ಚೆನ್ನೈನಲ್ಲಿ ಪ್ರವಾಹ: ಬಕೆಟ್​ನಲ್ಲಿ ಸಾಕು ನಾಯಿ ಇಟ್ಟುಕೊಂಡು ಸಾಗಿಸಿದ ವ್ಯಕ್ತಿ - ವಿಡಿಯೋ

ಚೆನ್ನೈ (ತಮಿಳುನಾಡು) : ಬಂಗಾಳಕೊಲ್ಲಿಯಲ್ಲಿ ವಾಯುಭಾರ ಕುಸಿತದಿಂದ ಉಂಟಾದ ಮಿಚೌಂಗ್​ ಚಂಡಮಾರುತ ತಮಿಳುನಾಡಿನಲ್ಲಿ ಭರ್ಜರಿ ಮಳೆ ಸುರಿಸಿದೆ. ಇದರಿಂದ ಚೆನ್ನೈ ನಗರದಲ್ಲಿ ಪ್ರವಾಹ ಉಂಟಾಗಿದೆ. ಮನೆಗಳು, ಕಟ್ಟಡಗಳಿಗೆ ಎದೆಮಟ್ಟದ ನೀರು ನುಗ್ಗಿದೆ. ಬಸ್​ ಸಂಚಾರಕ್ಕೂ ತೀವ್ರ ತೊಂದರೆ ಉಂಟಾಗಿದೆ. ಹಲವು ಕಾರುಗಳು ನೀರಿನಲ್ಲಿ ಕೊಚ್ಚಿ ಹೋಗಿವೆ.

ನೀರಿನಲ್ಲೇ ಜನರು ಜೀವ ಉಳಿಸಿಕೊಳ್ಳಲು ಸಾಮಾನು ಸರಂಜಾಮುಗಳೊಂದಿಗೆ ಸುರಕ್ಷಿತ ಜಾಗಗಳಿಗೆ ಸ್ಥಳಾಂತರವಾಗುತ್ತಿದ್ದಾರೆ. ವ್ಯಕ್ತಿಯೊಬ್ಬರು ತಾವು ಸಾಕಿದ್ದ ನಾಯಿಯನ್ನು ಬಕೆಟ್​ನೊಳಗೆ ಇಟ್ಟುಕೊಂಡು ಸಾಗುತ್ತಿದ್ದ ದೃಶ್ಯ ಕಂಡುಬಂತು. ತನ್ನೊಂದಿಗೆ ಸಾಕುಪ್ರಾಣಿಯ ಜೀವವನ್ನು ಕಾಪಾಡಲು ಈತ ಬಕೆಟ್​ ತಂತ್ರ ಬಳಸಿದ್ದಾನೆ. ಮನೆಯೊಳಗೆ ಮಳೆ ನೀರಿನಲ್ಲಿ ಸಿಲುಕಿದ್ದ ಅಜ್ಜಿ, ಮೊಮ್ಮಗಳನ್ನು ಎಸ್​ಡಿಆರ್​​ಎಫ್​ ಸಿಬ್ಬಂದಿ ರಕ್ಷಿಸಿದ್ದಾರೆ.

ಗುಡುಗು ಸಹಿತ ಭಾರಿ ಮಳೆ ಸುರಿದಿದ್ದು, 8 ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ. ವ್ಯತಿರಿಕ್ತ ಹವಾಮಾನದಿಂದಾಗಿ 60 ವಿಮಾನಗಳು, 70 ರೈಲು ಸಂಚಾರ ಬಂದ್​ ಮಾಡಲಾಗಿತ್ತು. ಕರ್ನಾಟಕದಿಂದ ತೆರಳಬೇಕಿದ್ದ 10 ಕ್ಕೂ ಅಧಿಕ ನೈಋತ್ಯ ರೈಲುಗಳನ್ನೂ ನಿಲ್ಲಿಸಲಾಗಿತ್ತು. ಸದ್ಯ ತಮಿಳುನಾಡಿನಿಂದ ಆಂಧ್ರಪ್ರದೇಶದ ಕರಾವಳಿಗೆ ಮಿಚೌಂಗ್​​ ಪಯಣಿಸಿದ್ದು, ಮಳೆ ನಿಂತಿದೆ. ಆದರೆ, ಪ್ರವಾಹ ನೀರು ಇನ್ನೂ ಇಳಿದಿಲ್ಲ.

ಇದನ್ನೂ ಓದಿ: ಇಳಿದ ಮಿಚೌಂಗ್​ ಅಬ್ಬರ: 2015ರ ಬಳಿಕ ಭೀಕರ ಮಳೆ ಕಂಡ ತಮಿಳುನಾಡು, ವಿಮಾನ ಸೇವೆ ಪುನಾರಂಭ