ವಿಶ್ವಕಪ್​ ಕ್ರಿಕೆಟ್: ಕಿವೀಸ್​ ವಿರುದ್ಧದ ಸೆಮೀಸ್​ ಫೈಟ್​ಗೆ ಮುಂಬೈ ತಲುಪಿದ ಟೀಮ್​ ಇಂಡಿಯಾ

ಮುಂಬೈ (ಮಹಾರಾಷ್ಟ್ರ): ನಡೆಯುತ್ತಿರುವ ವಿಶ್ವಕಪ್​ನಲ್ಲಿ ಟೀಮ್​ ಇಂಡಿಯಾ 9 ಲೀಗ್​ ಪಂದ್ಯಗಳನ್ನು ಗೆದ್ದು 2003ರ ರೀತಿಯಲ್ಲೇ ಸೆಮೀಸ್​ ಪ್ರವೇಶ ಪಡೆದುಕೊಂಡಿದೆ. ಬೌಲಿಂಗ್​ ಮತ್ತು ಬ್ಯಾಟಿಂಗ್​​ನಲ್ಲಿ ಉತ್ತಮ ಪ್ರದರ್ಶನ ನೀಡುತ್ತಿರುವ ಭಾರತ ತಂಡ ವಿಶ್ವಕಪ್​ ಚಾಂಪಿಯನ್​ ಆಗುವ ಫೆವರೀಟ್​​ ತಂಡವಾಗಿದೆ. ಭಾನುವಾರ ಕೊನೆಯ ಲೀಗ್​ ಪಂದ್ಯವನ್ನು ನೆದರ್ಲೆಂಡ್ಸ್​ ವಿರುದ್ಧ 160 ರನ್​ಗಳಿಂದ ಗೆದ್ದ ಭಾರತ ತಂಡ ನ್ಯೂಜಿಲೆಂಡ್​ ವಿರುದ್ಧದ ಸೆಮೀಸ್​ ಫೈಟ್​ಗಾಗಿ ಮುಂಬೈಗೆ ಬಂದಿಳಿದಿದೆ.  

ನವೆಂಬರ್​ 15 ರಂದು ಮುಂಬೈನ ವಾಂಖೆಡೆ ಕ್ರಿಡಾಂಗಣದಲ್ಲಿ ಕೇನ್​ ವಿಲಿಯಮ್ಸನ್​ ನಾಯಕತ್ವ ನ್ಯೂಜಿಲೆಂಡ್​ ಮತ್ತು ರೋಹಿತ್​ ಶರ್ಮಾ ಮುಂದಾಳತ್ವದ ಭಾರತ ಪಂದ್ಯವನ್ನಾಡಲಿದೆ. 2019ರ ವಿಶ್ವಕಪ್​ನಲ್ಲಿ ಕಿವೀಸ್​ ಟೀಮ್​ ಇಂಡಿಯಾ ಸೆಮೀಸ್​ನಲ್ಲಿ ಸೋಲಿಸಿ ವಿಶ್ವಕಪ್​ನಿಂದ ಹೊರಹಾಕಿತ್ತು. ಬುಧವಾರ ನಡೆಯಲಿರುವ ಪಂದ್ಯದಲ್ಲಿ ಭಾರತ ಈ ಸೇಡು ತೀರಿಸಿಕೊಳ್ಳಬೇಕಿದೆ. ಲೀಗ್​ ಹಂತದಲ್ಲಿ ಬ್ಲೂ ಬಾಯ್ಸ್​ ನ್ಯೂಜಿಲೆಂಡ್​ ವಿರುದ್ಧ ಗೆದ್ದು ಇತಿಹಾಸ ನಿರ್ಮಿಸಿದರು. 2003ರ ವಿಶ್ವಕಪ್​ ಅಂದರೆ 20 ವರ್ಷಗಳ ನಂತರ ನ್ಯೂಜಿಲೆಂಡ್​ ವಿರುದ್ಧ ಟೀಮ್​ ಇಂಡಿಯಾ ಜಯ ಸಾಧಿಸಿತ್ತು.  

ಮುಂಬೈ ವಿಮಾನ ನಿಲ್ದಾಣದ ಹೊರಗೆ ತಂಡದ ಆಟಗಾರರನ್ನು ನೋಡಲು ಅಭಿಮಾನಿಗಳು ನೆರೆದಿದ್ದರು. ರೋಹಿತ್​ ಶರ್ಮಾ, ಶುಭಮನ್​ ಗಿಲ್​, ಕೆಎಲ್​ ರಾಹುಲ್​, ಕೋಚ್​ ದ್ರಾವಿಡ್​ ಮತ್ತು ತಂಡದ ಎಲ್ಲ ಸದಸ್ಯರು ಮತ್ತು ಸಹಾಯಕ ಸಿಬ್ಬಂದಿ ಒಟ್ಟಿಗೆ ಪ್ರಯಾಣಿಸಿದ್ದರು. ವಿರಾಟ್​ ಕೊಹ್ಲಿ ಮಾತ್ರ ಪ್ರತ್ಯೇಕವಾಗಿ ಮುಂಬೈಗೆ ಬಂದಿದ್ದಾರೆ.

ಇದನ್ನೂ ಓದಿ: ವಿರಾಟ್​ ನಾಯಕತ್ವದಲ್ಲಿ ಕ್ರಿಕೆಟ್​ ಆಸ್ಟ್ರೇಲಿಯಾದ ವಿಶ್ವಕಪ್​ ತಂಡ: ಟೀಮ್​ನಲ್ಲಿ ನಾಲ್ವರು ಭಾರತೀಯರು