'ಇದು ಜನರ ಜಿ20, ಭಾರತದ ರಾಜತಾಂತ್ರಿಕ ಗೆಲುವು': ಕಾಂಗ್ರೆಸ್ ಸಂಸದ ಶಶಿ ತರೂರ್‌ ಮೆಚ್ಚುಗೆ

ನವದೆಹಲಿ : ನವದೆಹಲಿಯಲ್ಲಿ ನಡೆದ ಜಿ20 ಶೃಂಗಸಭೆ ಅತ್ಯಂತ ಯಶಸ್ವಿಯಾಗಿದೆ ಎಂದು ಕಾಂಗ್ರೆಸ್ ಸಂಸದ ಶಶಿ ತರೂರ್ ಪ್ರಶಂಸಿಸಿದ್ದಾರೆ. ಭಾನುವಾರ ಮಾತನಾಡಿದ ಅವರು, "ನಾನು ಜಿ20 ಶೆರ್ಪಾ ಅಮಿತಾಭ್​ ಕಾಂತ್ ಮತ್ತು ನಮ್ಮ ವಿದೇಶಾಂಗ ಸಚಿವ ಎಸ್.ಜೈಶಂಕರ್ ಅವರೊಂದಿಗೆ ಸಂಪರ್ಕದಲ್ಲಿದ್ದೇನೆ. ಈ ವಿಚಾರಕ್ಕೆ ಸಂಬಂಧಿಸಿದಂತೆ ಅವರನ್ನು ಅಭಿನಂದಿಸುತ್ತೇನೆ. ಏಕೆಂದರೆ ಅವರು ದೇಶಕ್ಕೆ ತುಂಬಾ ಒಳ್ಳೆಯ ಕೆಲಸ ಮಾಡಿದ್ದಾರೆ. ಇದು ಜನರ ಜಿ20 ಆಗಿತ್ತು. ಭಾರತದ ರಾಜತಾಂತ್ರಿಕ ಗೆಲುವು" ಎಂದು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.  

ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರ್ಕಾರವು ಈ ಹಿಂದಿನ ಯಾವುದೇ ಜಿ20 ಅಧ್ಯಕ್ಷರು ಮಾಡದ ಕೆಲಸ ಮಾಡಿದ್ದಾರೆ. ಜಿ20ಯನ್ನು ರಾಷ್ಟ್ರವ್ಯಾಪಿ ದೊಡ್ಡ ಕಾರ್ಯಕ್ರಮವಾಗಿಸಿದ್ದಾರೆ. 58 ನಗರಗಳಲ್ಲಿ 200 ಸಭೆಗಳೂ ಸೇರಿದಂತೆ ವಿವಿಧ ಸಾರ್ವಜನಿಕ ಕಾರ್ಯಕ್ರಮಗಳನ್ನು ಆಯೋಜಿಸುವ ಮೂಲಕ ಜಿ20ಯನ್ನು ಒಂದು ರೀತಿಯ ಜನರ ಜಿ20 ಆಗಿ ಪರಿವರ್ತಿಸಿದರು ಎಂದರು.  

ಭಾರತ-ಮಧ್ಯಪ್ರಾಚ್ಯ-ಯುರೋಪ್ ಆರ್ಥಿಕ ಕಾರಿಡಾರ್ ಕುರಿತು ಮಾತನಾಡಿದ ತರೂರ್, "ಭಾರತದ ಮಧ್ಯಪ್ರಾಚ್ಯ ಇಯು (EU) ಉಪಕ್ರಮವು ಸಂಪೂರ್ಣವಾಗಿ ಹೊಸದು. ಇದು ಮೊದಲೇ ನಿರೀಕ್ಷಿತವಾದದ್ದಲ್ಲ, ಸ್ವಾಗತಾರ್ಹ ಉಪಕ್ರಮ ಎಂದಿದ್ದಾರೆ. ಉಕ್ರೇನ್​ನಲ್ಲಿ ನ್ಯಾಯಸಮ್ಮತ ಮತ್ತು ಶಾಶ್ವತವಾದ ಶಾಂತಿ ಸ್ಥಾಪಿಸುವ ನಿಟ್ಟಿನಲ್ಲಿ ಜಿ20 ದೇಶಗಳು ಒಗ್ಗಟ್ಟಾಗಿವೆ ಎಂದು ಹೇಳುವ ನವದೆಹಲಿ ಘೋಷಣೆ ನಿಜವಾಗಿಯೂ ತುಂಬಾ ಪ್ರಭಾವಶಾಲಿಯಾಗಿದೆ, ಈ ಅಸಾಧ್ಯವಾದ ಕೆಲಸವನ್ನು ಸಾಧಿಸುವುದು ನಿಜಕ್ಕೂ ವಿಶೇಷ ಸಾಧನೆ ಎಂದು ಕೊಂಡಾಡಿದ್ದಾರೆ.

ಇದನ್ನೂ ಓದಿ : ಜಿ20 ನಾಯಕರ ಭೋಜನಕ್ಕೆ ಚಿನ್ನ, ಬೆಳ್ಳಿ ಲೇಪಿತ ತಟ್ಟೆಗಳ ಬಳಕೆ: ಶರದ್ ಪವಾರ್ ಆಕ್ಷೇಪ