ಕಲಾಪದಲ್ಲಿ ಬಟ್ಟೆ ವಿಚಾರವಾಗಿ ಹಾಸ್ಯದ ಹೊಳೆ..ಸಿದ್ದರಾಮಯ್ಯ 90 ಸೆಟ್​ ಉಡುಪಿನ ರಹಸ್ಯ ಗೊತ್ತೇ!?

ಜನ ಕೊಂಡುಕೊಳ್ಳುವ ಶಕ್ತಿಯಿದ್ದರ ತಾನೇ ಹೋಗುತ್ತಾರೆ. ಯಾರೋ ರೇವಣ್ಣನಂತವರು ಹೋಗಬಹುದು ಅಂಗಡಿಗೆ ಎಂದು ಹೆಚ್​.ಡಿ.ರೇವಣ್ಣ ಕಾಲೆಳೆದರು. ಆಗ ಸದನದಲ್ಲಿ ಹಾಸ್ಯದ ವಾತಾವರಣ ಸೃಷ್ಟಿಯಾಯಿತು. ಬಳಿಕ ಮಾತು ಮುಂದುವರೆಸಿದ ಸಿದ್ದರಾಮಯ್ಯ, ನಾನು ಮೊನ್ನೆ ಬಟ್ಟೆ ತರಲು ಹೋಗಿದ್ದೆ. ಅದು ಸುದ್ದಿನೇ ಆಗಿಬಿಟ್ಟಿತು ಎಂದರು. ಅದಕ್ಕೆ ಸ್ಪೀಕರ್​ ಕಾಗೇರಿ, ನೀವು ಬಹಳಷ್ಟು ಬಟ್ಟೆ ಕೊಂಡುಕೊಂಡಿದ್ದೀರಿ ಅದಕ್ಕೆ ಅದೆಲ್ಲಾ ಯಾರಿಗೆ ಎಂಬ ಪ್ರಶ್ನೆ ಎದ್ದಿದೆ ಎಂದು ನಗೆ ಚಟಾಕಿ ಹಾರಿಸಿದರು. ಅದಕ್ಕೆ ಸಿದ್ದರಾಮಯ್ಯ, ಯಾರಿಗೂ ಇಲ್ಲ. ನನ್ನೊಬ್ಬನಿಗೆ ಎಂದರು. ಆಗ ಗೃಹ ಸಚಿವ ಬೊಮ್ಮಾಯಿ, ಒಟ್ಟಿಗೆ 90 ಸೆಟ್​ ತಂಗೊಡಿದ್ದೀರಂತೆ. ಒಟ್ಟಿಗೆ ಅಷ್ಟೊಂದು ಬಟ್ಟೆ ಕಥೆ ಏನು ಎಂದರು. ಇದಕ್ಕೆ ಉತ್ತರಿಸಿದ ಸಿದ್ದರಾಮಯ್ಯ, ನಾನು ಧೋತಿ ತಂದಿದ್ದು ಅಲ್ಲಿ ಹೋಗಿ. ನಾನು ಸ್ವಲ್ಪ ದಪ್ಪ ಆದರೂ ಅದು ನಡೆಯುತ್ತೆ ಎಂದು ಸಮಜಾಯಿಷಿ ನೀಡಿದರು. ಆಗ ಡಿಸಿಎಂ ಕಾರಜೋಳ, ಮುದುಕರಾಗಿದ್ದಾರಲ್ಲ ಚೆಂದವಾಗಿ ಕಾಣಲು ಕಲರ್​ಫುಲ್​ ಬಟ್ಟೆ ತೆಗೆದುಕೊಳ್ಳುತ್ತಿದ್ದಾರೆ ಎಂದರು. ಹೀಗೆ ಬಟ್ಟೆ ವಿಚಾರವಾಗಿ ಕಲಾಪದಲ್ಲಿ ಹಾಸ್ಯದ ಹೊಳೆ ಹರಿಯಿತು.