ತೆರಿಗೆಗಳು, ಸಾರಿಗೆ ವೆಚ್ಚಗಳು, ಸ್ಥಳೀಯ ಬೇಡಿಕೆ ಮತ್ತು ಸರ್ಕಾರದ ಪಾಲಸಿಗಳು ಸೇರಿದಂತೆ ಇತರೆ ಅಂಶಗಳಿಂದಾಗಿ ಚಿನ್ನದ ಬೆಲೆ ಆಯಾ ರಾಜ್ಯಗಳಲ್ಲಿ ಬದಲಾಗುತ್ತವೆ. ಕಡಿಮೆ ತೆರಿಗೆಗಳು ಮತ್ತು ಮಾರುಕಟ್ಟೆ ಸ್ಪರ್ಧೆಯನ್ನು ಹೊಂದಿರುವ ರಾಜ್ಯಗಳಲ್ಲಿ ಹೆಚ್ಚಿನ ತೆರಿಗೆಗಳು ಮತ್ತು ಸೀಮಿತ ಮಾರುಕಟ್ಟೆ ಸ್ಪರ್ಧೆ ಇರುವ ರಾಜ್ಯಗಳಿಗೆ ಹೋಲಿಸಿದರೆ ಚಿನ್ನದ ಬೆಲೆ ಅಗ್ಗವಾಗಿರುತ್ತದೆ.
ಹಳದಿ ಲೋಹದ ಮಾರಾಟದಲ್ಲಿ ಹೆಚ್ಚು ಪಾರದರ್ಶಕತೆ ತರಲು ರಾಜ್ಯಗಳಾದ್ಯಂತ 'ಒಂದು ರಾಷ್ಟ್ರ, ಒಂದು ದರ' (ONOR) ನೀತಿಯನ್ನು ಜಾರಿಗೆ ತರಲು ಆಭರಣ ಉದ್ಯಮ ಒಗ್ಗೂಡಿದೆ. ಇನ್ನು ರತ್ನ ಮತ್ತು ಆಭರಣ ಮಂಡಳಿ (ಜಿಜೆಸಿ) ಸೆಪ್ಟೆಂಬರ್‌ನಲ್ಲಿ ಸಭೆ ಸೇರಲಿದ್ದು, ಬಳಿಕ ಅಧಿಕೃತವಾಗಿ ಘೋಷಣೆಯಾಗುವ ಸಾಧ್ಯತೆ ಇದೆ.
ದೇಶಾದ್ಯಂತ ಏಕರೂಪ ಚಿನ್ನದ ದರ: "ಒಂದು ರಾಷ್ಟ್ರ, ಒಂದು ಚಿನ್ನದ ದರ" ನೀತಿಯು ದೇಶಾದ್ಯಂತ ಚಿನ್ನದ ಬೆಲೆಗಳನ್ನು ಪ್ರಮಾಣೀಕರಿಸುವ ಗುರಿಯನ್ನು ಹೊಂದಿದೆ. ಇದು ಹೆಚ್ಚಿನ ಪಾರದರ್ಶಕತೆ ಮತ್ತು ನ್ಯಾಯಸಮ್ಮತತೆಗಾಗಿ ಪ್ರಾದೇಶಿಕ ವ್ಯತ್ಯಾಸಗಳನ್ನು ತೆಗೆದುಹಾಕುತ್ತದೆ. ಈ ನೀತಿಯು ದೇಶಾದ್ಯಂತ ಒಂದೇ ಚಿನ್ನದ ದರ ಇರುವಂತೆ ಮಾಡಲು ಪ್ರಯತ್ನಿಸುತ್ತದೆ. ವಿವಿಧ ಸ್ಥಳೀಯ ತೆರಿಗೆಗಳು ಮತ್ತು ಮಾರುಕಟ್ಟೆ ಪರಿಸ್ಥಿತಿಗಳಿಂದ ಉಂಟಾಗುವ ಪ್ರಾದೇಶಿಕ ವ್ಯತ್ಯಾಸಗಳನ್ನು ತೆಗೆದುಹಾಕುತ್ತದೆ. ಪ್ರಸ್ತುತ, ವಿಭಿನ್ನ ತೆರಿಗೆ ಪದ್ಧತಿಯಿಂದ ಮತ್ತು ಸ್ಥಳೀಯ ಬೇಡಿಕೆ -ಪೂರೈಕೆ ಡೈನಾಮಿಕ್ಸ್‌ ಕಾರಣದಿಂದಾಗಿ ಭಾರತದಲ್ಲಿ ಚಿನ್ನದ ಬೆಲೆಗಳು ಒಂದು ರಾಜ್ಯದಿಂದ ಇನ್ನೊಂದಕ್ಕೆ ಗಮನಾರ್ಹವಾಗಿ ಬದಲಾಗುತ್ತದೆ.
ಇದು ಖರೀದಿದಾರರು ಹಾಗೂ ಮಾರಾಟಗಾರರಿಗೆ ಗೊಂದಲ ಮತ್ತು ಅನಾನುಕೂಲತೆಗೆ ಕಾರಣವಾಗಿದೆ. ಏಕೆಂದರೆ ಅವರು ಏರಿಳಿತದ ಬೆಲೆಗಳ ಮೂಲಕ ನ್ಯಾವಿಗೇಟ್ ಮಾಡುತ್ತಾರೆ. ಆಭರಣ ಉದ್ಯಮವು ಜಿಎಸ್ಟಿ ಸೇರಿದಂತೆ ಪಾರದರ್ಶಕತೆ ಕ್ರಮಗಳನ್ನು ಅಳವಡಿಸಿಕೊಳ್ಳುವಲ್ಲಿ ಮತ್ತು ಕಡ್ಡಾಯ ಹಾಲ್‌ಮಾರ್ಕ್ ವಿಶಿಷ್ಟ ಗುರುತಿನ ಸಂಖ್ಯೆಗಳನ್ನು ಅಳವಡಿಸುವಲ್ಲಿ ವೇಗ ಸಾಧಿಸಿದೆ.
ಒಂದು ರಾಷ್ಟ್ರ, ಒಂದು ಚಿನ್ನದ ದರ ನೀತಿಯ ಪ್ರಯೋಜನಗಳೇನು?:
"ಒಂದು ರಾಷ್ಟ್ರ, ಒಂದು ಚಿನ್ನದ ದರ" ನೀತಿಯ ಪ್ರಮುಖ ಪ್ರಯೋಜನವೆಂದರೆ ಗ್ರಾಹಕರ ವಿಶ್ವಾಸ ಹೆಚ್ಚಿಸುತ್ತದೆ.
ಪ್ರಾದೇಶಿಕ ಬೆಲೆ ವ್ಯತ್ಯಾಸಗಳಿಂದಾಗಿ ಹೆಚ್ಚಿನ ಪಾವತಿಯ ಬಗ್ಗೆ ಚಿಂತಿಸದೆ ಗ್ರಾಹಕರು ಖರೀದಿ ನಿರ್ಧಾರ ತೆಗೆದುಕೊಳ್ಳಬಹುದು. ಇದು ಹೆಚ್ಚು ಸ್ಥಿರ ಮತ್ತು ಊಹಿಸಬಹುದಾದ ಮಾರುಕಟ್ಟೆಗೆ ಕಾರಣವಾಗಬಹುದು. ವಿಶ್ವಾಸಾರ್ಹ ಆಸ್ತಿಯಾಗಿ ಚಿನ್ನ ಮೇಲೆ ಹೂಡಿಕೆ ಮಾಡಲು ಹೆಚ್ಚಿನ ಜನರನ್ನು ಪ್ರೋತ್ಸಾಹಿಸುತ್ತದೆ.
ಭಾರತದಾದ್ಯಂತ ಈ ನೀತಿಯ ಅನುಷ್ಠಾನವು ದೇಶದ ಚಿನ್ನದ ಉದ್ಯಮವನ್ನು ಉತ್ತೇಜಿಸುವ ಸಾಮರ್ಥ್ಯವನ್ನು ಹೊಂದಿದೆ. ಪಾರದರ್ಶಕ ಮತ್ತು ನ್ಯಾಯೋಚಿತ ಬೆಲೆ ವ್ಯವಸ್ಥೆಯೊಂದಿಗೆ, ಚಿನ್ನದ ಮಾರುಕಟ್ಟೆಯಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ದೇಶೀಯ ಮತ್ತು ಅಂತಾರಾಷ್ಟ್ರೀಯ ಹೂಡಿಕೆದಾರ ಭಾಗವಹಿಸುವಿಕೆಯನ್ನು ಕಾಣಬಹುದು.
ಇದು ಚಿನ್ನಕ್ಕೆ ಹೆಚ್ಚಿನ ಬೇಡಿಕೆಗೆ ಕಾರಣವಾಗಬಹುದು, ಚಿನ್ನ ಗಣಿಗಾರರು, ರಿಫೈನರ್‌ಗಳು (ಸಂಸ್ಕರಣಾಗಾರರು) ಮತ್ತು ಚಿಲ್ಲರೆ ವ್ಯಾಪಾರಿಗಳಿಗೆ ಸಮಾನ ಪ್ರಯೋಜವಾಗಲಿದೆ. ಈ ನೀತಿಯನ್ನು ಯಶಸ್ವಿಯಾಗಿ ಜಾರಿಗೆ ತಂದರೆ, ಗ್ರಾಹಕರ ವಿಶ್ವಾಸವನ್ನು ಹೆಚ್ಚಿಚಿಸಬಹುದು, ವ್ಯವಹಾರ ಚಟುವಟಿಕೆಯನ್ನು ಸರಳಗೊಳಿಸಬಹುದು ಮತ್ತು ಭಾರತದಲ್ಲಿ ಚಿನ್ನದ ಉದ್ಯಮದ ಒಟ್ಟಾರೆ ಬೆಳವಣಿಗೆಯನ್ನು ಹೆಚ್ಚಿಸಬಹುದು.
ಬೇರೆ ಬೇರೆ ರಾಜ್ಯಗಳಲ್ಲಿ ಚಿನ್ನದ ದರಗಳು ವಿಭಿನ್ನವಾಗಿರುವುದೇಕೆ?: ವಿಶ್ವದ ಅತಿದೊಡ್ಡ ಚಿನ್ನದ ಗ್ರಾಹಕ ಭಾರತ. ರಾಜ್ಯದಿಂದ ರಾಜ್ಯಕ್ಕೆ ಚಿನ್ನದ ಬೆಲೆ ವಿಭಿನ್ನವಾಗಿದೆ ಮತ್ತು ದರ ದಿನದಿಂದ ದಿನಕ್ಕೆ ಬದಲಾಗುತ್ತದೆ. ನೀವು ಮಹಾರಾಷ್ಟ್ರ, ಕೇರಳ, ರಾಜಸ್ಥಾನ ಅಥವಾ ದೇಶದ ಯಾವುದೇ ರಾಜ್ಯದಲ್ಲಿ ಚಿನ್ನದ ಬೆಲೆಯನ್ನು ಪರಿಶೀಲಿಸಿದರೆ ಚಿನ್ನದ ಬೆಲೆಗಳಲ್ಲಿ ವ್ಯತ್ಯಾಸ ಇರುತ್ತದೆ.
ಪ್ರತಿ ನಗರದಲ್ಲಿನ ಸ್ಥಳೀಯ ಮಾರುಕಟ್ಟೆ ಪರಿಸ್ಥಿತಿ ಚಿನ್ನ ದರ ನಿಗದಿಯಲ್ಲಿ ಅತ್ಯಂತ ನಿರ್ಣಾಯಕ ಅಂಶವಾಗಿದೆ. ಚಿನ್ನದ ಬೇಡಿಕೆ ಮತ್ತು ಪೂರೈಕೆ, ಹಾಗೆಯೇ ಇತರ ಸ್ಥಳೀಯ ಆರ್ಥಿಕ ಅಂಶಗಳು ಚಿನ್ನದ ದರಗಳನ್ನು ನಿರ್ಧರಿಸುವಲ್ಲಿ ಪ್ರಮುಖ ಪಾತ್ರವಹಿಸುತ್ತವೆ. ಹೆಚ್ಚುವರಿಯಾಗಿ, ಪ್ರತಿ ನಗರವು ತನ್ನದೇ ಆದ ಅಕ್ಕಸಾಲಿಗರು ಮತ್ತು ಆಭರಣ ವಿನ್ಯಾಸವನ್ನು ಹೊಂದಿದೆ, ಅವರು ತಮ್ಮ ಸೇವೆಗಳಿಗೆ ವಿಭಿನ್ನ ಶುಲ್ಕ ವಿಧಿಸುತ್ತಾರೆ.
ಯಾವ ರಾಜ್ಯದಲ್ಲಿ ಚಿನ್ನ ಅಗ್ಗ?: ಸದ್ಯಕ್ಕೆ ಚಿನ್ನದ ಬೆಲೆ ಕೇರಳದಲ್ಲಿ ಅತ್ಯಂತ ಕಡಿಮೆ ಇದೆ. ಅದೇ ರೀತಿ ದೆಹಲಿ ಮತ್ತು ಮುಂಬೈಗೆ ಹೋಲಿಸಿದರೆ ಕರ್ನಾಟಕದಲ್ಲಿ ಬೆಲೆ ಸಮಂಜಸವಾಗಿದೆ. ದಕ್ಷಿಣ ಭಾರತದ ವಿವಿಧ ನಗರಗಳಲ್ಲಿ ಚಿನ್ನದ ಬೆಲೆಗಳು ಉತ್ತರ ಮತ್ತು ಪಶ್ಚಿಮಕ್ಕಿಂತ ಗಮನಾರ್ಹವಾಗಿ ಕಡಿಮೆ ಇದೆ. ಕೇರಳದಲ್ಲಿ ಚಿನ್ನದ ದರವನ್ನು ಅಖಿಲ ಕೇರಳ ಚಿನ್ನ ಮತ್ತು ಬೆಳ್ಳಿ ವ್ಯಾಪಾರಿಗಳ ಸಂಘ ನಿರ್ಧರಿಸುತ್ತದೆ.
ಭಾರತದಲ್ಲಿ ಇಂದಿನ ಚಿನ್ನದ ಬೆಲೆ:
24 ಕ್ಯಾರೆಟ್ 10 ಗ್ರಾಂ ಚಿನ್ನದ ಬೆಲೆ 74,800 ರೂ.
22 ಕ್ಯಾರೆಟ್ 10 ಗ್ರಾಂ ಚಿನ್ನದ ಬೆಲೆ 68,500 ರೂ.
| ನಗರ | 22 ಕ್ಯಾರೆಟ್ (ರೂ.ಗಳಲ್ಲಿ) | 24 ಕ್ಯಾರೆಟ್ (ರೂ.ಗಳಲ್ಲಿ) |
| ಬೆಂಗಳೂರು | 68,301 | 74,510 |
| ಚೆನ್ನೈ | 68,448 | 74,670 |
| ದೆಹಲಿ | 68,523 | 74,806 |
| ಕೋಲ್ಕತ್ತಾ | 69,127 | 75,466 |
| ಮುಂಬೈ | 68,791 | 75,099 |
| ಪುಣೆ | 69,127 | 75,466 |
| ಕೇರಳ | 67,851 | 74,072 |
| ಸೂರತ್ | 69,127 | 75,466 |
ಚಿನ್ನದ ದರವನ್ನು ಹೇಗೆ ಲೆಕ್ಕಹಾಕಲಾಗುತ್ತದೆ?: ಆಭರಣದ ಅಂತಿಮ ಬೆಲೆ = (22 ಕೆಟಿ, 18 ಕೆಟಿ, ಅಥವಾ 14 ಕೆಟಿ) ಚಿನ್ನದ X ತೂಕ ಗ್ರಾಂಗಳಲ್ಲಿ + ಮೇಕಿಂಗ್ ಶುಲ್ಕಗಳು + ಜಿಎಸ್ಟಿ 3% (ಆಭರಣಗಳ ಬೆಲೆ + ಮೇಕಿಂಗ್ ಶುಲ್ಕಗಳು).
ಮೇಕಿಂಗ್ ಶುಲ್ಕವನ್ನು ಎರಡು ರೀತಿಯಲ್ಲಿ ಲೆಕ್ಕ ಹಾಕಬಹುದು: ಒಂದು ಚಿನ್ನದ ಮೌಲ್ಯದ ಶೇಕಡಾವಾರು ಅಥವಾ ಪ್ರತಿ ಗ್ರಾಂ ಚಿನ್ನಕ್ಕೆ ಫ್ಲಾಟ್ ಮೇಕಿಂಗ್ ಚಾರ್ಜ್ ಆಗಿ. ನೀವು ಖರೀದಿಸುವ ಚಿನ್ನದ ಆಭರಣದ ಪ್ರಕಾರವನ್ನು ಅವಲಂಬಿಸಿ ಚಿನ್ನದ ಬೆಲೆಗಳು ಬದಲಾಗುತ್ತವೆ. ಏಕೆಂದರೆ ಪ್ರತಿಯೊಂದು ಆಭರಣಕ್ಕೂ ವಿಭಿನ್ನ ಶೈಲಿಯ ಕಟಿಂಗ್ ಮತ್ತು ಫಿನಿಶಿಂಗ್ ಅಗತ್ಯವಿರುತ್ತದೆ.
ಇದು ವಿನ್ಯಾಸದಲ್ಲಿ ಎಷ್ಟು ಉತ್ತಮವಾದ ವಿವರಗಳು ಅಗತ್ಯವಿದೆ ಎಂಬುದರ ಮೇಲೆ ಅವಲಂಬಿತವಾಗಿರುತ್ತದೆ. ಅಂದರೆ, ಯಂತ್ರದಿಂದ ವಿನ್ಯಾಸಗೊಳಿಸಿದ ಆಭರಣಗಳು ಸಾಮಾನ್ಯವಾಗಿ ಮಾನವ ವಿನ್ಯಾಸಗೊಳಿಸಿದ ಆಭರಣಗಳಿಗಿಂತ ಕಡಿಮೆ ವೆಚ್ಚ ಹೊಂದಿರುತ್ತವೆ.
ಇದನ್ನೂ ಓದಿ: ಈ ವರ್ಷದ ಬಜೆಟ್ ಗಾತ್ರ 48 ಲಕ್ಷ ಕೋಟಿ ರೂ.: ಯಾವೆಲ್ಲ ಮೂಲಗಳಿಂದ ಬರುತ್ತದೆ ಹಣಕಾಸು? ಇಲ್ಲಿದೆ ಮಾಹಿತಿ - union budget size
