ನವದೆಹಲಿ: ಈ ವರ್ಷಾಂತ್ಯದೊಳಗೆ ಭಾರತದ ವಾಹನ ಮಾರುಕಟ್ಟೆಗೆ ಟೆಸ್ಲಾ ಪ್ರವೇಶಿಸುವ ಸಾಧ್ಯತೆ ಹೆಚ್ಚಿದೆ. ಸಂಪೂರ್ಣವಾಗಿ ಜೋಡಿಸಿದ ಎಲೆಕ್ಟ್ರಿಕ್ ವಾಹನವನ್ನು ಕಂಪನಿ ಆಮದು ಮಾಡಲಿದೆ. ಆರಂಭದಲ್ಲಿ ದುಬಾರಿ ಬೆಲೆಯ ಮಾಡೆಲ್ ಬಿಡುಗಡೆಗೆ ಯೋಜಿಸಿದ್ದು, ಬಳಿಕ ಕಡಿಮೆ ದರದ ವಾಹನವನ್ನು ಮಾರುಕಟ್ಟೆಗೆ ತರಲು ಚಿಂತಿಸಿದೆ.
ಬರ್ಲಿನ್ನ ಗಿಗಾ ಫ್ಯಾಕ್ಟರಿಯಿಂದ ಸಂಪೂರ್ಣವಾಗಿ ನಿರ್ಮಾಣ ಮಾಡಿರುವ ವೈ ಮಾಡೆಲ್ ಇವಿ ಕಾರನ್ನು ಆಮದು ಮಾಡಿ ಇಲ್ಲಿನ ಮಾರುಕಟ್ಟೆಗೆ ಪರಿಚಯಿಸಲಿದೆ. ಈ ಫ್ಯಾಕ್ಟರಿಯಲ್ಲಿ ಯುರೋಪಿಯನ್ ಸೌಲಭ್ಯದಲ್ಲಿ ಬಲಗೈಚಾಲಿತ ಚಾಲನೆ ಹೊಂದಿರುವ ಎಲೆಕ್ಟ್ರಿಕ್ ಎಸ್ಯುವಿ ಉತ್ಪಾದನೆ ಮಾಡಲಾಗುತ್ತಿದೆ.
ಭಾರತದ ಆಮದು ಸುಂಕ ಪರಿಷ್ಕರಣೆಯ ಬಳಿಕ ಟೆಸ್ಲಾ ಮಾಡೆಲ್ ವೈ ಇವಿ ಕಾರು 60ರಿಂದ 70 ಲಕ್ಷ ರೂ ಮೌಲ್ಯ ಹೊಂದಿರುವ ಸಾಧ್ಯತೆ ಇದೆ. ದೇಶವು ಸದ್ಯ 40,000 ಡಾಲರ್ಗಿಂತ ಹೆಚ್ಚಿನ ಬೆಲೆಯ ಹೈ ಎಂಡ್ ಕಾರುಗಳ ಮೇಲಿನ ಮೂಲ ಕಸ್ಟಮ್ಸ್ ಸುಂಕವನ್ನು ಶೇ.110ರಿಂದ ಶೇ.70ರಷ್ಟು ಇಳಿಸಿದೆ.
ಶಾಂಘೈನಲ್ಲೂ ಕೂಡ ರೈಟ್ ಹ್ಯಾಂಡ್ ಡ್ರೈವ್‌ ಮಾಡೆಲ್ 3 ಕಾರುಗಳನ್ನು ಉತ್ಪಾದನೆ ಮಾಡಲಾಗುತ್ತಿದೆ. ಆದರೆ, ಚೀನಾ ಕಾರುಗಳು ಆಮದಾಗುವ ಸಾಧ್ಯತೆ ಕಡಿಮೆ ಇದೆ. ಉದ್ಯಮ ತಜ್ಞರ ಪ್ರಕಾರ, ಟೆಸ್ಲಾ ವಾಹನವನ್ನು ಭಾರತದಲ್ಲಿ ಸ್ಥಳೀಯವಾಗಿ ಜೋಡಿಸುವ ಕೆಲಸ ಮಾಡುವುದಿಲ್ಲ. ಆದರೆ, ಭವಿಷ್ಯದಲ್ಲಿ ಈ ನಿರ್ಧಾರ ಬದಲಾಗಬಹುದು.
ಮಹಾರಾಷ್ಟ್ರದ ಪುಣೆಯಲ್ಲಿ ಕಚೇರಿ ಹೊಂದಿರುವ ಟೆಸ್ಲಾ, ಇದೀಗ ಮುಂಬೈನಲ್ಲಿನ ಬಾಂದ್ರಾ-ಕುರ್ಲಾ ಕಾಂಪ್ಲೆಕ್ಸ್ನಲ್ಲಿ ಹಾಗೂ ದೆಹಲಿಯ ಏರೋಸಿಟಿಯಲ್ಲಿ ತನ್ನ ಮೊದಲ ಶೋರೂಂ ಆರಂಭಿಸಲು ಸ್ಥಳಕ್ಕಾಗಿ ಹುಡುಕಾಟ ಆರಂಭಿಸಿದೆ. ಈ ನಡುವೆ ಸಂಸ್ಥೆ ಮುಂಬೈನಲ್ಲಿ 13 ಹುದ್ದೆಗಳಿಗೆ ನೇಮಕಾತಿಗೆ ಮುಂದಾಗಿದೆ. ಈ ಕುರಿತು ಕಂಪನಿ ಲಿಂಕ್ಡಿನ್ನಲ್ಲೂ ಪ್ರಕಟಿಸಿದ್ದು, ಅರ್ಹರಿಂದ ಅರ್ಜಿ ಆಹ್ವಾನಿಸಿದೆ.
ವಿಶ್ವದ ಶ್ರೀಮಂತ ವ್ಯಕ್ತಿಯಾಗಿರುವ ಟೆಸ್ಲಾ ಮಾಲೀಕ ಎಲೋನ್ ಮಸ್ಕ್ ಭಾರತದ ಮಾರುಕಟ್ಟೆಯಲ್ಲಿ ಭಾರತೀಯರ ಕೈಗೆಟುಕುವ ದರದ ಕಾರನ್ನು ಅಭಿವೃದ್ಧಿಪಡಿಸುವ ಯೋಚನೆ ಹೊಂದಿದ್ದು, ಇದು ಇನ್ನೂ ಅನುಷ್ಠಾನಕ್ಕೆ ಬಂದಿಲ್ಲ.
ಇದನ್ನೂ ಓದಿ: ಗೂಗಲ್ನ ವಿಶ್ವದ ಅತಿದೊಡ್ಡ ಕ್ಯಾಂಪಸ್ 'ಅನಂತ' ಬೆಂಗಳೂರಿನಲ್ಲಿ ಕಾರ್ಯಾರಂಭ
ಇದನ್ನೂ ಓದಿ: ಮಸ್ಕ್ ಸಂಸ್ಥೆಯಲ್ಲಿ ಕೆಲಸ ಮಾಡಲು ಅದ್ಭುತ ಅವಕಾಶ; ಮುಂಬೈನಲ್ಲಿ ನೇಮಕಾತಿ ಆರಂಭಿಸಿದ ಟೆಸ್ಲಾ
