ನವದೆಹಲಿ: ಟಾಟಾ ಗ್ರೂಪ್ ಒಡೆತನದ ಏರ್ ಇಂಡಿಯಾ ಸೋಮವಾರ ದೆಹಲಿ - ಲಂಡನ್ ಹೀಥ್ರೂ ಮಾರ್ಗದಲ್ಲಿ ಹೊಸ ಏರ್ ಬಸ್ ಎ 350-900 ವಿಮಾನಯಾನವನ್ನು ಆರಂಭಿಸಿದೆ. ಎ 350 ವಿಮಾನವು ಬಿಸಿನೆಸ್ ಕ್ಲಾಸ್ನಲ್ಲಿ ಪೂರ್ಣ-ಫ್ಲಾಟ್ ಹಾಸಿಗೆಗಳನ್ನು ಹೊಂದಿರುವ 28 ಖಾಸಗಿ ಸೂಟ್ಗಳನ್ನು, ಮೀಸಲಾದ ಪ್ರೀಮಿಯಂ ಎಕಾನಮಿ ಕ್ಯಾಬಿನ್ನಲ್ಲಿ ಆರಾಮದಾಯಕ ಲೆಗ್ ರೂಮ್ ಹೊಂದಿರುವ 24 ಆಸನಗಳು ಮತ್ತು ಎಕಾನಮಿ ಕ್ಲಾಸ್ನಲ್ಲಿ 264 ವಿಶಾಲವಾದ ಆಸನಗಳನ್ನು ಹೊಂದಿದೆ ಎಂದು ಏರ್ ಇಂಡಿಯಾ ತಿಳಿಸಿದೆ.
ಪ್ರಸ್ತುತ ವಾರದಲ್ಲಿ ಸಂಚರಿಸುತ್ತಿರುವ 17 ಬೋಯಿಂಗ್ 777-300 ಇಆರ್ ಮತ್ತು ಬೋಯಿಂಗ್ 787-8 ಡ್ರೀಮ್ ಲೈನರ್ ವಿಮಾನಗಳ ಪೈಕಿ 14 ವಿಮಾನಗಳ ಜಾಗದಲ್ಲಿ ಎ 350-900 ವಿಮಾನಗಳು ಇನ್ನು ಮುಂದೆ ಸಂಚರಿಸಲಿವೆ. ಇದರ ಪರಿಣಾಮವಾಗಿ, ದೆಹಲಿ - ಲಂಡನ್ ಹೀಥ್ರೂ ಮಾರ್ಗದಲ್ಲಿ ಪ್ರತಿ ವಾರ ಹೆಚ್ಚುವರಿ 336 ಸೀಟುಗಳು ಲಭ್ಯವಾಗಲಿವೆ ಎಂದು ಕಂಪನಿ ತಿಳಿಸಿದೆ.
"ದೆಹಲಿ - ಲಂಡನ್ ಹೀಥ್ರೂ ಮಾರ್ಗದಲ್ಲಿ ಪ್ರಮುಖ ಏರ್ ಬಸ್ ಎ 350-900 ವಿಮಾನಗಳ ನಿಯೋಜನೆಯು ಏರ್ ಇಂಡಿಯಾಕ್ಕೆ ಮಹತ್ವದ ಮೈಲಿಗಲ್ಲಾಗಿದೆ. ನಮ್ಮ ಅತಿಥಿಗಳ ಪ್ರಯಾಣದ ಅನುಭವವನ್ನು ನಿಜವಾಗಿಯೂ ವಿಶ್ವದರ್ಜೆಯ ಮಟ್ಟಕ್ಕೆ ಏರಿಸುವ ಏರ್ ಇಂಡಿಯಾದ ಬದ್ಧತೆಯನ್ನು ಇದು ಪ್ರದರ್ಶಿಸುತ್ತದೆ" ಎಂದು ಏರ್ ಇಂಡಿಯಾದ ಸಿಇಒ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಕ್ಯಾಂಪ್ ಬೆಲ್ ವಿಲ್ಸನ್ ಹೇಳಿದರು.
ವಿಮಾನದಲ್ಲಿ ಸಂಚರಿಸುವ ಎಲ್ಲಾ ಪ್ರಯಾಣಿಕರಿಗೆ ಇತ್ತೀಚಿನ ತಲೆಮಾರಿನ ಇನ್ ಫ್ಲೈಟ್ ಮನರಂಜನಾ ವ್ಯವಸ್ಥೆ ಲಭ್ಯವಾಗಲಿದೆ. ಈ ಮನರಂಜನಾ ವ್ಯವಸ್ಥೆಯು 3,000 ಗಂಟೆಗಳಿಗಿಂತ ಹೆಚ್ಚು ಮನರಂಜನಾ ಕಂಟೆಂಟ್ ಅನ್ನು ಒಳಗೊಂಡಿದೆ. ಇದಲ್ಲದೇ ಶೀಘ್ರದಲ್ಲೇ ಗ್ರಾಹಕರಿಗೆ ಆನ್-ಬೋರ್ಡ್ ವೈ-ಫೈ ಕೂಡ ಲಭ್ಯವಾಗಲಿದೆ.
ಬಿಸಿನೆಸ್ ಮತ್ತು ಪ್ರೀಮಿಯಂ ಎಕಾನಮಿಯ ಪ್ರಯಾಣಿಕರು ಹೊಸ ಚೈನಾವೇರ್, ಟೇಬಲ್ ವೇರ್, ಗ್ಲಾಸ್ ವೇರ್ ಮತ್ತು ಹಾಸಿಗೆಯೊಂದಿಗೆ 'ವಿಸ್ಟಾ ವರ್ವ್' ನ ಸೌಲಭ್ಯಗಳನ್ನು ಪಡೆಯಲಿದ್ದಾರೆ. ವಿಮಾನ ಮತ್ತು ಕ್ಯಾಬಿನ್ ಸಿಬ್ಬಂದಿ ಮೊದಲ ಬಾರಿಗೆ ಮನೀಶ್ ಮಲ್ಹೋತ್ರಾ ವಿನ್ಯಾಸಗೊಳಿಸಿದ ಹೊಸ ಸಮವಸ್ತ್ರವನ್ನು ಧರಿಸಲಿದ್ದಾರೆ.
ಎ 350 ನಲ್ಲಿರುವ ಎಲ್ಲ ಆಸನಗಳು ಇತ್ತೀಚಿನ ತಲೆಮಾರಿನ ಪ್ಯಾನಾಸೋನಿಕ್ ಇಎಕ್ಸ್ 3 ಇನ್-ಫ್ಲೈಟ್ ಮನರಂಜನಾ ವ್ಯವಸ್ಥೆ ಮತ್ತು 13 ಅಂತಾರಾಷ್ಟ್ರೀಯ ಮತ್ತು ಎಂಟು ಭಾರತೀಯ ಪ್ರಾದೇಶಿಕ ಭಾಷೆಗಳಲ್ಲಿ ವಿಶ್ವದಾದ್ಯಂತದ ಕಂಟೆಂಟ್ ಒಳಗೊಂಡ ಎಚ್ಡಿ ಸ್ಕ್ರೀನ್ಗಳನ್ನು ಹೊಂದಿರಲಿವೆ.
ಇದನ್ನೂ ಓದಿ : ಜಿಎಸ್ಟಿ ಕಾಯ್ದೆ ತಿದ್ದುಪಡಿಯ ಸಾಂವಿಧಾನಿಕತೆ ಪ್ರಶ್ನಿಸಿದ ಅರ್ಜಿ ಸುಪ್ರೀಂ ಕೋರ್ಟ್ನಲ್ಲಿ ವಜಾ - Goods And Services Tax
