ಉಧಮ್​ಪುರ್​ದಲ್ಲಿ ಬಲೂನ್​ಗಳೊಂದಿಗೆ ಹಾರಿಬಿಟ್ಟ ಪಾಕಿಸ್ತಾನದ ಧ್ವಜ ಪತ್ತೆ.. ಶ್ರೀನಗರದಲ್ಲಿ ವ್ಯಕ್ತಿ ಬಂಧನ

ಉಧಮ್​ಪುರ್​ (ಶ್ರೀನಗರ): ಬಿಳಿ ಮತ್ತು ಹಸಿರು ಬಣ್ಣದ ಬಲೂನ್​ಗಳಿಗೆ ಪಾಕಿಸ್ತಾನದ ಧ್ವಜ ಕಟ್ಟಿ ಹಾರಿ ಬಿಡಲಾಗಿರುವ ಘಟನೆ ಜಮ್ಮು ಮತ್ತು ಕಾಶ್ಮೀರದ ಉಧಮ್‌ಪುರ ಜಿಲ್ಲೆಯ ಸುನೇತಾರ್ ಗ್ರಾಮದಲ್ಲಿ ನಡೆದಿದೆ. ವಿಷಯ ತಿಳಿದು ಸ್ಥಳಕ್ಕಾಗಮಿಸಿದ ಪೊಲೀಸರು ಪಾಕಿಸ್ತಾನ ಧ್ವಜ ಹಾಗೂ ಬಲೂನ್​ಗಳನ್ನು ವಶಪಡಿಸಿಕೊಂಡಿದ್ದಾರೆ. ಎಲ್ಲಿಂದ ಹಾರಿ ಬಿಡಲಾಗಿದೆ ಎಂಬುದುರ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ ಎಂದು ಪೊಲೀಸ್​ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಅಲ್ಲದೇ, ಪ್ರಕರಣ ದಾಖಲಿಸಿಕೊಂಡಿದ್ದು, ತನಿಖೆಯ ಆಧಾರದ ಮೇಲೆ ಮುಂದಿನ ಕ್ರಮ ಕೈಗೊಳ್ಳಲಾಗುವುದು ಎಂದು ಹೇಳಿದ್ದಾರೆ. ಈ ಹಿಂದೆ 2022ರ ನವೆಂಬರ್‌ನಲ್ಲಿ ಸಾಂಬಾದ ಘಗ್ವಾಲ್ ಪ್ರದೇಶದಲ್ಲಿ 'ಬಿಎಚ್‌ಎನ್' ಎಂದು ಬರೆದಿರುವ ಪಾಕಿಸ್ತಾನಿ ಧ್ವಜದ ಬಲೂನ್​ಗಳನ್ನು ವಶಪಡಿಸಿಕೊಳ್ಳಲಾಗಿತ್ತು. 2021 ರ ಆಗಸ್ಟ್‌ನಲ್ಲಿ, ಪಂಜಾಬ್‌ನ ರೂಪನಗರದ ಸಂಡೋಯಾ ಗ್ರಾಮದ ಮೈದಾನದಲ್ಲಿ ಐ ಲವ್ ಪಾಕಿಸ್ತಾನ ಎಂದು ಬರೆದಿದ್ದ ಧ್ವಜಗಳು ಮತ್ತು ಬಲೂನ್‌ಗಳು ಪತ್ತೆಯಾಗಿದ್ದವು.

ಉಗ್ರ ಸಂಘಟನೆಯೊಂದಿಗೆ ಸಂಪರ್ಕ ಹೊಂದಿದ್ದವನ ಬಂಧನ: ಉಗ್ರಗಾಮಿ ಸಂಘಟನೆ ದಿ ರೆಸಿಸ್ಟೆನ್ಸ್ ಫ್ರಂಟ್ (ಟಿಆರ್‌ಎಫ್)ನೊಂದಿಗೆ ಸಂಬಂಧ ಹೊಂದಿದ್ದ ಆರೋಪಿಯನ್ನು ಶ್ರೀನಗರದ ಬಟ್ಟಾ ಮಾಲು ಎಂಬ ಪ್ರದೇಶದಲ್ಲಿ ಪೊಲೀಸರು ಬಂಧಿಸಿದ್ದಾರೆ. ಬಂಧಿತ ಆರೋಪಿ ಮುಹಮ್ಮದ್ ಯವರ್ ಎಂದು ಗುರುತಿಸಲಾಗಿದೆ. ಬಂಧಿತನಿಂದ ಹ್ಯಾಂಡ್​ ಗ್ರಾನೈಡ್​ ಅನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ಈ ಸಂಬಂಧ ಕೋಠಿ ಬಾಗ್‌ ಪೊಲೀಸ್ ಠಾಣೆ ಪ್ರಕರಣ ದಾಖಲಾಗಿದ್ದು ಪೊಲೀಸರು ವಿಚಾರಣೆ ನಡೆಸುತ್ತಿರುವುದಾಗಿ ಹೇಳಿದ್ದಾರೆ.

ಇದನ್ನೂ ಓದಿ: ರಾಷ್ಟ್ರಪತಿ ಭವನ, ರಾಷ್ಟ್ರೀಯ ಯುದ್ಧ ಸ್ಮಾರಕದ ಮೇಲೆ ಪಾಕ್ ಉಗ್ರರ ಕಣ್ಣು