ಜಮ್ಮು ಕಾಶ್ಮೀರದಲ್ಲಿ ಮೇಘಸ್ಪೋಟ: ಮಂಜಿನಡಿ ಸಿಲುಕಿದ ಟ್ರಕ್‌ಗಳು​​- ವಿಡಿಯೋ

ಗಂದೇರ್ಬಾಲ್​ (ಜಮ್ಮು ಮತ್ತು ಕಾಶ್ಮೀರ) : ಮೇಘ ಸ್ಪೋಟ ಸಂಭವಿಸಿ ಮೂರು ಟ್ರಕ್‌ಗಳು ಮಂಜಿನ ಅಡಿಯಲ್ಲಿ ಸಿಲುಕಿರುವ ಘಟನೆ  ಶ್ರೀನಗರ ಲೇಹ್ ರಾಷ್ಟ್ರೀಯ ಹೆದ್ದಾರಿಯಲ್ಲಿನ ಸೋನ್ಮಾರ್ಗ್​ ಎಂಬಲ್ಲಿ ನಡೆದಿದೆ. ಕಣಿವೆ ನಾಡಿನಲ್ಲಿ ತೀವ್ರ ಪ್ರಮಾಣದ ಹಿಮಪಾತ ಸಂಭವಿಸುತ್ತಿದ್ದು, ಇಲ್ಲಿನ ಜನರಿಗೆ ಎಚ್ಚರಿಕೆಯಿಂದ ಇರುವಂತೆ ಸೂಚಿಸಲಾಗಿದೆ. ಘಟನೆಯಲ್ಲಿ ಯಾವುದೇ ಸಾವು ನೋವು ಸಂಭವಿಸಿಲ್ಲ ಎಂದು ತಿಳಿದುಬಂದಿದೆ.

ವರದಿಗಳ ಪ್ರಕಾರ, ಶ್ರೀನಗರ ಲೇಹ್​​ ಹೆದ್ದಾರಿಯಲ್ಲಿನ ಸೋನ್ಮಾರ್ಗ್​ನ​ ಝೋಜಿಲಾ ಎಂಬಲ್ಲಿ ಹಠಾತ್​ ಹಿಮಕುಸಿತ ಸಂಭವಿಸಿದೆ. ಇದರಿಂದಾಗಿ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸಾಗುತ್ತಿದ್ದ ಮೂರು ಟ್ರಕ್​​ಗಳು ಮಂಜಿನ ಅಡಿಯಲ್ಲಿ ಸಿಲುಕಿವೆ. ಅದೃಷ್ಟವಶಾತ್​ ಯಾವುದೇ ಪ್ರಾಣಾಪಾಯ ಸಂಭವಿಸಿಲ್ಲ. ಘಟನೆಯಿಂದಾಗಿ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಕೆಲಕಾಲ ವಾಹನ ಸಂಚಾರ ವ್ಯತ್ಯಯಗೊಂಡಿತ್ತು.

ವಿಷಯ ತಿಳಿದು ಸ್ಥಳಕ್ಕೆ ಆಗಮಿಸಿದ ಪೊಲೀಸರು ಮತ್ತು ಇತರ ತಂಡಗಳು ರಕ್ಷಣಾ ಕಾರ್ಯಾಚರಣೆ ನಡೆಸಿದವು. ಮೇಘ ಸ್ಫೋಟ ಹಿನ್ನೆಲೆಯಲ್ಲಿ ಇಲ್ಲಿನ 4 ಜಿಲ್ಲೆಗಳಲ್ಲಿ ಹಿಮಕುಸಿತದ ಎಚ್ಚರಿಕೆಯನ್ನು ಅಧಿಕಾರಿಗಳು ನೀಡಿದ್ದರು.

ಇದನ್ನೂ ಓದಿ : IPL ಟಿಕೆಟ್​ ಬಗ್ಗೆ ನಕಲಿ ಪೋಸ್ಟ್: ಚಿನ್ನಸ್ವಾಮಿ ಸ್ಟೇಡಿಯಂ ಬಳಿ ಮುಗಿಬಿದ್ದ ಅಭಿಮಾನಿಗಳಿಗೆ ಲಾಠಿ‌ ಏಟು