ಡೆಹ್ರಾಡೂನ್: ಇಲ್ಲಿನ ಐಎಸ್ಬಿಟಿಯಲ್ಲಿ ನಿಂತ ಬಸ್ನಲ್ಲಿ ಅನಾಥ ಅಪ್ರಾಪ್ತ ಬಾಲಕಿ ಮೇಲಿನ ಲೈಂಗಿಕ ದೌರ್ಜನ್ಯ ಪ್ರಕರಣ ಸಂಬಂಧ ಉತ್ತರಾಖಂಡ್ ಪೊಲೀಸರು ಐವರು ಆರೋಪಿಗಳನ್ನು ಬಂಧಿಸಿದ್ದಾರೆ. ಈ ಪ್ರಕರಣದ ವಿಚಾರಣೆಗಾಗಿ ಎಸ್ಪಿ ಪ್ರಮೋದ್ ಕುಮಾರ್ ನೇತೃತ್ವದ 8 ಮಂದಿಯನ್ನೊಳಗೊಂಡ ಎಸ್ಐಟಿ ತಂಡ ರಚಿಸಲಾಗಿದೆ.
ಹಿರಿಯ ಪೊಲೀಸ್ ಹೆಚ್ಚುವರಿ ಅಧಿಕಾರಿ (ಎಸ್ಎಸ್ಪಿ) ಅಜಯ್ ಸಿಂಗ್ ಈ ಕುರಿತು ಮಾತನಾಡಿದ್ದು, ಪ್ರಕರಣದ ಸೂಕ್ಷ್ಮತೆ ಮತ್ತು ಸಂಪೂರ್ಣ ತನಿಖೆ ಅಗತ್ಯತೆ ಹಿನ್ನೆಲೆ ಎಸ್ಐಟಿ ತಂಡ ರಚಿಸಲಾಗಿದೆ.
ಈ ಘಟನೆ ವೇಳೆ 16 ವರ್ಷದ ಅಪ್ರಾಪ್ತೆ ದೆಹಲಿಯಿಂದ ಡೆಹ್ರಾಡೂನ್ಗೆ ಸರ್ಕಾರಿ ಬಸ್ನಲ್ಲಿ ಪ್ರಯಾಣ ಬೆಳೆಸಿದ್ದಳು. ಉತ್ತರಾಖಂಡ್ ಸಾರಿಗೆ ಸಂಸ್ಥೆಯ ಬಸ್ನ ಈ ಪ್ರಯಾಣದ ಸಂಪೂರ್ಣ ಫುಟೇಜ್ ಅನ್ನು ಸಂಗ್ರಹಿಸಲಾಗಿದ್ದು, ಇದಕ್ಕಾಗಿ ಮೇಲ್ವಿಚಾರಣಾ ತಂಡವನ್ನು ನಿಯೋಜಿಸಲಾಗಿದೆ ಎಂದು ತಿಳಿಸಿದರು.
ಎಸ್ಪಿ ಪ್ರಮೋದ್ ಕುಮಾರ್ ಎಸ್ಐಟಿ ತಂಡದ ಮುಖ್ಯಸ್ಥರಾಗಿದ್ದು, ಸರ್ದಾರ್ನ ಸರ್ಕಲ್ ಆಫೀಸರ್ ಅನಿಲ್ ಜೋಶಿ, ಪ್ರೇಮ್ನಗರ್ನ ಸರ್ಕಲ್ ಆಧಿಕಾರಿ ರೀನಾ ರಾಥೋರ್, ಇನ್ಸ್ಪೆಕ್ಟರ್ ಕಮಲ್ ಕುಮಾರ್, ಇನ್ಸ್ಪೆಕ್ಟರ್ ಶಂಕರ್ ಸಿಂಗ್ ಬಿಶ್ಟ್, ಮಹಿಳಾ ಸಬ್ ಇನ್ಸ್ಪೆಕ್ಟರ್ ಜ್ಯೋತಿ ಕನ್ಯಾಲ್, ವಿನಿತಾ ಚೌಹಣ್, ಸಬ್ ಇನ್ಸ್ಪೆಕ್ಟರ್ ಅಶೀಶ್ ಕುಮಾರ್ ತಂಡದಲ್ಲಿ ಇರಲಿದ್ದಾರೆ ಎಂದು ಮಾಹಿತಿ ನೀಡಿದರು.
ಏನಿದು ಘಟನೆ: ಪೊಲೀಸರ ಪ್ರಕಾರ, ಆಗಸ್ಟ್ 12ರಂದು ಬಾಲಕಿ ದೆಹಲಿಯ ಕಾಶ್ಮೀರಿ ಗೇಟ್ನಿಂದ ಬಸ್ ಹತ್ತಿದ್ದು ಸಂಜೆ 4.30ಕ್ಕೆ ಬಸ್ ಹೊರಟಿತ್ತು. ರಾತ್ರಿ 10.30ರ ಸುಮಾರಿಗೆ ಡೆಹ್ರಾಡೂನ್ಗೆ ಬಸ್ ಬಂದಿತ್ತು. ಉತ್ತರ ಪ್ರದೇಶದ ಮೊರದಬಾದ್ನ ಸಂತ್ರಸ್ತೆ ಪ್ರಯಾಣಿಸುತ್ತಿದ್ದ ಬಸ್ ಐಎಸ್ಬಿಟಿ ನಿಲುಗಡೆಯಾಗಿದ್ದು, ಇಲ್ಲಿ ಬಾಲಕಿ ಮೇಲೆ ಹೀನ ಕೃತ್ಯ ನಡೆದಿತ್ತು.
ಘಟನೆ ಸಂಬಂಧ ಇಲ್ಲಿನ ಗಾರ್ಡ್ ರಾಜ್ಯ ಮಕ್ಕಳ ಕಲ್ಯಾಣ ಸಮಿತಿ (ಸಿಡಬ್ಲ್ಯೂಸಿ)ಗೆ ಮಾಹಿತಿ ನೀಡಿದ್ದು, ಅವರು ಸ್ಥಳಕ್ಕೆ ಬಂದು ಬಾಲಕಿಯನ್ನು ರಕ್ಷಿಸಿದ್ದರು. ನಾಲ್ಕು ದಿನಗಳ ಕಾಲ ಆಕೆಯೊಂದಿಗೆ ಸಮಾಲೋಚನೆ ನಡೆಸಿ, ಮಾಹಿತಿ ಪಡೆಯಲಾಗಿದೆ. ಆಗಸ್ಟ್ 17ರಂದು ಐಪಿಸಿ ಸೆಕ್ಷನ್ 70(2) ಮತ್ತು ಪೋಕ್ಸೊ ಕಾಯ್ದೆ ಸೆಕ್ಷನ್ 5(ಜಿ)/6 ಅಡಿ ಪ್ರಕರಣ ದಾಖಲಿಸಲಾಗಿದೆ.
ಐವರ ಬಂಧನ: ಬಾಲಕಿ ಪ್ರಯಾಣಿಸಿದ ಬಸ್ ಚಾಲಕ ಧರ್ಮೇಂದ್ರ ಕುಮಾರ್ (32), ಕಂಡಕ್ಟರ್ ದೇವೆಂಧ್ರ (52), ಮತ್ತೊಂದು ಸರ್ಕಾರಿ ಬಸ್ ಚಾಲಕ ರವಿ ಕುಮಾರ್ (34), ಮೂರನೇ ಸರ್ಕಾರಿ ಬಸ್ ಚಾಲಕ ರಾಜ್ ಪಾಲ್ (57) ಮತ್ತು ಕ್ಯಾಶ್ ಕಲೆಕ್ಟರ್ ಕುಮಾರ್ ಸೊನೆಕರ್ (38) ಈ ಐವರು ಆರೋಪಿಗಳು ಕೃತ್ಯದಲ್ಲಿ ಭಾಗಿಯಾಗಿದ್ದು, ಇವರ ಮೇಲೆ ಎಫ್ಐಆರ್ ದಾಖಲಿಸಲಾಗಿದೆ.
ಸಿಸಿಟಿವಿ ಫುಟೇಜ್ ಆಧಾರದ ಮೇಲೆ ಕುಮಾರ್ನನ್ನು ಬಂಧಿಸಲಾಗಿದ್ದು, ತನಿಖೆ ವೇಳೆ ಆತ ಇತರೆ ಹೆಸರುಗಳನ್ನು ಬಾಯ್ಬಿಟ್ಟಿದ್ದಾನೆ. ಇವರೆಲ್ಲರೂ ಅಪರಾಧ ಎಸಗಿರುವುದಾಗಿ ತಪ್ಪೊಪ್ಪಿಕೊಂಡಿದ್ದು, ಎಸ್ಐಟಿ ಶೀಘ್ರದಲ್ಲೇ ಸಾಕ್ಷ್ಯಗಳ ಆಧಾರದ ಮೇಲೆ ಅವರನ್ನು ಕಸ್ಟಡಿಯಲ್ ರಿಮಾಂಡ್ಗೆ ಪಡೆಯಲಿದ್ದಾರೆ.
ಇದನ್ನೂ ಓದಿ: ಬಂಗಾಳ ವೈದ್ಯೆ ಅತ್ಯಾಚಾರ, ಕೊಲೆ ವಿರುದ್ಧ ಒಗ್ಗೂಡಿದ ಫುಟ್ಬಾಲ್ನ 'ಶತ್ರು ಕ್ಲಬ್ಗಳು'
