ತಿರುಪತಿ, ಆಂಧ್ರಪ್ರದೇಶ: ಹಳೆಯ ಟಿಕೆಟ್ ನೀತಿಗಳನ್ನು ನಿಲ್ಲಿಸಿ 3 ತಿಂಗಳ ಮೊದಲೇ ಟಿಕೆಟ್ಗಳನ್ನು ಆನ್‌ಲೈನ್‌ನಲ್ಲಿ ಬಿಡುಗಡೆ ಮಾಡುವ ಮೂಲಕ ಆಂಧ್ರಪ್ರದೇಶದ ಹಿಂದಿನ ವೈಎಸ್‌ಆರ್‌ಸಿಪಿ ಸರ್ಕಾರ ತೆಗೆದುಕೊಂಡಿದ್ದ ನಿರ್ಧಾರವನ್ನು ಭಕ್ತರು ವಿರೋಧಿಸಿದ್ದರು. ಸದ್ಯ ಎನ್ಡಿಎ ಸಮ್ಮಿಶ್ರ ಸರ್ಕಾರದಲ್ಲಿ ಹೊಸದಾಗಿ ರಚನೆಯಾದ ಟಿಟಿಡಿ ಮಂಡಳಿಗೆ ವೈಎಸ್‌ಆರ್‌ಸಿಪಿ ಸರ್ಕಾರ ಟಿಕೆಟ್ ನೀತಿ ಬದಲಿಗೆ ಹಿಂದಿನ ಟಿಕೆಟ್ ನೀತಿಯನ್ನು ಜಾರಿಗೆ ತರಬೇಕು ಎಂದು ಭಕ್ತರು ಮನವಿ ಮಾಡುತ್ತಿದ್ದಾರೆ.
ವಯೋವೃದ್ಧರು, ವಿಶೇಷಚೇತನರು ಹಾಗೂ ದೀರ್ಘಕಾಲಿಕ ಕಾಯಿಲೆಗಳಿಂದ ಬಳಲುತ್ತಿರುವವರಿಗೆ ತಿರುಮಲದಲ್ಲಿರುವ ಮ್ಯೂಸಿಯಂ ಮುಂಭಾಗದ ಕೌಂಟರ್‌ಗಳಲ್ಲಿ 1,500 ದರ್ಶನ ಟಿಕೆಟ್ಗಳನ್ನು ವಿತರಿಸಲಾಗುತ್ತಿತ್ತು. ವೈಎಸ್‌ಆರ್‌ಸಿಪಿ ಸರ್ಕಾರದ ಅವಧಿಯಲ್ಲಿ, ಈ ನೀತಿಯನ್ನು ಕೋವಿಡ್ ಹೆಸರಿನಲ್ಲಿ ರದ್ದುಗೊಳಿಸಲಾಯಿತು. ದಿನಕ್ಕೆ ಒಂದು ಸಾವಿರ ಉಚಿತ ದರ್ಶನ ಟಿಕೆಟ್ಗಳನ್ನು 3 ತಿಂಗಳ ಮುಂಚಿತವಾಗಿ ಆನ್‌ಲೈನ್‌ನಲ್ಲಿ ನೀಡಲು ನಿರ್ಧರಿಸಲಾಗಿತ್ತು.
ತಮ್ಮ ಇಷ್ಟಾರ್ಥಗಳು ಈಡೇರಿದ ಮೇಲೆ ಭಕ್ತರು ವೆಂಕಟೇಶ್ವರ ಸ್ವಾಮಿಗೆ ಮುಡಿ ಅರ್ಪಿಸುತ್ತಾರೆ. ಇವರಿಗೆ ಸಿಆರ್ಒ ಕಚೇರಿಯಲ್ಲಿ ದಿನಕ್ಕೆ 750 ಟಿಕೆಟ್ ನೀಡಲಾಗುತ್ತಿತ್ತು. ಕೋವಿಡ್ ನಂತರ ಈ ಟಿಕೆಟ್ಗಳನ್ನು 3 ತಿಂಗಳ ಮುಂಚಿತವಾಗಿ ಆನ್‌ಲೈನ್‌ನಲ್ಲಿ ನೀಡಲು ಪ್ರಾರಂಭಿಸಿದ್ದರು. ಕೆಲವರು ಆನ್‌ಲೈನ್‌ನಲ್ಲಿ ಟಿಕೆಟ್ ಪಡೆದಿದ್ದರೂ ದೇವರ ದರ್ಶನಕ್ಕೆ ಬರುತ್ತಿರಲಿಲ್ಲ. ಭೂಮನ ಕರುಣಾಕರ್ ರೆಡ್ಡಿ ಟಿಟಿಡಿ ಅಧ್ಯಕ್ಷರಾದ ನಂತರ ಪ್ರತಿ ಶನಿವಾರ ಪ್ರದಕ್ಷಿಣೆಗೆ 250 ಟಿಕೆಟ್ ನೀಡುವುದಾಗಿ ಹೇಳಿ ಅವುಗಳನ್ನು ತಮ್ಮ ಬಳಿಯೇ ಇರಿಸಿಕೊಂಡಿದ್ದರು. ಸದ್ಯ ಈ ವಿಚಾರ ಸಂಬಂಧ ದೊಡ್ಡ ಮಟ್ಟದ ಅವ್ಯವಹಾರ ನಡೆದಿದೆ ಎಂಬ ಆರೋಪಗಳೂ ಕೇಳಿ ಬರುತ್ತಿವೆ.
2008ರಲ್ಲಿ ಅಲಿಪಿರಿ ಹಾಗೂ ಶ್ರೀವಾರಿ ಮೆಟ್ಟಿಲುಗಳ ಮೂಲಕ ಬರುವ ಭಕ್ತರಿಗೆ ದಿವ್ಯ ದರ್ಶನದ ಹೆಸರಿನಲ್ಲಿ ಟೋಕನ್ ನೀಡಲಾಗುತ್ತಿತ್ತು. 2017ರಲ್ಲಿ ಅಲಿಪಿರಿ ಮಾರ್ಗದಲ್ಲಿ ದಿನಕ್ಕೆ 14 ಸಾವಿರ ಹಾಗೂ ಶ್ರೀವಾರಿ ಮೆಟ್ಟು ಮಾರ್ಗದಲ್ಲಿ 6 ಸಾವಿರ ಟೋಕನ್ ನೀಡಲು ನಿರ್ಧರಿಸಲಾಗಿತ್ತು. ವೈಎಸ್‌ಆರ್‌ಸಿಪಿ ಸರ್ಕಾರ ಕೋವಿಡ್ ಹೆಸರಿನಲ್ಲಿ ಟೋಕನ್ ಕೊಡುವುದನ್ನು ತಡೆದಿತ್ತು. ಸದ್ಯ ಎನ್ ಡಿಎ ಸಮ್ಮಿಶ್ರ ಸರ್ಕಾರ ಶ್ರೀವಾರಿ ಮೆಟ್ಟು ಮಾರ್ಗದಲ್ಲಿ 6 ಸಾವಿರ ಟೋಕನ್ ನೀಡುತ್ತಿದೆ. ಶೀಘ್ರದಲ್ಲೇ ಅವುಗಳನ್ನು ಅಲಿಪಿರಿಯಲ್ಲಿಯೂ ಪುನರಾರಂಭಿಸುವುದಾಗಿ ಹೇಳಿದೆ.
ಈ ಹಿಂದೆ ಶ್ರೀಮಂತರಿಗಾಗಿ ತಿರುಪತಿಯಲ್ಲಿ ಶ್ರೀನಿವಾಸ ವಿಶೇಷ ಪ್ರವೇಶ ದರ್ಶನ ಎಸ್‌ಇಡಿ ಟಿಕೆಟ್ಗಳನ್ನು ದಿನಕ್ಕೆ 1,500 ರಂತೆ ನೀಡುತ್ತಿದ್ದರು. ಟಿಟಿಡಿ ಸದಸ್ಯರಿಗೆ ದಿನಕ್ಕೆ 20 ಟಿಕೆಟ್ಗಳನ್ನು ನೀಡಲಾಗುತ್ತಿತ್ತು. ವೈಎಸ್‌ಆರ್‌ಸಿಪಿ ಸರ್ಕಾರವು ಇವುಗಳನ್ನು ರದ್ದುಗೊಳಿಸಿತ್ತು. ಟಿಟಿಡಿ ಅಧ್ಯಕ್ಷರ ಕಚೇರಿಯಿಂದ ನೀಡಲಾಗುವ ಟಿಕೆಟ್ ಸಂಖ್ಯೆಯನ್ನು ಹೆಚ್ಚಿಸಿತ್ತು. ಇದರಿಂದ ಪ್ರತಿ ಟಿಕೆಟ್ ಅನ್ನು ಸುಮಾರು 3 ಸಾವಿರ ರೂಪಾಯಿಗೆ ಮಾರಾಟ ಮಾಡುತ್ತಿದ್ದರು.
ಇದನ್ನೂ ಓದಿ:ಬಂಗಾರ ಬಣ್ಣದ ನಾಗರಹಾವು ನೋಡಿದ್ದೀರಾ? ಇಲ್ಲವಾದಲ್ಲಿ ಇಲ್ಲಿದೆ ನೋಡಿ ಗೋಲ್ಡನ್ ಕಲರ್ ನಾಗ!
