ನವದೆಹಲಿ: ಲೋಕಸಭೆ ಚುನಾವಣಾ ಫಲಿತಾಂಶದೊಂದಿಗೆ ಆಂಧ್ರ ಪ್ರದೇಶ ಹಾಗೂ ಒಡಿಶಾದಲ್ಲಿ ವಿಧಾನಸಭೆ ಫಲಿತಾಂಶ ಪ್ರಕಟವಾಗಿದೆ. ಜೊತೆಗೆ ಕರ್ನಾಟಕದ ಸುರಪುರ ಸೇರಿ 22 ಕ್ಷೇತ್ರಗಳ ಉಪ ಚುನಾವಣೆಯ ರಿಸಲ್ಟ್ ಕೂಡ ಘೋಷಣೆಯಾಗಿದೆ.
ಆಂಧ್ರದಲ್ಲಿ ಯಾರಿಗೆ ಮುನ್ನಡೆ?, ಹಿನ್ನಡೆ?: ಆಂಧ ಪ್ರದೇಶದಲ್ಲಿ ಆಡಳಿತಾರೂಢ ವೈಎಸ್ಆರ್ ಕಾಂಗ್ರೆಸ್ ಈ ಬಾರಿ ಚುನಾವಣೆಯಲ್ಲಿ ಹೀನಾಯ ಸ್ಥಿತಿಗೆ ತಲುಪಿದೆ. ತೆಲುಗು ದೇಶಂ ಪಕ್ಷ (ಟಿಡಿಪಿ), ಜನಸೇನಾ ಮತ್ತು ಬಿಜೆಪಿ ಮೈತ್ರಿಕೂಟ ದೊಡ್ಡ ಬಹುಮತವನ್ನೇ ಸಾಧಿಸಿದೆ. 175 ವಿಧಾನಸಭೆ ಕ್ಷೇತ್ರಗಳ ಪೈಕಿ ಟಿಡಿಪಿ 135 ಕ್ಷೇತ್ರಗಳಲ್ಲಿ ಗೆದ್ದಿದೆ. ಮಿತ್ರಪಕ್ಷಗಳಾದ ಜನಸೇನೆ 21 ಮತ್ತು ಬಿಜೆಪಿ 8 ಕಡೆ ಜಯಭೇರಿಯಾಗಿದೆ. ಮತ್ತೊಂದೆಡೆ, ಆಡಳಿತಾರೂಢ ವೈಎಸ್ಆರ್ ಕಾಂಗ್ರೆಸ್ ಕೇವಲ 11 ಕ್ಷೇತ್ರಗಳಲ್ಲಿ ಮಾತ್ರ ಗೆಲುವು ಪಡೆದಿದೆ. ಈ ಮೂಲಕ ಟಿಡಿಪಿ ನೇತೃತ್ವದ ಮೈತ್ರಿ ಬಹುಮತ ಪಡೆದಿದ್ದು, ಸರ್ಕಾರ ರಚಿಸಲಿದೆ.
ಎನ್‌ಡಿಎ ಪಾಲುದಾರರ ನಡುವಿನ ಸೀಟು ಹಂಚಿಕೆ ಒಪ್ಪಂದದ ಭಾಗವಾಗಿ ಟಿಡಿಪಿ 144 ಕ್ಷೇತ್ರಗಳಲ್ಲಿ ಸ್ಪರ್ಧಿಸಿದೆ. ಜನಸೇನೆ 21 ಕ್ಷೇತ್ರ ಹಾಗೂ ಬಿಜೆಪಿ 10 ಕ್ಷೇತ್ರಗಳಲ್ಲಿ ತನ್ನ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿತ್ತು.
ಒಟ್ಟು 175 ವಿಧಾನಸಭೆ ಕ್ಷೇತ್ರಗಳು:
- ಟಿಡಿಪಿ - 135
- ವೈಎಸ್ಆರ್ ಕಾಂಗ್ರೆಸ್ - 11
- ಜನಸೇನಾ - 21
- ಬಿಜೆಪಿ - 08
- ಕಾಂಗ್ರೆಸ್ - 00
- ಇತರ - 00
ಒಡಿಶಾದಲ್ಲಿ ಯಾರಿಗೆ ಮುನ್ನಡೆ?, ಹಿನ್ನಡೆ?: ಒಡಿಶಾದಲ್ಲಿ ನವೀನ್ ಪಟ್ನಾಯತ್ ನೇತೃತ್ವದ ಆಡಳಿತಾರೂಢ ಬಿಜೆಡಿ ಸಹ ಮುಖಭಂಗ ಅನುಭವಿಸಿದೆ. ಎರಡೂ ಕ್ಷೇತ್ರಗಳಲ್ಲಿ ಸ್ಪರ್ಧಿಸಿದ್ದ ನವೀನ್ ಪಟ್ನಾಯಕ್ ಹಿಂಜಿಲಿ ಗೆದ್ದು, ಕಾಂತಾಬಾಂಜಿಯಲ್ಲಿ ಸೋಲನುಭವಿಸಿದ್ದಾರೆ. ಬಿಜೆಪಿ 50 ಕ್ಷೇತ್ರಗಳಲ್ಲಿ ಮಾತ್ರ ಗೆದ್ದು ಅಧಿಕಾರ ಕಳೆದುಕೊಂಡಿದೆ.
ಮತ್ತೊಂದೆಡೆ, ರಾಜ್ಯದಲ್ಲಿ ಬಿಜೆಪಿ 79 ಕ್ಷೇತ್ರಗಳಲ್ಲಿ ಗೆದ್ದು ಪಡೆದು ಸರಳ ಬಹುಮತ ಪಡೆದಿದೆ. ಕಾಂಗ್ರೆಸ್ 14 ಕ್ಷೇತ್ರಗಳು, ನಾಲ್ಕು ಕ್ಷೇತ್ರಗಳಲ್ಲಿ ಪಕ್ಷೇತರರು ಜಯ ಸಾಧಿಸಿದ್ದಾರೆ.
ಒಟ್ಟು 147 ವಿಧಾನಸಭೆ ಕ್ಷೇತ್ರಗಳು:
- ಬಿಜೆಪಿ - 79
- ಬಿಜೆಡಿ - 50
- ಕಾಂಗ್ರೆಸ್ - 14
- ಇತರೆ - 04
ಹಿಮಾಚಲದಲ್ಲಿ ಕಾಂಗ್ರೆಸ್ ಸರ್ಕಾರ ಸೇಫ್: ಇದೇ ವೇಳೆ, ವಿವಿಧ ರಾಜ್ಯಗಳಲ್ಲಿ 25 ವಿಧಾನಸಭೆ ಕ್ಷೇತ್ರಗಳಿಗೆ ಉಪ ಚುನಾವಣೆಯ ಫಲಿತಾಂಶ ಪ್ರಟಕವಾಗಿದೆ. ಇದರಲ್ಲಿ ಹಿಮಾಚಲ ಪ್ರದೇಶದ 6 ಕ್ಷೇತ್ರಗಳು ಸೇರಿದ್ದು, ನಾಲ್ಕು ಕಡೆ ಕಾಂಗ್ರೆಸ್ ಗೆದ್ದಿದೆ. ಎರಡು ಕಡೆ ಬಿಜೆಪಿ ಗೆದ್ದಿದೆ. ನಾಲ್ಕು ಸ್ಥಾನಗಳ ಗೆಲುವಿನೊಂದಿಗೆ ಹಿಮಾಚಲದಲ್ಲಿ ಕಾಂಗ್ರೆಸ್ ಸರ್ಕಾರ ಸುರಕ್ಷಿತವಾಗಿದೆ.
ಹಿಮಾಚಲ ಪ್ರದೇಶವು 68 ವಿಧಾಸಭೆ ಕ್ಷೇತ್ರಗಳನ್ನು ಹೊಂದಿದೆ. 2023ರ ಚುನಾವಣೆಯಲ್ಲಿ ಕಾಂಗ್ರೆಸ್ 43 ಸ್ಥಾನಗಳಲ್ಲಿ ಗೆದ್ದು ಅಧಿಕಾರಕ್ಕೆ ಬಂದಿದೆ. ಆರು ಶಾಸಕರು ರಾಜ್ಯಸಭೆ ಚುನಾವಣೆಯಲ್ಲಿ ಅಡ್ಡ ಮತದಾನ ಮಾಡಿದ್ದರಿಂದ ಅನರ್ಹಗೊಳಿಸಲಾಗಿದೆ. ಅಲ್ಲದೇ, ಮೂರು ಪಕ್ಷೇತರು ಶಾಸಕ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದಾರೆ. ಇದರಿಂದ ವಿಧಾನಸಭೆಯ ಬಲವು 59ಕ್ಕೆ ಕುಸಿದಿದೆ.
ಸದ್ಯ ಬಹುಮತಕ್ಕೆ 30 ಸ್ಥಾನಗಳ ಅಗತ್ಯವಿತ್ತು. ಕಾಂಗ್ರೆಸ್ ಈ 4 ಸ್ಥಾನಗಳನ್ನು ಗೆದ್ದ ಹಿನ್ನೆಲೆ ಒಟ್ಟು ಸದಸ್ಯ ಬಲ 38ಕ್ಕೆ ಏರಿಕೆಯಾಗಿದೆ. ಬಿಜೆಪಿ ತನ್ನ 2 ಸ್ಥಾನಗಳನ್ನು ಗೆದ್ದಿದ್ದು ಅದರ 27 ಶಾಸಕರ ಸಂಖ್ಯೆ ಆಗಿದೆ.
ಇದನ್ನೂ ಓದಿ: ಉತ್ತರ ಪ್ರದೇಶದಲ್ಲಿ ಬಿಜೆಪಿಯ ಘಟಾನುಘಟಿಗಳಿಗೆ ಮತದಾರ ಶಾಕ್; ಸ್ಮೃತಿ, ಮೇನಕಾ ಸೇರಿ ಯಾರಿಗೆಲ್ಲ ಹಿನ್ನಡೆ?
