ಬೆಣ್ಣೆನಗರಿಯಲ್ಲಿ ನಟ ದರ್ಶನ್ ಭರ್ಜರಿ ರೋಡ್ ಶೋ, ರೇಣುಕಾಚಾರ್ಯ ಪರ ಮತಯಾಚನೆ

ದಾವಣಗೆರೆ: ಜಿಲ್ಲೆಯ ಹೊನ್ನಾಳಿಯಲ್ಲಿಂದು ನಟ ದರ್ಶನ್ ಬಿಜೆಪಿ ಅಭ್ಯರ್ಥಿ ಎಂ.ಪಿ ರೇಣುಕಾಚಾರ್ಯ ಪರ ಭರ್ಜರಿ ಪ್ರಚಾರ ಮಾಡಿದರು. ಹೊನ್ನಾಳಿ ಪಟ್ಟಣದ ಹೃದಯ ಭಾಗವಾದ ಸಂಗೊಳ್ಳಿ ರಾಯಣ್ಣ ವೃತ್ತದಿಂದ ಆರಂಭವಾದ ರೋಡ್​ ಶೋನಲ್ಲಿ ಸಾವಿರಾರು ಕಾರ್ಯಕರ್ತರು, ಅಭಿಮಾನಿಗಳು ಭಾಗಿಯಾಗಿ ನಟ ದರ್ಶನ್ ಹಾಗೂ ಬಿಜೆಪಿ ಅಭ್ಯರ್ಥಿ ಎಂ.ಪಿ ರೇಣುಕಾಚಾರ್ಯ ಅವರಿಗೆ ಬೆಂಬಲ ಸೂಚಿಸಿದ್ರು.  

ಮೆರವಣಿಗೆ ಉದ್ದಕ್ಕೂ ನಟ ದರ್ಶನ್ ಅವರು ಮತದಾರರಿಗೆ ಬಿಜೆಪಿ ಅಭ್ಯರ್ಥಿಗೆ ಮತ ಹಾಕುವಂತೆ ಮನವಿ ಮಾಡಿದ್ರು. ಸಂಗೊಳ್ಳಿ ರಾಯಣ್ಣ ವೃತ್ತ, ಹೊನ್ನಾಳಿ ಪಟ್ಟಣ, ನ್ಯಾಮತಿ-ಸುರಹೊನ್ನೆ, ಚೀಲೂರು, ಸಾಸ್ವೆಹಳ್ಳಿ, ಕುಂದೂರು, ಕೂಲಂಬಿ ಗ್ರಾಮಗಳಲ್ಲಿ ರೋಡ್​ ಶೋ ನಡೆಯಿತು.  

ಕೂಲಂಬಿ ಗ್ರಾಮದಲ್ಲಿ ಮೆರವಣಿಗೆ ಮುಕ್ತಾಯಗೊಂಡಿತು. ಬಳಿಕ ಮಾತನಾಡಿದ ನಟ ದರ್ಶನ್, ಕೊರೊನಾ ಸಂದರ್ಭ ನಿಮಗೆ ಯಾರು ಸಾಥ್ ನೀಡಿದ್ರು ಎಂದು ಜನರಲ್ಲಿ ಪ್ರಶ್ನಿಸಿದ್ರು. ಎಂ.ಪಿ ರೇಣುಕಾಚಾರ್ಯ ಅವರು ಕೋವಿಡ್ ಸಂದರ್ಭ ಸಾಕಷ್ಟು ಕೆಲಸ ಮಾಡಿದ್ದಾರೆ, ನಿಮ್ಮ ಸೇವೆ ಮಾಡಿದ್ದಾರೆ. ಕೊರೊನಾ ಕಾಲದಲ್ಲಿ ಸೇವೆ ಮಾಡಿದವರನ್ನು ನೋಡಿದ್ದು ಕಡಿಮೆ, ಅವರು ಜೀವ ಪಣಕ್ಕಿಟ್ಟು ಕೆಲಸ ಮಾಡಿದ್ದಾರೆ. ಆ್ಯಂಬುಲೆನ್ಸ್ ಚಾಲನೆ ಮಾಡಿ ಕೆಲವರ ಜೀವ ಉಳಿಸಿದ್ದಾರೆ. ಅವರು ಕರೆದಿದ್ದಕ್ಕೆ ಬಂದಿದ್ದೇನೆ, ಅವರಿಗೆ ನೀವು ಆಶೀರ್ವಾದ ಮಾಡಬೇಕು ಎಂದು ಮನವಿ ಮಾಡಿದರು.

ಇದನ್ನೂ ಓದಿ: 'ದಿ ಕೇರಳ ಸ್ಟೋರಿ ತಮ್ಮ ಮೇಲಿನ ದಾಳಿಯೆಂದು ಭಾವಿಸಿದವರು ಭಯೋತ್ಪಾದಕರು'