ನವದೆಹಲಿ: 7,000 ವರ್ಷಗಳ ಇತಿಹಾಸ ಹೊಂದಿರುವ ಯುಎಇ ಉತ್ತರ ತುದಿಯಲ್ಲಿರುವ ರಾಸ್ ಅಲ್ ಖೈಮಾ (ಆರ್ಎಕೆ) ಎಮಿರೇಟ್ ಇತ್ತೀಚಿನ ದಿನಗಳಲ್ಲಿ ಭಾರತೀಯರ ಅಚ್ಚುಮೆಚ್ಚಿನ ಪ್ರವಾಸಿ ತಾಣವಾಗಿ ಹೊರಹೊಮ್ಮುತ್ತಿದೆ. ದುಬೈ, ಶಾರ್ಜಾ ಮತ್ತು ಅಬುಧಾಬಿಗಳನ್ನು ಮೀರಿಸಿ ಇದು ಜನಪ್ರಿಯವಾಗುತ್ತಿದೆ. 2023ರಲ್ಲಿ ರಾಸ್ ಅಲ್ ಖೈಮಾಗೆ ಭೇಟಿ ನೀಡಿದ ಭಾರತೀಯ ಪ್ರವಾಸಿಗರ ಸಂಖ್ಯೆ ಶೇಕಡಾ 22ರಷ್ಟು ಹೆಚ್ಚಾಗಿ 1,40,000 ಕ್ಕೆ ತಲುಪಿದೆ.
ಆರ್ಎಕೆ ಎಮಿರೇಟ್ಗೆ ಕಳೆದ ವರ್ಷ ವಿಶ್ವದಾದ್ಯಂತ ದೇಶಗಳ 1.22 ಮಿಲಿಯನ್ ಪ್ರವಾಸಿಗರು ಭೇಟಿ ನೀಡಿದ್ದಾರೆ. ಇದರಲ್ಲಿ ಭಾರತೀಯ ಪ್ರವಾಸಿಗರ ಸಂಖ್ಯೆಯೇ ಶೇಕಡಾ 10ಕ್ಕಿಂತ ಹೆಚ್ಚಾಗಿದೆ. ಇಂಡಿಗೊ ಏರ್ಲೈನ್ಸ್ ಕಳೆದ ವರ್ಷ ರಾಸ್ ಅಲ್ ಖೈಮಾ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ದೈನಂದಿನ ವಿಮಾನ ಸಂಚಾರ ಆರಂಭಿಸಿದೆ. ಅಲ್ಲದೇ ಆರ್ಎಕೆಗೆ ಭಾರತದಿಂದ ವಾರಕ್ಕೆ 14 ವಿಮಾನಗಳು ಸಂಚಾರ ನಡೆಸುವುದು ವಿಶೇಷವಾಗಿದೆ.
ವಿವಾಹ ಸಮಾರಂಭಗಳನ್ನು ಏರ್ಪಡಿಸಲು ಭಾರತೀಯರು ಹೆಚ್ಚಾಗಿ ರಾಸ್ ಅಲ್ ಖೈಮಾಗೆ ಹೋಗುತ್ತಿರುವುದು ಕುತೂಹಲಕಾರಿಯಾಗಿದೆ. ಇದಕ್ಕೆ ಪೂರಕವಾಗಿ ಭಾರತೀಯ ವಧು ಮತ್ತು ವರರ ಬೇಡಿಕೆಗಳನ್ನು ಪೂರೈಸಲು ಆರ್ಎಕೆಯ ಪ್ರವಾಸೋದ್ಯಮ ಅಧಿಕಾರಿಗಳು ಯಾವುದೇ ಕೊರತೆ ಮಾಡದಿರುವುದು ವಿಶೇಷವಾಗಿದೆ.
ರಾಸ್ ಅಲ್ ಖೈಮಾ ಪ್ರವಾಸೋದ್ಯಮ ಅಭಿವೃದ್ಧಿ ಪ್ರಾಧಿಕಾರದ ಸಿಇಒ ರಾಕಿ ಫಿಲಿಪ್ಸ್ ಸದ್ಯ ಭಾರತದ ಪ್ರವಾಸಲ್ಲಿದ್ದಾರೆ. ನವದೆಹಲಿಯಲ್ಲಿ ಈ ಬಗ್ಗೆ ಮಾತನಾಡಿದ ಅವರು, ಭಾರತೀಯ ವಧುವೊಬ್ಬರು ರಾಸ್ ಅಲ್ ಖೈಮಾ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಇಳಿದಾಗ ಅವರಿಗೆ ನೀಡಿದ ವಿಶೇಷ ಆತಿಥ್ಯದ ಬಗ್ಗೆ ವಿವರಣೆ ನೀಡಿದ್ದಾರೆ. ಭಾರತೀಯ ವಧುವನ್ನು ಪೊಲೀಸ್ ವಾಹನದಲ್ಲಿ ಸೈರೆನ್ ಮೊಳಗಿಸುತ್ತ ವಿಶೇಷವಾಗಿ ಕರೆದುಕೊಂಡು ಹೋಗಲಾಯಿತು ಎಂದು ಅವರು ಹೇಳಿದರು.
"2023 ರಲ್ಲಿ, ರಾಸ್ ಅಲ್ ಖೈಮಾದಲ್ಲಿ ವಿವಾಹ ಸಮಾರಂಭಗಳಿಂದ ಬಂದ ಆದಾಯವು ಶೇಕಡಾ 103 ರಷ್ಟು ಹೆಚ್ಚಾಗಿದೆ. ಇದರಲ್ಲಿ ಭಾರತೀಯ ಪ್ರವಾಸಿಗರ ಕೊಡುಗೆ ಗಮನಾರ್ಹವಾಗಿದೆ" ಎಂದು ಫಿಲಿಪ್ಸ್ ಹೇಳಿದರು.
ಶ್ರೀಮಂತ ಕಡಲ ಇತಿಹಾಸವನ್ನು ಹೊಂದಿರುವ ಆರ್ಎಕೆ ಬಿಳಿ ಮರಳಿನ ಕಡಲ ತೀರಗಳು, ಪರ್ಲ್ ಡೈವರ್ಸ್ ಗಳಿಗೆ ಹೆಸರುವಾಸಿಯಾಗಿದೆ. ವಿಶ್ವದ ಅತಿದೊಡ್ಡ ಸೆರಾಮಿಕ್ ಕಂಪನಿಗಳನ್ನು ಹೊಂದಿರುವ ಈ ಎಮಿರೇಟ್ ಈಗ ವಿವಾಹಗಳ ಆಯೋಜನೆಗೂ ಹೆಸರುವಾಸಿಯಾಗುತ್ತಿದೆ. ಭಾರತದಿಂದ ಹೊರಗೆ ವಿವಾಹ ಮಾಡಿಕೊಳ್ಳಲು ಬಯಸುವ ಪ್ರವಾಸಿಗರನ್ನು ಆಕರ್ಷಿಸಲು ಜಗತ್ತಿನ ರಾಷ್ಟ್ರಗಳು ಪ್ರಯತ್ನಿಸುತ್ತಿರುವುದು ಗಮನಾರ್ಹ.
ಇದನ್ನೂ ಓದಿ : ಭಾರತದ ನಿವ್ವಳ ನೇರ ತೆರಿಗೆ ಸಂಗ್ರಹ ಶೇ 20ರಷ್ಟು ಹೆಚ್ಚಳ
