ಬೆಂಗಳೂರು: ಭಾರತದಲ್ಲಿ ಖಾಸಗಿ ಜನತೆಯ ಬಳಕೆ ಹೆಚ್ಚುತ್ತಿರುವ ಮಧ್ಯೆ, ಎಲ್ಲಾ ಶ್ರೇಣಿಯ ನಗರಗಳಲ್ಲಿರುವ ವೇತನದಾರ ವ್ಯಕ್ತಿಗಳು ತಮ್ಮ ಆದಾಯದ ಶೇಕಡಾ 33 ಕ್ಕಿಂತ ಹೆಚ್ಚು ಹಣವನ್ನು ಸಾಲದ ಇಎಂಐಗಳನ್ನು ಪಾವತಿಸಲು ಮೀಸಲಿಡುತ್ತಿದ್ದಾರೆ ಎಂದು ವರದಿಯೊಂದು ಬುಧವಾರ ತೋರಿಸಿದೆ.
ಬಿ 2 ಬಿ ಫಿನ್ ಟೆಕ್ ಕಂಪನಿ ಪರ್ಫಿಯೋಸ್ ಮತ್ತು ಪಿಡಬ್ಲ್ಯೂಸಿ ಇಂಡಿಯಾದ ವರದಿಯ ಪ್ರಕಾರ, ಜನರು ತಮ್ಮ ಕಡ್ಡಾಯ ಪಾವತಿ ವೆಚ್ಚಗಳಿಗಾಗಿ ಹೆಚ್ಚಿನ ಹಣವನ್ನು ಖರ್ಚು ಮಾಡುತ್ತಿದ್ದಾರೆ. ಇದು ಅವರ ಒಟ್ಟು ವೆಚ್ಚದ ಶೇಕಡಾ 39 ರಷ್ಟಿದೆ. ಅಗತ್ಯ ವೆಚ್ಚಗಳಿಗಾಗಿ ಇವರು ಶೇಕಡಾ 32 ಮತ್ತು ವಿವೇಚನಾ ವೆಚ್ಚಗಳಿಗಾಗಿ ಶೇಕಡಾ 29 ರಷ್ಟು ಆದಾಯವನ್ನು ಖರ್ಚು ಮಾಡುತ್ತಿದ್ದಾರೆ.
ವಿವೇಚನಾ ವೆಚ್ಚದ ಪೈಕಿ ಫ್ಯಾಷನ್ ಮತ್ತು ವೈಯಕ್ತಿಕ ಆರೈಕೆ ವಸ್ತುಗಳ ಶಾಪಿಂಗ್ ಸೇರಿದಂತೆ ಜೀವನಶೈಲಿ ವಸ್ತುಗಳ ಖರೀದಿಗಳಿಗೆ ಜನತೆ ತಮ್ಮ ಆದಾಯದ ಶೇಕಡಾ 62 ಕ್ಕಿಂತ ಹೆಚ್ಚು ಮೊತ್ತವನ್ನು ಖರ್ಚು ಮಾಡುತ್ತಿದ್ದಾರೆ ಎಂದು ಸಂಶೋಧನೆಗಳು ತೋರಿಸಿವೆ.
ಕನಿಷ್ಠ ಸಂಬಳ ಪಡೆಯುವ ಎಂಟ್ರಿ ಲೆವೆಲ್ ವೇತನದಾರರಿಗೆ ಹೋಲಿಸಿದರೆ ಗರಿಷ್ಠ ಆದಾಯ ಗಳಿಸುವವರು ಆಹಾರ ವೆಚ್ಚಕ್ಕಾಗಿ ಖರ್ಚು ಮಾಡಿದ ಹಣದ ಪ್ರಮಾಣ (ಆರ್ಡರ್ ಮಾಡುವುದು ಅಥವಾ ಹೊರಗೆ ತಿನ್ನುವುದು) ಮತ್ತು ಅದನ್ನು ಖರ್ಚು ಮಾಡುವ ಆವರ್ತನ ಎರಡೂ ಹೆಚ್ಚಾಗಿದೆ.
ಮನೆ ಬಾಡಿಗೆಗೆ ಖರ್ಚು ಮಾಡುವ ಸರಾಸರಿ ಮೊತ್ತವು ಶ್ರೇಣಿ 1 ನಗರಗಳಿಗಿಂತ ಎರಡನೇ ಶ್ರೇಣಿಯ ನಗರಗಳಲ್ಲಿ ಶೇಕಡಾ 4.5 ರಷ್ಟು ಹೆಚ್ಚಾಗಿದೆ ಎಂದು ವರದಿ ತಿಳಿಸಿದೆ. ಎರಡನೇ ಹಂತದ ನಗರಗಳಲ್ಲಿನ ಜನರು ವೈದ್ಯಕೀಯ ವೆಚ್ಚಗಳಿಗಾಗಿ ಹೆಚ್ಚು ಖರ್ಚು ಮಾಡುತ್ತಾರೆ. ಇದು ಶ್ರೇಣಿ 1 ನಗರಗಳಿಗಿಂತ ತಿಂಗಳಿಗೆ ಸರಾಸರಿ 20 ಪ್ರತಿಶತದಷ್ಟು ಹೆಚ್ಚಾಗಿದೆ.
ಮೊದಲ ಹಂತದ ನಗರದಲ್ಲಿ ಒಬ್ಬ ವ್ಯಕ್ತಿಯು ವೈದ್ಯಕೀಯ ವೆಚ್ಚಗಳಿಗಾಗಿ ತಿಂಗಳಿಗೆ ಸರಾಸರಿ 2,450 ರೂ.ಗಳನ್ನು ಖರ್ಚು ಮಾಡಿದರೆ, ಮೆಟ್ರೋ ನಿವಾಸಿಗಳು ತಿಂಗಳಿಗೆ ಸರಾಸರಿ 2,048 ರೂ.ಗಳನ್ನು ಖರ್ಚು ಮಾಡುತ್ತಾರೆ ಎಂದು ವರದಿ ತಿಳಿಸಿದೆ.
"ಭಾರತದ ಗ್ರಾಹಕ ಮಾರುಕಟ್ಟೆಯು ಪರಿವರ್ತನೆಗೆ ಒಳಗಾಗುತ್ತಿದೆ. ಹೆಚ್ಚುತ್ತಿರುವ ಮಧ್ಯಮ ವರ್ಗ, ವಿಸ್ತರಿಸುತ್ತಿರುವ ಗ್ರಾಮೀಣ ಮಾರುಕಟ್ಟೆಗಳು ಮತ್ತು ಡಿಜಿಟಲ್ ಸಂಪರ್ಕಿತ, ಮಹತ್ವಾಕಾಂಕ್ಷೆಯ ಜನಸಂಖ್ಯೆಯು ಇದಕ್ಕೆ ಕಾರಣವಾಗಿದೆ" ಎಂದು ಪರ್ಫಿಯೋಸ್ ಸಿಇಒ ಸಬ್ಯಸಾಚಿ ಗೋಸ್ವಾಮಿ ಹೇಳಿದರು.
ವ್ಯವಹಾರಗಳು, ನೀತಿ ನಿರೂಪಕರು ಮತ್ತು ಹಣಕಾಸು ಸಂಸ್ಥೆಗಳು ವಿಕಸನಗೊಳ್ಳುತ್ತಿರುವ ಗ್ರಾಹಕರ ನಡವಳಿಕೆಯನ್ನು ಅರ್ಥಮಾಡಿಕೊಳ್ಳಲು ಮತ್ತು ಕ್ರಿಯಾತ್ಮಕ ಮಾರುಕಟ್ಟೆಯಲ್ಲಿ ಮಾಹಿತಿಯುತ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಸಂದರ್ಭದಲ್ಲಿ ಸಹಾಯ ಮಾಡಲು ಈ ವರದಿಯನ್ನು ವಿನ್ಯಾಸಗೊಳಿಸಲಾಗಿದೆ ಎಂದು ಪಿಡಬ್ಲ್ಯೂಸಿ ಇಂಡಿಯಾದ ಪಾಲುದಾರ ಮತ್ತು ಲೀಡರ್-ಪೇಮೆಂಟ್ಸ್ ಟ್ರಾನ್ಸ್ ಫಾರ್ಮೇಶನ್ ಮಿಹಿರ್ ಗಾಂಧಿ ಹೇಳಿದರು.
ಇದನ್ನೂ ಓದಿ : ಆಸ್ತಿಗಳಿಗೆ ಇ - ಖಾತಾ ಮಾಡುವುದು ಹೇಗೆ? ಏನೆಲ್ಲಾ ದಾಖಲೆಗಳು ಬೇಕು?; ನಿಮ್ಮ ಗೊಂದಲಗಳಿಗೆ ಇಲ್ಲಿದೆ ಉತ್ತರ - E KHATA
