ಗುರುಗ್ರಾಮ, ಹರಿಯಾಣ: ಅಮೆರಿಕದ ಮಾಜಿ ಅಧ್ಯಕ್ಷ ಜಿಮ್ಮಿ ಕಾರ್ಟರ್ ಭಾನುವಾರ ತಮ್ಮ 100ನೇ ವಯಸ್ಸಿನಲ್ಲಿ ನಿಧನರಾಗಿದ್ದಾರೆ. ಕಾರ್ಟರ್ ನಿಧನದಿಂದ ಅಮೆರಿಕ ಶೋಕ ಸಾಗರದಲ್ಲಿ ಮುಳುಗಿದೆ. ಇನ್ನು ಭಾರತದ ಗುರುಗ್ರಾಮದ ಹಳ್ಳಿಯೊಂದರಲ್ಲಿ ಅವರ ನೆನಪು ಉಮ್ಮಳಿಸಿ ಬರುವಂತೆ ಮಾಡಿದೆ. ಜಿಮ್ಮಿ ಕಾರ್ಟರ್ಗೂ ಹರಿಯಾಣದ ಈ ಹಳ್ಳಿಗೂ ವಿಶೇಷ ಸಂಬಂಧವಿತ್ತು ಎನ್ನುವುದು ಈಗ ಗಮನ ಸೆಳೆದಿದೆ. ಇದೇ ಕಾರಣಕ್ಕೆ ಈ ಗ್ರಾಮದಲ್ಲಿ ಶೋಕದ ವಾತಾವರಣ ಕಂಡು ಬರುತ್ತಿದೆ.
ಜಿಮ್ಮಿ ಕಾರ್ಟರ್ ಹೆಸರಿನಲ್ಲೊಂದು ಊರು: ಅಮೆರಿಕದ ಮಾಜಿ ಅಧ್ಯಕ್ಷ ಜಿಮ್ಮಿ ಕಾರ್ಟರ್ ಈಗ ನಮ್ಮ ನಡುವೆ ಇಲ್ಲ. ವಿಶೇಷವಾಗಿ ಹರಿಯಾಣದ ಗುರುಗ್ರಾಮದ ಕಾರ್ಟರ್‌ಪುರಿ ಗ್ರಾಮ, ಅಮೆರಿಕದ ಮಾಜಿ ಅಧ್ಯಕ್ಷರ ನಿಧನದಿಂದ ಶೋಕಸಾಗರದಲ್ಲಿ ಮುಳುಗುವಂತಾಗಿದೆ. ವಾಸ್ತವವಾಗಿ ಈ ಗ್ರಾಮಕ್ಕೆ ಕಾರ್ಟರ್‌ಪುರಿ ಎಂಬ ಹೆಸರಿದೆ. 1978ಕ್ಕೂ ಮೊದಲು ಈ ಗ್ರಾಮವನ್ನು ದೌಲತ್‌ಪುರ್ ನಾಸಿರಾಬಾದ್ ಎಂದು ಕರೆಯಲಾಗುತ್ತಿತ್ತು. ಅಮೆರಿಕದ ಅಧ್ಯಕ್ಷರಾಗಿದ್ದ ಜಿಮ್ಮಿ ಕಾರ್ಟರ್, ತಮ್ಮ ತಾಯಿಯ ಆಸೆಯಂತೆ ಜನವರಿ 3, 1978 ರಂದು ತಮ್ಮ ಪತ್ನಿ ರೊಸಾಲಿನ್ ಕಾರ್ಟರ್ ಅವರೊಂದಿಗೆ ಈ ಗ್ರಾಮಕ್ಕೆ ಭೇಟಿ ನೀಡಿದ್ದರು. ಈ ಸವಿ ನೆನಪಿಗಾಗಿ ಗುರುಗ್ರಾಮದ ಸೆಕ್ಟರ್ 23ರ ಸಮೀಪದಲ್ಲಿರುವ ದೌಲತ್‌ಪುರ ನಾಸಿರಾಬಾದ್ ಎಂಬ ಗ್ರಾಮದ ಹೆಸರನ್ನು ಕಾರ್ಟರ್‌ಪುರಿ ಎಂದು ಬದಲಾಯಿಸಲಾಗಿತ್ತು.
ಈ ಗ್ರಾಮದಲ್ಲಿ ಕೆಲಸ ಮಾಡಿದ್ದ ಜಿಮ್ಮಿ ಕಾರ್ಟರ್ ತಾಯಿ: ಜಿಮ್ಮಿ ಕಾರ್ಟರ್ ಅವರ ತಾಯಿ ಬೆಸ್ಸಿ ಲಿಲಿಯನ್ ಕಾರ್ಟರ್ 1960ರ ದಶಕದಲ್ಲಿ ಶಾಂತಿ ಕಾರ್ಪ್ಸ್‌ನಲ್ಲಿ ಆರೋಗ್ಯ ಸ್ವಯಂಸೇವಕರಾಗಿ ಅಂದಿನ ದೌಲತ್‌ಪುರ ನಾಸಿರಾಬಾದ್ ಗ್ರಾಮದಲ್ಲಿ ಕೆಲಸ ಮಾಡಿದ್ದರು. ವೃತ್ತಿಯಲ್ಲಿ ನರ್ಸ್ ಆಗಿದ್ದ ಬೆಸ್ಸಿ ಲಲಿಯನ್ ಕಾರ್ಟರ್, ಈ ಗ್ರಾಮದಲ್ಲಿ ತಮ್ಮ ಸೇವೆ ಸಲ್ಲಿಸಿ ಗಮನ ಸೆಳೆದಿದ್ದರು. ಹೀಗಾಗಿ ಜಿಮ್ಮಿ ಕಾರ್ಟರ್ ಭಾರತ ಪ್ರವಾಸಕ್ಕೆ ಹೊರಟಿದ್ದಾರೆಂದು ತಿಳಿದಾಗ, ಅವರ ಜೊತೆಗೆ ದೌಲತ್‌ಪುರ ನಾಸಿರಾಬಾದ್ ಗ್ರಾಮವನ್ನು ನೋಡುವ ಬಯಕೆ ವ್ಯಕ್ತಪಡಿಸಿದ್ದರು. ತಾಯಿಯ ಆಸೆಯಂತೆ ಜಿಮ್ಮಿ ಕಾರ್ಟರ್ ಈ ಗ್ರಾಮಕ್ಕೆ ಭೇಟಿ ನೀಡಿದ್ದರು.
ಕಾರ್ಟರ್ ಭೇಟಿ ನಂತರ ಹೆಸರು ಬದಲಾಯಿಸಿಕೊಂಡ ಗ್ರಾಮ: ಜಿಮ್ಮಿ ಕಾರ್ಟರ್ ತಮ್ಮ ತಾಯಿಯ ಆಸೆಯಂತೆ 1978 ರಲ್ಲಿ ಭಾರತಕ್ಕೆ ಭೇಟಿ ನೀಡಿದ್ದರು. ಈ ಸಮಯದಲ್ಲಿ ಅವರು ಗುರುಗ್ರಾಮದ ದೌಲತ್‌ಪುರ ನಾಸಿರಾಬಾದ್ ಗ್ರಾಮಕ್ಕೆ ಭೇಟಿ ನೀಡಿ, ತಾಯಿಯ ಆಸೆ ಪೂರೈಸಿದ್ದರು. ಅದೇ ಸಮಯದಲ್ಲಿ, ಉಭಯ ದೇಶಗಳ ನಡುವಿನ ಸಂಬಂಧದ ಹೊಸ ಹಂತವೂ ಪ್ರಾರಂಭವಾಯಿತು. ಆಗಿನ ಕಾಲದಲ್ಲಿ ಅಮೆರಿಕದ ಅಧ್ಯಕ್ಷರೊಬ್ಬರು ತಮ್ಮ ಗ್ರಾಮಕ್ಕೆ ಭೇಟಿ ನೀಡಬಹುದೆಂದು ಯಾರೂ ನಿರೀಕ್ಷಿಸಿರಲಿಲ್ಲ. ಆದರೆ, ಎಲ್ಲರ ನಿರೀಕ್ಷೆಗಳನ್ನ ಹುಸಿ ಮಾಡಿದ್ದ ಜಿಮ್ಮಿ ಕಾರ್ಟರ್, ಈ ಗ್ರಾಮಕ್ಕೆ ಭೇಟಿ ನೀಡಿ ಗಮನ ಸೆಳೆದಿದ್ದರು.
ಇನ್ನೊಂದು ಕಡೆ ಅವರು ಭೇಟಿ ನೀಡಿದ ಈ ಗ್ರಾಮದ ಹೆಸರನ್ನು ಬದಲಾಯಿಸುವ ಪ್ರಸ್ತಾಪ ಮಾಡಲಾಯಿತು. ಅದನ್ನು ಎಲ್ಲರ ಒಪ್ಪಿಗೆಯೊಂದಿಗೆ ದೌಲತ್‌ಪುರ ನಾಸಿರಾಬಾದ್ ಗ್ರಾಮದ ಹೆಸರನ್ನು "ಕಾರ್ಟರ್‌ಪುರಿ" ಎಂದು ಬದಲಾಯಿಸಲಾಗಿತ್ತು.
ಇದನ್ನು ಓದಿ: 100ನೇ ವಯಸ್ಸಿನಲ್ಲಿ ನಿಧನರಾದ ಅಮೆರಿಕದ ಮಾಜಿ ಅಧ್ಯಕ್ಷ ಜಿಮ್ಮಿ ಕಾರ್ಟರ್
