ಜೈಪುರದಲ್ಲಿ ಪೆಟ್ರೋಲ್‌ ಕೊರತೆ: ತೈಲ ಖರೀದಿಗೆ ಮುಗಿಬಿದ್ದ ಜನ

ಜೈಪುರ: ರಾಜಧಾನಿ ಜೈಪುರದಲ್ಲಿ ತೈಲ ಬಿಕ್ಕಟ್ಟು ತಲೆದೋರಿದೆ. ಕಳೆದ 3 ದಿನಗಳಿಂದ ಎಚ್‌ಪಿಸಿಎಲ್ (ಹಿಂದೂಸ್ತಾನ್ ಪೆಟ್ರೋಲಿಯಂ ಕಾರ್ಪೊರೇಷನ್ ಲಿಮಿಟೆಡ್)​ ಮತ್ತು ಬಿಪಿಸಿಎಲ್​ನ​ ( ಭಾರತ್ ಪೆಟ್ರೋಲಿಯಂ ಕಾರ್ಪೊರೇಷನ್ ಲಿಮಿಟೆಡ್) ಬಹುತೇಕ ಬಂಕ್​ಗಳು ಬಂದ್​ ಆಗಿವೆ. ಹೀಗಾಗಿ, ಐಒಸಿಎಲ್‌ನ (ಇಂಡಿಯನ್ ಆಯಿಲ್ ಕಾರ್ಪೊರೇಷನ್ ಲಿಮಿಟೆಡ್) ಪೆಟ್ರೋಲ್ ಬಂಕ್​ಗಳಲ್ಲಿ ತೈಲ ಖರೀದಿಗೆ ಜನರು ಮುಗಿಬಿದ್ದಿದ್ದಾರೆ. ವಿಶೇಷವಾಗಿ, ರಾಮಗಢ ಮೋರ್, ಶಾಸ್ತ್ರಿ ನಗರ, ಝೋತ್ವಾರಾ, ವೈಶಾಲಿ ನಗರ, ಪ್ರತಾಪ್ ನಗರ ಮತ್ತು ವಿದ್ಯಾಧರ್ ನಗರದ ಕೆಲವು ಪ್ರದೇಶಗಳಲ್ಲಿ ಜನರು ಬಂ‌ಕ್​ಗಳ ಮುಂದೆ ಕ್ಯೂ ನಿಂತಿದ್ದಾರೆ. ಪರಿಣಾಮ ಟ್ರಾಫಿಕ್​ ಜಾಮ್‌ ಸಮಸ್ಯೆ ಉಂಟಾಗಿದ್ದು, ಸ್ಥಳೀಯ ಪೊಲೀಸರು ಬಂಕ್​ಗಳಿಗೆ ಭೇಟಿ ನೀಡಿ ಅಹಿತಕರ ಘಟನೆ ನಡೆಯದಂತೆ ಕ್ರಮ ಕೈಗೊಂಡಿದ್ದಾರೆ. ಬೇಡಿಕೆಯಷ್ಟು ಪ್ರಮಾಣದಲ್ಲಿ ಕಂಪನಿಗಳು ಪೆಟ್ರೋಲ್‌, ಡಿಸೇಲ್​ ಪೂರೈಸದಿರುವುದರಿಂದಲೇ ಈ ಸಮಸ್ಯೆ ಉದ್ಭವಿಸಿದೆ. ಪರಿಣಾಮ ತಮ್ಮದಲ್ಲದ ತಪ್ಪಿಗೆ ಬಂಕ್‌ ಮಾಲೀಕರು ಗ್ರಾಹಕರಿಂದ ಬೈಗುಳ ಕೇಳುವಂತಾಗಿದೆ.