ಕೊಯಮತ್ತೂರು: ಭಾರೀ ಗಾಳಿಗೆ ಬೃಹತ್​ ಬ್ಯಾನರ್ ಕುಸಿದು 3 ಮಂದಿ ಸಾವು

ಕೊಯಮತ್ತೂರು (ತಮಿಳುನಾಡು): ತಮಿಳುನಾಡಿನ ಕೊಯಮತ್ತೂರು ಜಿಲ್ಲೆಯ ಸೇಲಂ-ಕೊಚ್ಚಿನ್ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಇಂದು ಬೃಹತ್​ ಬ್ಯಾನರ್​ಗಳನ್ನು ಅಳವಡಿಸುವ ಕಾರ್ಯ ನಡೆಯುತ್ತಿತ್ತು. ಈ ವೇಳೆ ಜೋರು ಗಾಳಿ ಮಳೆಯಾದ ಪರಿಣಾಮ ಕೆಲಸದಲ್ಲಿ ತೊಡಗಿದ್ದ 3 ಕಾರ್ಮಿಕರ ಮೇಲೆ ಬ್ಯಾನರ್​ ಬಿದ್ದು ಅವರು ಸ್ಥಳದಲ್ಲೇ ಮೃತಪಟ್ಟ ಘಟನೆ ವರದಿಯಾಗಿದೆ.

ರಾಮಸ್ವಾಮಿ ಅವರ ಜಾಗದಲ್ಲಿ ಪಳನಿಸ್ವಾಮಿ ಅವರ ಉಸ್ತುವಾರಿಯಲ್ಲಿ ಬೃಹತ್​ ಬ್ಯಾನರ್​ ಅಳವಡಿಕೆ ಕಾರ್ಯ ನಡೆಯುತ್ತಿತ್ತು. ಮೊದಲಿದ್ದ ಬ್ಯಾನರ್​ ತೆಗೆದು ಹೊಸ ಬ್ಯಾನರ್​ ಅಳವಡಿಸಲಾಗುತ್ತಿತ್ತು. ಸೇಲಂನ 7 ಕಾರ್ಮಿಕರು ಈ ಕೆಲಸವನ್ನು ನಿರ್ವಹಿಸುತ್ತಿದ್ದರು. ಇಂದು ಸಂಜೆ ಕಾರ್ಮಿಕರು ಕೆಲಸ ಮಾಡುತ್ತಿದ್ದ ವೇಳೆ ಭಾರೀ ಗಾಳಿ ಸಹಿತ ಮಳೆಯಾಗಿದೆ. ಈ ವೇಳೆ ಏಕಾಏಕಿ ರಭಸವಾಗಿ ಬೀಸಿದ ಗಾಳಿಯಿಂದ ರಾಡ್​ ಸಮೇತ ಬ್ಯಾನರ್​ ಕೆಳಗೆ ಬಿದ್ದಿದೆ. ಕೆಲಸದಲ್ಲಿ ನಿರತರಾಗಿದ್ದ ಸೇಲಂ ಜಿಲ್ಲೆಯ ಜಲಂದಪುರಂ ಪ್ರದೇಶದ ಕುಮಾರ್, ಗುಣಶೇಖರನ್ ಮತ್ತು ಶೇಖರ್ ಎಂಬ 3 ಕಾರ್ಮಿಕರು ಬ್ಯಾನರ್​ ರಾಡ್​ ಅಡಿಯಲ್ಲಿ ಸಿಲುಕಿ ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ. 

ಈ ಬಗ್ಗೆ ಮಾಹಿತಿ ಪಡೆದ ಕರುಮತ್ತಂಪಟ್ಟಿ ಪೊಲೀಸರು ಕೂಡಲೇ ಸ್ಥಳಕ್ಕಾಗಮಿಸಿ ಬ್ಯಾನರ್​ ರಾಡ್​ ಮೇಲಕ್ಕೆತ್ತಿ ಮೃತ ದೇಹಗಳನ್ನು ಹೊರತೆಗೆದು ಮರಣೋತ್ತರ ಪರೀಕ್ಷೆಗಾಗಿ ಕೊಯಮತ್ತೂರು ಸರ್ಕಾರಿ ಆಸ್ಪತ್ರೆಗೆ ರವಾನಿಸಿದ್ದಾರೆ. ಗಂಭೀರವಾಗಿ ಗಾಯಗೊಂಡಿರುವ ಅರುಣ್ ಕುಮಾರ್ ಮತ್ತು ಷಣ್ಮುಗ ಸುಂದರಂ ಅವರನ್ನು ಚಿಕಿತ್ಸೆಗಾಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಅನುಮತಿ ಪಡೆದಿರುವ ಎತ್ತರಕ್ಕಿಂತ ಹೆಚ್ಚಿನ ಎತ್ತರದಲ್ಲಿ ಬ್ಯಾನರ್ ಹಾಕಿರುವುದು ಮತ್ತು ಸೇಲಂ-ಕೊಚ್ಚಿನ್ ರಾಷ್ಟ್ರೀಯ ಹೆದ್ದಾರಿಯ ರಸ್ತೆಯ ಇಕ್ಕೆಲಗಳಲ್ಲಿ ನೂರಾರು ದೈತ್ಯ ಬ್ಯಾನರ್‌ಗಳನ್ನು ಅನುಮತಿ ಇಲ್ಲದೇ ಹಾಕಿರುವುದು ಅಪಘಾತಕ್ಕೆ ಕಾರಣವಾಗಿದೆ. ಹಲವು ವರ್ಷ ಹಳೆಯದಾಗಿರುವ ಈ ಬ್ಯಾನರ್​ಗಳು ಗಾಳಿಯ ರಭಸಕ್ಕೆ ಏಕಾಏಕಿ ಬೀಳುವ ಅಪಾಯವಿದ್ದು, ಕೂಡಲೇ ಸರ್ಕಾರ ಕ್ರಮ ಕೈಗೊಳ್ಳಬೇಕಿದೆ. ಇದಲ್ಲದೇ ಜಿಲ್ಲೆಯ ಹಲವೆಡೆ ಅನುಮತಿ ಇಲ್ಲದೆ ದೈತ್ಯ ಬ್ಯಾನರ್ ಗಳನ್ನು ಹಾಕಲಾಗಿದ್ದು, ಅವುಗಳನ್ನು ಗುರುತಿಸಿ ತೆಗೆಯಬೇಕು ಎಂದು ಸಾರ್ವಜನಿಕರು ಒತ್ತಾಯಿಸಿದ್ದಾರೆ.

ಇದನ್ನೂ ಓದಿ: ಸ್ನೇಹ ಬೆಳೆಸಲು ಯುವತಿಯ ಕತ್ತಿನ ಮೇಲೆ ಚಾಕು ಇಟ್ಟು ಬೆದರಿಸಿದ ಯುವಕ: ಬಂಧನ