ಇನ್ಮುಂದೆ ಅಪ್ಪ-ಅಮ್ಮನ ಜೊತೆ ಅಪ್ಪು ಸಮಾಧಿಗೂ ನಮನ ಸಲ್ಲಿಸುವೆವು: ರಾಘವೇಂದ್ರ ರಾಜ್‌ಕುಮಾರ್

ಪವರ್​ ಸ್ಟಾರ್​ ಪುನೀತ್​ ರಾಜ್​ಕುಮಾರ್​ ಅಂತ್ಯ ಸಂಸ್ಕಾರಕ್ಕೆ ಸಹಕರಿಸಿದ ಎಲ್ಲರಿಗೂ ರಾಘವೇಂದ್ರ ರಾಜಕುಮಾರ್​ ಅವರು ಧನ್ಯವಾದ ಸಲ್ಲಿಸಿದರು. ಇಷ್ಟು ದಿನ ಅಪ್ಪಾಜಿ, ಅಮ್ಮನ ಸಮಾಧಿಗೆ ನಮ್ಮ ಜೊತೆಗೆ ಪುನೀತ್ ಕೂಡ​ ಬಂದು ನಮಸ್ಕಾರ ಮಾಡುತ್ತಿದ್ದರು. ಆದರೆ ಇನ್ಮುಂದೆ ಅಪ್ಪಾಜಿ, ಅಮ್ಮನ ಜೊತೆಗೆ ಅಪ್ಪು ಸಮಾಧಿಗೂ ನಾವು ನಮನ ಸಲ್ಲಿಸಬೇಕಿದೆ. ಅಪ್ಪು ನನಗಿಂತ 10 ವರ್ಷ ಚಿಕ್ಕವನು, ನಾನು ಯಾವಾಗಲೂ ಅವನನ್ನು ಶೂಟಿಂಗ್​ಗೆ​ ಕರೆದುಕೊಂಡು ಹೋಗುತ್ತಿದ್ದೆ, ಅವನನ್ನು ಮಗ ಅಂತಲೇ ಕರೆಯುತ್ತಿದ್ದೆ. ಇದೀಗ ನನಗೆ ಪುತ್ರ ಶೋಕ ನಿರಂತರವಾಗಿ ಇರಲಿದೆ, ಅದರೊಂದಿಗೆ ನಾನು ಬೆಳೆಯಬೇಕಿದೆ ಎಂದು ದುಃಖ ವ್ಯಕ್ತಪಡಿಸಿದರು. ಮಂಗಳವಾರ ಸಮಾಧಿಗೆ ಹಾಲು-ತುಪ್ಪ ಕಾರ್ಯ ನಡೆಯಲಿದ್ದು, ಅದರ ಬಳಿಕವೇ ಸಮಾಧಿ ನೋಡಲು ಜನರಿಗೆ ಅವಕಾಶ ನೀಡಲಾಗುವುದು ಎಂದರು.