"ಇದು ಪಂಜಾಬ್, ಭಾರತವಲ್ಲ": ಮುಖದ ಮೇಲೆ ತ್ರಿವರ್ಣ ಧ್ವಜ ಹೊಂದಿದ್ದಕ್ಕೆ ಪ್ರವೇಶ ನಿರಾಕರಣೆ​

ಅಮೃತಸರ (ಪಂಜಾಬ್​): ಮುಖದ ಮೇಲೆ ತ್ರಿವರ್ಣ ಧ್ವಜವನ್ನು ಚಿತ್ರಿಸಲಾಗಿದೆ ಎಂಬ ಕಾರಣಕ್ಕೆ ಶ್ರೀ ಹರ್ಮಿಂದರ್​​ ಸಾಹಿಬ್​​ (ಗೋಲ್ಡನ್​ ಟೆಂಪಲ್​)ಗೆ ಪ್ರವೇಶ ನಿರ್ಬಂಧಿಸಿರುವ ಘಟನೆ ನಡೆದಿದೆ. ಇದಕ್ಕೆ ಸಂಬಂಧಿಸಿದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ವಿಡಿಯೋ ವೈರಲ್​ ಆಗಿದ್ದು, ತೀವ್ರ ಚರ್ಚೆಗೆ ಗ್ರಾಸವಾಗಿದೆ.

ಯುವತಿ ತನ್ನ ಮುಖದ ಮೇಲೆ ತ್ರಿವರ್ಣ ದ್ವಜದ ಬಣ್ಣವನ್ನು ಬಿಡಿಸಿಕೊಂಡು ಗೋಲ್ಡನ್​ ಟೆಂಪಲ್ ನೋಡಲು ಆಗಮಿಸಿದ್ದರು. ಆದರೆ ಯುವತಿಗೆ ಶ್ರೀ ಹರ್ಮಂದಿರ್​​​ ಸಾಹಿಬ್​​ ಸಿಬ್ಬಂದಿ ದೇವಸ್ಥಾನದ ಒಳಗಡೆ ಬರದಂತೆ ನಿರ್ಬಂಧಿಸಿದ್ದಾರೆ. ಇದನ್ನು ಪ್ರಶ್ನಿಸಿದ್ದಕ್ಕೆ ಸಿಬ್ಬಂದಿಯು "ಇದು ಪಂಜಾಬ್, ಭಾರತವಲ್ಲ" ಎಂದು ಹೇಳಿರುವುದು ವಿಡಿಯೋದಲ್ಲಿ ಸೆರೆಯಾಗಿದೆ.  

ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ತೀವ್ರ ಪ್ರತಿಕ್ರಿಯೆ ಪಡೆಯುತ್ತಿದ್ದಂತೆ, ಶೀರೋಮಣಿ ಗುರುದ್ವಾರ ಪರ್ಬಂಧಕ್​ ಸಮಿತಿಯ (SGPC) ಪ್ರಧಾನ ಕಾರ್ಯದರ್ಶಿ ಸ್ಪಷ್ಟೀಕರಣ ನೀಡಿದ್ದಾರೆ. "ಇದು ಸಿಖ್​ ದೇಗುಲ. ಪ್ರತಿಯೊಂದು ಧಾರ್ಮಿಕ ಸ್ಥಳಕ್ಕೂ ಅದರದ್ದೇ ಆದ ಶಿಷ್ಟಾಚಾರವಿದೆ. ಎಲ್ಲರಿಗೂ ಸ್ವಾಗತವಿದೆ, ಸಿಬ್ಬಂದಿಯೊಬ್ಬರ ಅನುಚಿತವಾಗಿ ವರ್ತನೆಗೆ ಕ್ಷಮೆಯಾಚಿಸುತ್ತೇವೆ. ಯುವತಿಯ ಮುಖದಲ್ಲಿರುವ ಧ್ವಜ ನಮ್ಮ ರಾಷ್ಟ್ರ ಧ್ವಜವಾಗಿರಲಿಲ್ಲ ಅದರಲ್ಲಿ ಅಶೋಕ ಚಕ್ರ ಇರಲಿಲ್ಲ. ಇದು ರಾಜಕೀಯ ಧ್ವಜವಾಗಿರಬಹುದು" ಎಂದು ಗುರುಚರಣ್​​ ಸಿಂಗ್​​ ಗ್ರೆವಾಲ್ ಅವರು ANIಗೆ ತಿಳಿಸಿದ್ದಾರೆ.

ಇದನ್ನೂ ಓದಿ: ಭಾರತದಲ್ಲಿ 145 ಟ್ರಿಲಿಯನ್ ರೂಪಾಯಿ ಮೊತ್ತದ ಆನ್ಲೈನ್ ವಹಿವಾಟು