ಬೆಂಗಳೂರು: ಮಚ್ಚು ಹಿಡಿದು ಮಹಿಳೆಗೆ ಪ್ರಾಣ ಬೆದರಿಕೆ ಆರೋಪ; ಪುಂಡಾಟ ಸಿಸಿಟಿವಿಯಲ್ಲಿ ಸೆರೆ

ಬೆಂಗಳೂರು: ನಗರದಲ್ಲಿ ಪುಂಡರ ಉಪಟಳ ಮುಂದುವರಿದಿದೆ. ಮಾರಕಾಸ್ತ್ರ ಹಿಡಿದು ಪುಡಿ ರೌಡಿಗಳು ಕುಡಿದ ಮಹಿಳೆಯೊಬ್ಬರಿಗೆ ಪ್ರಾಣ ಬೆದರಿಕೆ ಹಾಕಿರುವ ಘಟನೆ ಡಿಸೆಂಬರ್ 25ರಂದು ಪಾಟರಿ ರಸ್ತೆಯ ಗಾಂಧಿ ಗ್ರಾಮದಲ್ಲಿ ನಡೆದಿದೆ. ಕೈಯಲ್ಲಿ ಮಾರಕಾಸ್ತ್ರ ಹಿಡಿದು ಓಡಾಡುತ್ತಿರುವ ದೃಶ್ಯಗಳು ಸಿಸಿಟಿವಿಯಲ್ಲಿ ಸೆರೆಯಾಗಿವೆ. ಈ ಮಹಿಳೆಯೊಂದಿಗೆ ಬಡ್ಡಿ ಹಣದ ವಿಚಾರವಾಗಿ ಈ ಹಿಂದೆ ಕೂಡ ಗಲಾಟೆಯಾಗಿತ್ತು ಎಂದು ತಿಳಿದುಬಂದಿದೆ.

ಈ ವಿಚಾರವಾಗಿ ಪ್ರಾಣ ಬೆದರಿಕೆಗೆ ಒಳಗಾಗಿರುವ ಮಹಿಳೆಯು ಪೊಲೀಸ್​ ಠಾಣೆ ಮೆಟ್ಟಿಲೇರಿದ್ದರು. ಈ ಹಿನ್ನೆಲೆ ಜಿದ್ದು ತೀರಿಸಿಕೊಳ್ಳಲು ಬಂದಿದ್ದ ಮೂರ್ನಾಲ್ಕು ಜನ ಪುಡಿ ರೌಡಿಗಳು ಏಕಾಏಕಿ ಮನೆ ಬಳಿ ಬಂದು ಮಾರಕಾಸ್ತ್ರ ಝಳಪಿಸಿದ್ದಾರೆ. 'ನಮ್ಮ ಅಕ್ಕನ ಮೇಲೆ ಕಂಪ್ಲೈಂಟ್ ಕೊಡ್ತಿಯಾ?' ಅಂತ ಹಲ್ಲೆಗೆ ಯತ್ನಿಸಿದ್ದಾರೆ. ಜೆ. ಸಿ. ನಗರ ಠಾಣೆಗೆ ದೂರು ಕೊಟ್ಟರೂ ಸಹ ಇದುವರೆಗೂ ಯಾವುದೇ ಕ್ರಮ ಕೈಗೊಂಡಿಲ್ಲ ಎಂದು ಪ್ರಾಣ ಬೆದರಿಕೆಗೆ ಒಳಗಾದ ಮಹಿಳೆ ಆರೋಪಿಸಿದ್ದಾರೆ.

ಘಟನೆಯ ಸಂದರ್ಭದಲ್ಲಿ ಪ್ರಾಣ ಬೆದರಿಕೆಗೆ ಒಳಗಾದ ಮಹಿಳೆಯ ತಾಯಿ ಎಚ್ಚೆತ್ತುಕೊಂಡಿದ್ದರು. ಆಕೆಗೆ ಯಾವುದೇ ತೊಂದರೆಯಾಗಿಲ್ಲ. ಆ ಮಹಿಳೆಯು, ಈ ಬಗ್ಗೆ ಜೆ ಸಿ ನಗರ ಠಾಣೆಗೆ ದೂರು ನೀಡಿದ್ದಾರೆ.

ಇದನ್ನೂ ಓದಿ: ಅಮೆರಿಕದಲ್ಲಿ ಭೀಕರ ರಸ್ತೆ ಅಪಘಾತ: ಆಂಧ್ರಪ್ರದೇಶ ಮೂಲದ 6 ಮಂದಿ ದುರ್ಮರಣ