ಖಮ್ಮಂ (ತೆಲಂಗಾಣ): ಮೊಬೈಲ್ನಲ್ಲಿ ಮಾತನಾಡುತ್ತಿದ್ದ ವ್ಯಕ್ತಿಯೊಬ್ಬ ಆಕಸ್ಮಿಕವಾಗಿ ತನ್ನ ಕಂಕುಳಡಿ ವಿದ್ಯುತ್ ಹೀಟರ್ ಇಟ್ಟುಕೊಂಡ ಪರಿಣಾಮ ಶಾಕ್ ತಗುಲಿ ಸಾವನ್ನಪ್ಪಿರುವ ಘಟನೆ ಖಮ್ಮಂನಲ್ಲಿ ಜರುಗಿದೆ.
ಈ ಬಗ್ಗೆ ಮಾಹಿತಿ ನೀಡಿದ ಖಮ್ಮಂ ತ್ರಿ-ಟೌನ್ ಪೊಲೀಸ್ ಠಾಣೆಯ ಇನ್ಸ್ಪೆಕ್ಟರ್ ರಮೇಶ್ ಮಾಹಿತಿ ನೀಡಿದ್ದು, "ಮೃತ ದೊಣೆಪುಡಿ ಮಹೇಶ್ ಬಾಬು(40) ಸ್ಥಳೀಯ ರಾಜಕಾಲುವೆಯ ಹನುಮಾನ ದೇವಸ್ಥಾನದ ಬಳಿ ತೆಂಗಿನಕಾಯಿ ವ್ಯಾಪಾರ ಮಾಡುತ್ತಿದ್ದರು. ಭಾನುವಾರ ರಾತ್ರಿ ಸುಮಾರು 8.30ಕ್ಕೆ ತಮ್ಮ ಮನೆಯ ನಾಯಿಗೆ ಸ್ನಾನ ಮಾಡಿಸಲು ಬಿಸಿ ನೀರಿಗಾಗಿ ಹೀಟರ್ ಆನ್ ಮಾಡಲು ಹೋಗುತ್ತಿದ್ದರು. ಅಷ್ಟರಲ್ಲಿ ಫೋನ್ ಬಂದಿದೆ. ಆಗ ಹೀಟರ್ ನೀರಿಗೆ ಇಡುವ ಬದಲು, ಕಂಕುಳಲ್ಲಿ ಇಟ್ಟುಕೊಂಡು ಸ್ವಿಚ್ ಆನ್ ಮಾಡಿದ್ದಾರೆ. ಇದರಿಂದ ವಿದ್ಯುತ್ ಸ್ಪರ್ಶಿಸಿ ಕೆಳಗೆ ಬಿದ್ದಿದ್ದಾರೆ.
ಸಮೀಪದಲ್ಲೇ ಇದ್ದ ಅವರ ಒಂಬತ್ತು ವರ್ಷದ ಮಗಳು ಶಬನ್ಯಾ ಭಯದಿಂದ ಕಿರುಚುತ್ತಾ ಓಡಿ ಬಂದಿದ್ದಾಳೆ. ಗಾಬರಿಗೊಂಡ ಪತ್ನಿ ದುರ್ಗಾದೇವಿ ಹಾಗೂ ಸ್ಥಳೀಯರು ಮಹೇಶ್ ಬಾಬು ಅವರನ್ನು ಆಸ್ಪತ್ರೆಗೆ ಸಾಗಿಸಿದ್ದಾರೆ. ಆದರೆ ಅದಾಗಲೇ ಮಹೇಶ್ ಬಾಬು ಅವರು ಮೃತಪಟ್ಟಿರುವುದಾಗಿ ವೈದ್ಯರು ತಿಳಿಸಿದ್ದಾರೆ. ಮಹೇಶ್ ಬಾಬು ದಂಪತಿಗೆ ಇಬ್ಬರು ಹೆಣ್ಣು ಮಕ್ಕಳಿದ್ದಾರೆ" ಎಂದು ತಿಳಿಸಿದರು.
