ತಿರುವನಂತಪುರಂ: ಕೇರಳದ ಬಹು ನಿರೀಕ್ಷಿತ ತಿರುವೋಣಂ ಬಂಪರ್ ಲಾಟರಿ ಡ್ರಾ ಬುಧವಾರ ಮಧ್ಯಾಹ್ನ ನಡೆದಿದೆ. ಒಟ್ಟಾರೆ 500 ಮೌಲ್ಯದ ಟಿಕೆಟ್ಗಳಲ್ಲಿ ಅತ್ಯಧಿಕ ಮೊತ್ತದ ಬಹುಮಾನ 25 ಕೋಟಿ ರೂ. ಆಗಿದೆ. ಇನ್ನು ಎರಡನೇ ಬಹುಮಾನದ ರೂಪವಾಗಿ ತಲಾ 20 ಮಂದಿಗೆ 2 ಕೋಟಿ ಬಹುಮಾನ ನೀಡಲಾಗುತ್ತಿದೆ. ಮೂರನೇ ಬಹುಮಾನ ತಲಾ 20 ಮಂದಿಗೆ 50 ಲಕ್ಷ ನಗದು ಬಹುಮಾನವನ್ನು ಹೊಂದಿದೆ.
ಬುಧವಾರ ಮಧ್ಯಾಹ್ನ ನಡೆದ ಲಕ್ಕಿ ಡ್ರಾ: ರಾಜ್ಯದ ಹಣಕಾಸು ಸಚಿವ ಕೆ.ಎನ್.ಬಾಲಗೋಪಾಲ್ ಬುಧವಾರ ಮಧ್ಯಾಹ್ನ 2 ಗಂಟೆಗೆ ಈ ಡ್ರಾ ನಡೆಸಿ, ಪ್ರಥಮ ಬಹುಮಾನ ವಿಜೇತರನ್ನು ಘೋಷಣೆ ಮಾಡಿದರು. ಎರಡನೇ ಬಹುಮಾನ ವಿಜೇತರನ್ನು ಶಾಸಕ ವಿಕೆ ಪ್ರಶಾಂತ್ ಆಯ್ಕೆ ಮಾಡಿದರು. ಒಟ್ಟಾರೆ ಬಹುಮಾನದ ಮೊತ್ತ 125.54 ಕೋಟಿಯಾಗಿದೆ. ತಿರುವೋಣಂ ಬಂಪರ್ ಲಾಟರಿಯಲ್ಲಿ ಒಟ್ಟು 8 ಮಿಲಿಯನ್ ಟಿಕೆಟ್ ಗಳನ್ನು ಮುದ್ರಣ ಮಾಡಲಾಗಿತ್ತು. ಮಂಗಳವಾರ ಸಂಜೆವರೆಗೆ 7,135,938 ಟಿಕೆಟ್‌ಗಳು ಮಾರಾಟವಾಗಿದ್ದವು.
ಪಾಲಕ್ಕಾಡ್ನಲ್ಲಿ ಅತಿ ಹೆಚ್ಚು ಟಿಕೆಟ್ಗಳ ಮಾರಾಟ: ರಾಜ್ಯದಲ್ಲಿ ಅತಿ ಹೆಚ್ಚು ಟಿಕೆಟ್ ಪಾಲಕ್ಕಾಡ್ ಜಿಲ್ಲೆಯಲ್ಲಿ ಮಾರಾಟವಾಗಿತ್ತು. ಇಲ್ಲಿ 13,02,680 ಟಿಕೆಟ್ ಮಾರಾಟ ಮಾಡಲಾಗಿತ್ತು. ತಿರುವನಂತಪುರಂನಲ್ಲಿ 9,46,260 ಟಿಕೆಟ್ ಮತ್ತು ತ್ರಿಸ್ಸೂರ್ನಲ್ಲಿ 8,61,000 ಟಿಕೆಟ್ ಮಾರಾಟವಾಗಿದ್ದವು. ಟಿಕೆಟ್ ಡ್ರಾ ಆಗುವ ಕೆಲವು ನಿಮಿಷಗಳ ವರೆಗೂ ಈ ಟಿಕೆಟ್ಗಳ ಮಾರಾಟ ನಡೆದಿತ್ತು.
ಕರ್ನಾಟಕದ ವ್ಯಕ್ತಿಗೆ ಬಂಪರ್ ಲಾಟರಿ: ಇನ್ನು ಈ ಟಿಕೆಟ್ನ ಬಂಪರ್ ಮೊತ್ತದ ಬಹುಮಾನವೂ ವಯನಾಡಿನ ಬತ್ತೇರಿಯಲ್ಲಿರುವ ಎನ್‌ಜಿಆರ್ ಲಾಟರಿ ಮಾರಾಟ ಮಾಡಿದ ಟಿಕೆಟ್‌ಗೆ ಬಹುಮಾನ ಬಂದಿದೆ. ಈ ಲಾಟರಿಯು ಕರ್ನಾಟಕದ ಮಂಡ್ಯ ಜಿಲ್ಲೆಯ ವ್ಯಕ್ತಿಗೆ ಒಲಿದು ಬಂದಿದೆ ಎಂದು ವರದಿಯಾಗಿದೆ. ಲಾಟರಿ ವಿಜೇತರು, ಡ್ರಾಗೊಂಡಿರುವ ಟಿಕೆಟ್ ನಂಬರ್ ನೊಂದಿಗೆ ದಾಖಲೆ ಒದಗಿಸಿ ಬಹುಮಾನ ಪಡೆದುಕೊಳ್ಳಬಹುದು ಎಂದುರಾಜ್ಯ ಲಾಟರಿ ಇಲಾಖೆ ತಿಳಿಸಿದೆ. ಬಹುಮಾನ ಪಡೆದ ಅದೃಷ್ಟವಂತರು, ಲಾಟರಿ ಮೊತ್ತದ ಶೇ 10ರಷ್ಟನ್ನು ಸರ್ಕಾರಕ್ಕೆ ತೆರಿಗೆ ಕಟ್ಟಬೇಕಾಗುತ್ತದೆ.
ಈ ಕಾರ್ಯಕ್ರಮದಲ್ಲಿ ರಾಜ್ಯ ಲಾಟರಿ ಇಲಾಖೆ ನಿರ್ದೇಶಕ ಅಬ್ರಹಾಂ ರೆನ್, ಜಂಟಿ ನಿರ್ದೇಶಕಿ (ಆಡಳಿತ) ಮಾಯಾ ಎನ್.ಪಿಳ್ಳೈ, ಜಂಟಿ ನಿರ್ದೇಶಕ (ಕಾರ್ಯಾಚರಣೆ), ಎಂ.ರಾಜ್ ಕಪೂರ್ ಹಾಗೂ ಲಾಟರಿ ಇಲಾಖೆಯ ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದರು.
ಇದನ್ನೂ ಓದಿ: ಪಿಎಂ ಗರೀಬ್ ಕಲ್ಯಾಣ್ ಯೋಜನೆಯಡಿ 2028ರವರೆಗೆ ಉಚಿತ ಅಕ್ಕಿ ವಿತರಣೆಗೆ ಕೇಂದ್ರ ಒಪ್ಪಿಗೆ
