ಹಂದಿಮರಿಗೆ ಹಾಲುಣಿಸಿ ಮಮಕಾರ ತೋರಿದ ಬೀದಿನಾಯಿ: ತಾಯಿ ವಾತ್ಸಲ್ಯಕ್ಕೆ ಮನಸೋತ ಜನರು

ಮೈಸೂರು: ಬೀದಿ ನಾಯಿಯೊಂದು ಹಂದಿಮರಿಗೆ ಹಾಲುಣಿಸುವ ಮೂಲಕ ತಾಯಿಯ ಮಮಕಾರ ತೋರಿದೆ. ಮೈಸೂರಿನ ಎನ್‌‌ ಆರ್ ಮೊಹಲ್ಲಾ ಪೊಲೀಸ್ ಠಾಣಾ ರಸ್ತೆಯಲ್ಲಿ ಸುಮಾರು ದಿನಗಳಿಂದ ಹಂದಿಮರಿಗೆ ನಾಯಿ ಹಾಲುಣಿಸುತ್ತಿರುವ ದೃಶ್ಯ ನೋಡಿದ ಸಾರ್ವಜನಿಕರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ನಗರ ಪಾಲಿಕೆಯವರು ಹಂದಿಗಳನ್ನು ಹಿಡಿದುಕೊಂಡು ಹೋಗುವಾಗ ಈ ಮರಿಹಂದಿ ಕಣ್ಣುತಪ್ಪಿ ಅಲ್ಲೇ ಉಳಿದುಕೊಂಡಿದೆ. ಬಳಿಕ ಹೊಟ್ಟೆ ಹಸಿವಿನಿಂದ ಬಳಲಿ ನಾಯಿಯ ಹಾಲು ಕುಡಿಯಲು ಮುಂದಾಯಿತು. ಇದಕ್ಕೆ ಪ್ರತಿರೋಧ ತೋರದ ಬೀದಿನಾಯಿ, ತನ್ನ ಮರಿಯಂತೆ ಹಾಲುಣಿಸಿದೆ. ಈ ದೃಶ್ಯವನ್ನು ನೋಡಿದ ಸಾರ್ವಜನಿಕರು ನಾಯಿಯ ತಾಯಿ ವಾತ್ಸಲ್ಯಕ್ಕೆ ಮನಸೋತಿದ್ದಾರೆ. ಈ ಅಪರೂಪದ ದೃಶ್ಯವನ್ನು ಎನ್‌.ಆರ್.ಮೊಹಲ್ಲದ ನಿವಾಸಿ ಪುಷ್ಪ ಸುರೇಶ್ ಎಂಬುವರು ಮೊಬೈಲ್​ನಲ್ಲಿ ಸೆರೆ ಹಿಡಿದು ಸಾಮಾಜಿಕ ಜಾಲತಾಣದಲ್ಲಿ ಬಿಟ್ಟಿದ್ದಾರೆ.