ಅಬ್ಬಬ್ಬಾ! ಬರೋಬ್ಬರಿ 22 ಲಕ್ಷ ರೂ.ಗೆ ತಾಲ್ಚೇರ್​​ ಗಣಪತಿ ಲಡ್ಡು ಹರಾಜು..

ಅಂಗುಲ್​ (ಒಡಿಶಾ): ಒಡಿಶಾದ ಅಂಗುಲ್​ನ ತಾಲ್ಚೇರ್​ನಲ್ಲಿ ನಡೆಯುವ ಗಣೇಶ ಪೂಜೆಯು ಹೆಚ್ಚು ಪ್ರಸಿದ್ಧಿ ಪಡೆದುಕೊಂಡಿದೆ. ಈ ವರ್ಷ ಕೂಡ ಅತ್ಯಂತ ವಿಜೃಂಭಣೆಯಿಂದ ಹಬ್ಬವನ್ನು ಆಚರಿಸಲಾಗಿದೆ. ಪ್ರತಿ ವರ್ಷ ಗಣೇಶನ ನೈವೇದ್ಯಕ್ಕಾಗಿ ತಯಾರಿಸಲಾಗುವ ಲಡ್ಡು  ಹರಾಜಿಗೆ ಹಾಕುವುದು ಇಲ್ಲಿನ ವಾಡಿಕೆ. ಗಣೇಶನ ಪ್ರತಿಷ್ಠಾಪನೆ ದಿನ ಈ ಲಡ್ಡು ತಯಾರಿಸಿ ಗಣೇಶನಿಗೆ ನೈವೇದ್ಯಕ್ಕೆ ಇಡಲಾಗುತ್ತದೆ.‌ ಗಣೇಶ ದೇವರಿಗೆ ಸಮರ್ಪಿಸಿದ್ದ 31 ಕಿಂಟ್ವಾಲ್​ ಲಡ್ಡು ಈ ಬಾರಿ ದಾಖಲೆ ಬೆಲೆಗೆ ಹರಾಜಾಗಿದೆ. 

ಬರೋಬ್ಬರಿ 22 ಲಕ್ಷದ 22 ಸಾವಿರದ 222 ರೂಪಾಯಿಗೆ ಲಾಲ್​​ಬಾಗ್​ ರಾಜಾ ಇನ್​ಸ್ಟಿಟ್ಯೂಟ್​ ಆಫ್​ ತಾಲ್ಚೇರ್​ ಈ ಲಡ್ಡುವನ್ನು ಪಡೆದುಕೊಂಡಿದೆ. ತಾಲ್ಚೇರ್ ಗಣೇಶ ಪೂಜೆ ಇಲ್ಲಿಯ ಜನರಿಗೆ ಬಹಳ ವಿಶೇಷವಾಗಿದೆ. ಪೂಜೆಯ ನಂತರ ಲಡ್ಡು ಹರಾಜು ಪ್ರಕ್ರಿಯೆಯು ಆಡಳಿತ ಮಂಡಳಿ, ತಾಲ್ಚೇರ್​ ಶಾಸಕ ಹಾಗೂ ಪೂಜಾ ಸಮಿತಿ ಕಾರ್ಯಕರ್ತರ ಸಮ್ಮುಖದಲ್ಲಿ ಗುರುವಾರ ನಡೆಯಿತು. ಅಂತಿಮವಾಗಿ, ಲಾಲ್​​ಬಾಗ್​ ರಾಜಾ ಸಂಸ್ಥೆ ಬಹುದೊಡ್ಡ ಮೊತ್ತಕ್ಕೆ ಲಡ್ಡನ್ನು  ಪಡೆದುಕೊಂಡಿದೆ. ಇದೇ ಇನ್​ಸ್ಟಿಟ್ಯೂಟ್​ ಕಳೆದ ವರ್ಷ 8 ಲಕ್ಷದ 70 ಸಾವಿರ ರೂಪಾಯಿಗೆ ಹರಾಜು ಗೆದ್ದಿತ್ತು. ​ ​   

ಪೂಜೆಯ ನಂತರ ಲಡ್ಡು ಹರಾಜು ನೋಡಲು ಸಾಕಷ್ಟು ಮಂದಿ ಜಮಾಯಿಸಿದ್ದರು. ಬೃಹತ್​ ಲಡ್ಡನ್ನು ಟ್ರಕ್​ನಲ್ಲಿ ಮೆರವಣಿಗೆ ಮೂಲಕ ಹರಾಜು ಸ್ಥಳಕ್ಕೆ ತರಲಾಯಿತು. ಅಂಗುಲ್​ನ ತಾಲ್ಚೇರ್​ನಲ್ಲಿ ವಿವಿಧ ಮಂಟಪಗಳಲ್ಲಿ ಆಕರ್ಷಕ ಗಣೇಶ ಮೂರ್ತಿಗಳು ಭಕ್ತರನ್ನು ಆಕರ್ಷಿಸುತ್ತಿವೆ. ಇಲ್ಲಿ 10 ದಿನಗಳ ಕಾಲ ಗಣೇಶ ಪೂಜೆಯನ್ನು ನೆರವೇರಿಸಲಾಗುತ್ತದೆ. ಬಳಿಕ ಗಣೇಶನ ನಿಮಜ್ಜನ ಕಾರ್ಯ ನಡೆಯುತ್ತದೆ.  ಇಂದು (ಶುಕ್ರವಾರ) ತಾಲ್ಚೇರ್​ ಗಣೇಶನ ನಿಮಜ್ಜನ ಮೆರವಣಿಗೆಯೂ ವಿಜೃಂಭಣೆಯಿಂದ ನಡೆಯಲಿದೆ. ಅದಕ್ಕಾಗಿ ಸಕಲ ಸಿದ್ಧತೆಗಳನ್ನು ಮಾಡಲಾಗಿದೆ.   

ಇದನ್ನೂ ಓದಿ: ಗಣೇಶನ ನೈವೇದ್ಯಕ್ಕೆ ಇರಿಸಿದ್ದ ಲಡ್ಡು ₹ 32 ಸಾವಿರಕ್ಕೆ ಹರಾಜು: ವಿಡಿಯೋ