ಲೋಕಸಭೆಗೆ ಬಿಜೆಪಿ ನನ್ನನ್ನು ಬಿಟ್ಟು ಬೇರೆ ಯಾರಿಗೂ ಟಿಕೆಟ್​ ಕೊಡಲ್ಲ: ರಮೇಶ ಜಿಗಜಿಣಗಿ

ವಿಜಯಪುರ: "ಲೋಕಸಭೆ ಚುನಾವಣೆಗೆ ಪಕ್ಷವು ನನ್ನನ್ನು ಬಿಟ್ಟು ಬೇರೆ ಯಾರಿಗೂ ಟಿಕೆಟ್​ ಕೊಡಲ್ಲ ಎಂಬ ವಿಶ್ವಾಸವಿದೆ" ಎಂದು ಬಿಜೆಪಿ ಸಂಸದ ರಮೇಶ ಜಿಗಜಿಣಗಿ ಹೇಳಿದರು. ವಿಜಯಪುರ ನಗರದಲ್ಲಿಂದು ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, "ಚುನಾವಣೆಗೆ ಸಿದ್ಧತೆ ಏನೂ ಇಲ್ಲ, ಪಕ್ಷ ಬಿ ಫಾರ್ಮ್​ ಕೊಟ್ಟರೆ ಅಪ್ಪ, ಅಣ್ಣ ಎಂದು ಹಳ್ಳಿಗಳಲ್ಲಿ ತಿರುಗುತ್ತೇನೆ" ಎಂದರು. 

ಕಳೆದ ಬಾರಿ ಬಿಜೆಪಿ ರಾಜ್ಯದಲ್ಲಿ ಗೆದ್ದಷ್ಟು ಸೀಟುಗಳನ್ನು ಈ ಬಾರಿ ಗೆಲುವುದಿಲ್ಲ ಎಂದು ಸಮೀಕ್ಷೆಗಳು ಹೇಳುತ್ತಿವೆ ಎಂಬುದಕ್ಕೆ ಪ್ರತಿಕ್ರಿಯಿಸಿ, "ಕಾಂಗ್ರೆಸ್​ನವರ ಸುಳ್ಳು ಭರವಸೆಗಳಿಂದ ಜನ ದೂರವಾಗುತ್ತಿದ್ದಾರೆ. ಇವರು ಬೇಕಾದಷ್ಟು ಲಾಗ ಹೊಡೀಲಿ, ಬಿಜೆಪಿಗೆ ಈ ಬಾರಿ 25 ಸ್ಥಾನಗಳು ಬರಲಿಲ್ಲವೆಂದರೂ ಕನಿಷ್ಠ 22 ಸ್ಥಾನಗಳಾದರೂ ಬರುತ್ತವೆ" ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

"ವಿಜಯಪುರದಲ್ಲಿ ಏರ್‌ಪೋರ್ಟ್ ಆಗಬೇಕೆಂಬುದು ನನ್ನ ಕನಸಾಗಿತ್ತು. ಅದರಂತೆ ಎರಡು ಅವಧಿಯಲ್ಲಿ ಹೆಚ್ಚಿನ‌ ಅನುದಾನ ತಂದಿದ್ದೇನೆ. ಏರ್​ರ್ಪೋ​ರ್ಟ್​ಗಿದ್ದ ಅಡ್ಡಿ ನಿವಾರಣೆ ಮಾಡಿದ್ದೇನೆ.‌ ಈ ವಿಮಾನ ನಿಲ್ದಾಣಕ್ಕೆ ಹಲವಾರು ಬಾರಿ ಪತ್ರ ಬರೆದು ಅನುದಾನ ತಂದವನು ನಾನು. ಹೀಗಾಗಿ ಅದರ ಕ್ರೆಡಿಟ್ ನನಗೆ ಸಲ್ಲಬೇಕು, ಅದರಲ್ಲಿ ಎರಡು ಮಾತಿಲ್ಲ" ಎಂದರು.

ಇದನ್ನೂ ಓದಿ:'ಲೋಕಸಭೆಗೆ ಸ್ಪರ್ಧಿಸಲು ಅವಕಾಶ ನೀಡಬೇಕು': ಕಾಂಗ್ರೆಸ್ ಮುಖಂಡ ಅಜಯ ಕುಮಾರ ಸರನಾಯಕ