಯೋಗಾವಕಾಶ ಪಡೆಯಬಹುದು
ವೀಸಾ ನಿಯಮದಲ್ಲಿ ಬದಲಾವಣೆ: ಎಫ್1 (ವಿದ್ಯಾರ್ಥಿ ವೀಸಾ), ಎಚ್1ಬಿ (ವರ್ಕ್ ವೀಸಾ) ಮತ್ತು ಒಪಿಟಿ (ಆಪ್ಷನಲ್ ಪ್ರಾಕ್ಟಿಸ್ ಟ್ರೈನಿಂಗ್) ನಿಯಮಗಳಲ್ಲಿ ಸದ್ಯ ಯಾವುದೇ ಬದಲಾವಣೆ ಮಾಡಿಲ್ಲ. ಕೇವಲ ಅಕ್ರಮ ವಲಸಿಗರನ್ನು ಮಾತ್ರ ಗಡೀಪಾರು ಮಾಡಲಾಗುತ್ತಿದೆ. ಇದು ಸರಿಯಾದ ದಾಖಲಾತಿ ಹೊಂದಿರುವ ವಿದ್ಯಾರ್ಥಿಗಳ ಮೇಲೆ ಪರಿಣಾಮ ಬೀರದು.
ಕೆಲಸ ಮಾಡಲು ಯಾವಾಗಲೂ ನಿರ್ಬಂಧ ಇದೆ: ವಿದ್ಯಾರ್ಥಿಗಳು ಅರೆಕಾಲಿಕ ಉದ್ಯೋಗ ನಿರ್ವಹಣೆಗೆ ಅಮೆರಿಕ ಸದಾ ನಿರ್ಬಂಧ ವಿಧಿಸಿದೆ. ಈ ಹಿಂದೆ ಅನೇಕ ಬಾರಿ ಹೆಚ್ಚುವರಿ ಆದಾಯಕ್ಕಾಗಿ ಈ ನಿಯಮ ಮುರಿಯಲಾಗಿದೆ. ಆದರೆ, ಇದೀಗ ಕಣ್ಗಾವಲು ಹೆಚ್ಚಿದ್ದು, ವಿದ್ಯಾರ್ಥಿಗಳು ನಿಯಮ ಪಾಲನೆ ಕಟ್ಟು ನಿಟ್ಟಾಗಿ ಅನುಸರಿಸಬೇಕಿದೆ.
ಕಡಿಮೆ ವೆಚ್ಚದಲ್ಲಿ ಉತ್ತಮ ವಿವಿಗಳು: ಅಮೆರಿಕದಲ್ಲಿ 4,000 ವಿಶ್ವವಿದ್ಯಾಲಯಗಳಿದ್ದು ವಿದ್ಯಾರ್ಥಿಗಳು ಟ್ಯೂಷನ್ ಶುಲ್ಕ ಹೊರೆಯಾಗದಂತೆ ನೋಡಿಕೊಳ್ಳಲು ಸಣ್ಣ ನಗರಗಳಲ್ಲಿನ ಸಂಸ್ಥೆಗಳ ಹುಡುಕಾಟ ನಡೆಸುತ್ತಾರೆ. ಇಲ್ಲಿ ದೊಡ್ಡ ನಗರದಲ್ಲಿನ ವಿಶ್ವವಿದ್ಯಾಲಯಗಳಿಗಿಂತ ಕಡಿಮೆ ವೆಚ್ಚದಲ್ಲಿ ಉತ್ತಮ ಸಂಸ್ಥೆಗಳು ಲಭ್ಯವಾಗುತ್ತದೆ.
ಇತರ ದೇಶಗಳಲ್ಲಿ ಮತ್ತಷ್ಟು ಸುಲಭದಾಯಕ ವ್ಯವಸ್ಥೆ: ಕೆನಡಾ, ಯುಕೆ, ಆಸ್ಟ್ರೇಲಿಯಾದಂತಹ ದೇಶದಲ್ಲಿ ಅರೆಕಾಲಿಕ ಉದ್ಯೋಗ ಮಾಡಲು ಅನುಮತಿ ಇದೆ. ಇದೀಗ ಅಲ್ಲಿನ ಕಾನೂನಾತ್ಮಕ ಕೆಲಸದ ಸಮಯವನ್ನು ಹೆಚ್ಚು ಮಾಡುವ ಮೂಲಕ ನಿಯಮಗಳನ್ನು ಬಿಗಿ ಗೊಳಿಸುವ ಪ್ರಯತ್ನ ಮಾಡಲಾಗುತ್ತಿದೆ.
ಉದ್ಯೋಗ ಮಾರುಕಟ್ಟೆ ಸುಧಾರಣೆ: ಅಮೆರಿಕವನ್ನು ಮತ್ತೊಮ್ಮೆ ಗ್ರೇಟ್ ಮಾಡುವ ಪಾಲಿಸಿ ಅಡಿ, ವಲಸಿಗರ ಗಡೀಪಾರು ಮಾಡುತ್ತಿರುವುದರಿಂದ ಮತ್ತಷ್ಟು ಹೊಸ ಅವಕಾಶಗಳು ಲಭ್ಯವಾಗುತ್ತದೆ. ಪದವಿ ಬಳಿಕ ವಿದ್ಯಾರ್ಥಿಗಳಿಗೆ ಉದ್ಯೋಗಾವಕಾಶಗಳು ಹೆಚ್ಚಲಿವೆ.
ಸುವರ್ಣಾವಕಾಶ : ನಿಯಮಗಳನ್ನು ಪಾಲಿಸುವ ವಿದ್ಯಾರ್ಥಿಗಳಿಗೆ ವಿದೇಶದಲ್ಲಿ ಓದಲು ಇದು ಸರಿಯಾದ ಸಮಯವಾಗಿದೆ. ಕೇವಲ ಶೈಕ್ಷಣಿಕ ವಿಷಯದ ಮೇಲೆ ಹೆಚ್ಚು ಗಮನಹರಿಸುವುದರಿಂದ ಉದ್ಯೋಗದ ದಾರಿಯಲ್ಲಿ ಪ್ರಯೋಜನ ಪಡೆಯಬಹುದು. ಇದು ಮುಂದೆ ಅಮೆರಿಕದಲ್ಲಿ ಉದ್ಯೋಗ ಅವಕಾಶ ಪಡೆಯಲು ಕೂಡ ನೆರವಾಗುತ್ತದೆ.
ಇದನ್ನೂ ಓದಿ: ಬೆಳಗಾವಿಯಲ್ಲಿದೆ ಇ-ಗ್ರಂಥಾಲಯ: ಪುಸ್ತಕ, ಕಂಪ್ಯೂಟರ್, ವೈಫೈ ಫ್ರೀ; ಸ್ಪರ್ಧಾತ್ಮಕ ಪರೀಕ್ಷಾರ್ಥಿಗಳ ತಾಲೀಮು ಕೇಂದ್ರ
ಇದನ್ನೂ ಓದಿ: ಹಾವೇರಿ ವಿಶ್ವವಿದ್ಯಾಲಯ ಮುಚ್ಚದಂತೆ ವಿದ್ಯಾರ್ಥಿಗಳ ಮನವಿ
