ಸಕಲ ಸೇನಾ ಗೌರವದೊಂದಿಗೆ ಹುತಾತ್ಮ ಯೋಧ ಸೇವಾಕ್ ಸಿಂಗ್​ ಅಂತ್ಯಕ್ರಿಯೆ: ವಿಡಿಯೋ

ಬಠಿಂಡಾ: ಜಮ್ಮು ಮತ್ತು ಕಾಶ್ಮೀರದ ಪೂಂಚ್‌ನಲ್ಲಿ ಗುರುವಾರ ನಡೆದ ಉಗ್ರ ದಾಳಿಯಲ್ಲಿ ಹುತಾತ್ಮರಾದ ಐವರು ಯೋಧರಲ್ಲಿ ಸೇವಾಕ್​ ಸಿಂಗ್​ ಒಬ್ಬರು. ಅವರ ಅಂತ್ಯಕ್ರಿಯೆ ಇಂದು ಅವರ ಹುಟ್ಟೂರಾದ ಪಂಜಾಬ್​ನ ಬಠಿಂಡಾದ ಬಾಘಾದಲ್ಲಿ ಸಕಲ ಸರ್ಕಾರಿ ಗೌರವಗಳೊಂದಿಗೆ ನಡೆಸಲಾಯಿತು. ರಾಷ್ಟ್ರೀಯ ರೈಫಲ್ ಪಡೆಯ ಯೋಧರ ವಾಹನದ ಮೇಲೆ ಉಗ್ರರು ಗ್ರೆನೇಡ್​ ದಾಳಿ ನಡೆಸಿದ್ದರು. ದಾಳಿಯಲ್ಲಿ ಸೈನಿಕರು ಪ್ರಯಾಣಿಸುತ್ತಿದ್ದ ವಾಹನಕ್ಕೆ ಬೆಂಕಿ ಹೊತ್ತಿಕೊಂಡು ಐವರು ಯೋಧರು ಸ್ಥಳದಲ್ಲೇ ಹುತಾತ್ಮರಾಗಿದ್ದರು.

ಹುತಾತ್ಮ ಯೋಧರಲ್ಲಿ ಒಬ್ಬರಾದ ಸೇವಾಕ್ ಸಿಂಗ್​ರ ಅಂತ್ಯಕ್ರಿಯೆಯನ್ನು ಸ್ವಗ್ರಾಮವಾದ ಬಠಿಂಡಾದ ಬಾಘಾದಲ್ಲಿ ಸಕಲಾ ಸೇನಾ ಗೌರವದೊಂದಿಗೆ ಇಂದು ನೆರವೇರಿಸಲಾಯಿತು. ಅಂತ್ಯಕ್ರಿಯೆ ವೇಳೆ ಸೇವಾಕ್ ಸಿಂಗ್​ರ ತಂದೆಗೆ ರಾಷ್ಟ್ರೀಯ ಧ್ವಜ ಹಸ್ತಾಂತರಿಸಲಾಯಿತು. ಎಎಪಿ ಶಾಸಕಿ ಬಲ್ಜಿಂದರ್ ಕೌರ್, ಗ್ರಾಮದ ಜನರು ಮತ್ತು ಕುಟುಂಬಸ್ಥರು ಯೋಧನ ಅಂತ್ಯಕ್ರಿಯೆಯಲ್ಲಿ ಭಾಗಿಯಾಗಿದ್ದರು.

ಶಹೀದ್ ಸೇವಕ್ ಸಿಂಗ್ ಅವರು 5 ವರ್ಷಗಳ ಹಿಂದೆ ಅಂದರೆ 2018ರಲ್ಲಿ ಭಾರತೀಯ ಸೇನೆಗೆ ಸೇರಿದ್ದರು. ಸೇವಕ್​ ಸಿಂಗ್​ ಮನೆಗೆ ಏಕೈಕ ಪುತ್ರರಾಗಿದ್ದರು. ಇವರಿಗೆ ಇಬ್ಬರು ಸಹೋದರಿಯರೂ ಇದ್ದಾರೆ. 20 ದಿನಗಳ ಹಿಂದೆ ಸೇವಕ್​ ಸಿಂಗ್​ ರಜೆ ಮುಗಿಸಿ ಸೇನೆಗೆ ಹಿಂತಿರುಗಿದ್ದರು. ಹುತಾತ್ಮರಾದ 5 ಯೋಧರಲ್ಲಿ 4 ಜನ ಪಂಜಾಬ್​ ರಾಜ್ಯಕ್ಕೆ ಸೇರಿದ್ದಾರೆ ಎಂದು ಭಾರತೀಯ ಸೇನೆ ತಿಳಿಸಿದೆ.

ಇದನ್ನೂ ಓದಿ: ಗ್ರೆನೇಡ್​ ದಾಳಿಯಲ್ಲಿ ಐವರು ಯೋಧರು ಹುತಾತ್ಮ: ಉಗ್ರರ ಬೇಟೆಗೆ ಕಾರ್ಯಾಚರಣೆ